Sema Epasamak Ired Paul Cha Iconium
14
Idi mimothok si Paul tan si Barnabas cha siyodad na Iconium, kimowan ired synagog iren ma Hodjos et iyantoro ired man. Et chakel iriy Hodjos tan Gentiles a emati tep en-awis i inpasing Paul tan si Barnabas a iyantoro. 2 Nem sema iren Hodjos a nat piyan chen memati, siyogsogan cha iriy Gentiles, isonga ngimaaw i nemnem na Gentiles ired ma emati. 3 Et ebayag a gwares Paul tan si Barnabas chiwan, et etoled iren iyantoro maypangkep Jesus. Et piyaneknekan Jesus i podno ma naintoro cha maypangkep na kaasi tho tep in-i-kanan iren Jesus na panakabalin a mengemag na milagro tan echom a kaskasdaaw. 4 Nem sema iren toon gwared ma siyodad, nat man-iinges i nemnem cha tep gwariy echom a naengonod ired ma Hodjos a nat ematid Jesus, tan gwara ngoy echom a naengonod ired ma apostolis.5 Et sema iren nat ematid Jesus a Hodjos, Gentiles, tan naengibalbalnay cha si-kara, iyantathabal ira, et niyemnem chen pedigathan cha ires Paul et chedtogen cha ira say metiy ira. 6 Nem idi iyamtaan iren Paul iwa plano ra, bimetik ira led Lystra tan Derbe a siyodad cha probinsiya na Lycaonia tan cha iyay-esop a sahop. 7 Et intoro chiy mapteng a chamag ired ma dogad.
Sema Epasamak Ired Paul Cha Lystra Tan Derbe
8 Gwariy sa-kin dahid Lystra a sigod a epilay et nat mahaaha-ahad. Mantoktokkong cha kad-an Paul. 9 Idi niyanki-ngelin ma dahiy niyankonen Paul, diritson sini-neng Paul, et iyamtaan to i agpayson piyati niwa dahi i mebedin a onmapteng i pilay to. 10 Isonga, inpekes Paul i esel ton kigwan to i “Akgwat ka!” Et imakgwat a chakos iwa dahi et iyan-ahad.
11 Idi sini-neng iren ma chakel a tooy imag Paul, kimeljaw ired esel na i-Lycaonia a kigwan cha i “Seja daleki, chiyos iren iyanparang na too, et sima-kod med kad-an tayo!” 12 Et ngiyaranan cha ira na ngaran na chiyos cha. Si Barnabas, ngiyaranan cha na Zeus, et si Paul ngo, ngiyaranan cha na Hermes tep si-kathoy naiyan-esel na olay. 13 Sema timplon naiyanchayawan chen Zeus, chiwed awas na siyodad. Et sema parin naiyansilbid Zeus, engitolod ira na bahen bomalon iyan-ono na sabsabong cha sakepan na siyodad tep sema pari tan tothoo, piyan chen emiin a mengitangdal cha Paul tan si Barnabas. 14 Nem si Paul ngo tan si Barnabas, idi inki-ngelan cha i piyan na tothoon a-magen, bini-nik chiy baro ren mengibiybiy i ensahit i nemnem cha. Et iyanbetik ired ma kawa na tothoon mankelkeljaw a kigwan cha i 15 “Si-kayon too, niyana jowan ipasing ithan? Too kawi ngon inges jo. Kimowan kawi did jay a mengigwanggwang cha si-kayo na mapteng a chamag maypangkep na kaysalakanan say bebnekan jo ira ma sinan chiyos jon nagwariy silbi tho tan say memati kayod sibibiyag a Afo Chiyos a emarsowa na iyaykayang tan dobong tan baybay tan emiin a gwara ired man. 16 Nonta bayag da, intolok Afo Chiyos a a-magen na emiin a tooy piyan cha. 17 Nem angken seman, nain-i-kanan iren Afo Chiyos na sinjal a si-kathoy podnon Chiyos. Say kapaneknekan to, nain-i-kan toy mapteng cha si-kara. Tep si-kathoy naengi-kan na oran tan naengidawes na tanem. Tan si-kathoy naengi-kan na kakanen jo tan si-katho ngoy naengi-kan na pan-imdengan jo.” 18 Nem angken kigwan Paul tan si Barnabas iwan, edigat met laeng a tetngelen cha ira ma too say eg ira mengitangdal cha si-kara.
19 Et sema iren Hodjos a nat ematid Jesus, mimothok ired Lystra a edafo did siyodad na Antioch tan Iconium. Iyawis cha iriy too i nat podno ma naiyantoros Paul tan si Barnabas maypangkep Jesus, et chintog iren ma toos Paul, et inkoyod ched awas na siyodad a kin cha i etiy. 20 Nem idi kimowan ira ma ematid kad-an Paul et biyo-ngolan cha, imakgwat et imolid siyodad. Idi gwa-gwa tho, dimayat si Paul tan si Barnabas a kimowan cha siyodad na Derbe.
Imolis Paul Tan Si Barnabas Cha Antioch A Gwared Probinsiya Na Syria
21 Idi mimothok si Paul tan si Barnabas cha Derbe, inkasaba riy mapteng a chamag et chakel i toon ematid Jesus. Et imolis Paul tan si Barnabas cha siyodad na Lystra tan Iconium, et intoloy cha ingkathod sibi riy Antioch a iyay-esop cha sahop na Pisidia. 22 Inpakedsang chiy pamati iren ma emati ired ma siyodad a kigwan ched si-kara i “Angken nengoy mepesamak cha si-kayo, pemasi-masig kayon mematid Jesus tep mesepol a da-kamen tayoy chakel a diga-digat asan mayka-chom kiyed pantorayan Afo Chiyos cha dangit.” 23 Cha emiin a dogad a kimowanan Paul tan si Barnabas, enotok ira na dalekin mengibalnay iren ma emati. Et iyan-ayonar iren inkararagan cha ira ma mengibalnay, et inpiyal cha ired Jesus a ematian cha say si-kathoy mengajod si-kara.
24 Idi iyanchalan si Paul tan si Barnabas cha Pisidia, mimothok ired probinsiya na Pamphylia. 25 Inkasaba riy esel Afo Chiyos cha Perga a siyodad cha Pamphylia, et chimalong ired siyodad na Attalia a gwared kilig na baybay. 26 Et iyandogan ired bapor a on-olid siyodad na Antioch cha Syria. Tep sema iren ematid man, si-kariy engito-non Paul tan si Barnabas a inkararag cha i tolongan iren Afo Chiyos a a-magen chiy obden in-i-kan tod si-kara. Et niman kincheng cha ma obda.
27 Idi mimothok si Paul tan si Barnabas cha Antioch, inpasa-nop chen emiin i emati, et in-istoriya ren emiin i inpa-mag Afo Chiyos cha si-kara. In-istoriya ra ngoy inpasing Afo Chiyos a enolong cha si-karen iyankasabed Gentiles say chakel i Gentiles a emati wed Jesus. 28 Et ebayag a iyan-iyan si Paul tan si Barnabas ired ma ematid Antioch.