Into-no Res Barnabas Tan Si Saul A Mankasabed Echom A Ili-ili
13
Sema iren ematid siyodad na Antioch, a gwared si-kara ira ma naiyanpadto tan naiyantoro na esel Afo Chiyos. Sema iren too, si-kares Barnabas, si Simon a iyanngaran na Niger a piyan ton a-seden i Etoleng, si Lucius a i-Cyrene, Manaen a kadgwen Ari Herod nonta aanak ira, tan si Saul. 2 Idi sa-kin akow a man-aayonar ira ma emati tan chiyan chayawes Afo Chiyos, kigwan na Ispirito Santod si-kara i “Isi-jan jos Barnabas tan si Saul say mansilbi ired si-kak tep gwariy piyan kon a-magen cha.” 3 Et idi kincheng iren ma ematin iyan-ayonar tan iyankararag, insagpat chiy diwa red Barnabas tan si Saul et inbaga red Afo Chiyos i bindisjonan toy obda ra.Kimowan Si Barnabas Tan Si Saul Cha Cyprus
4 Et inpabtik na Ispirito Santos Barnabas tan si Saul, et kimowan ired siyodad na Seleucia a iyandogan ired bapor cha Cyprus a dogad a edikmothan na baybay. 5 Idi mimothok ired Salamis a siyodad cha Cyprus, inkasaba riy esel Afo Chiyos ired synagog a naiyanchayawan iren ma Hodjos. Tan si John Mark ngon iyodop cha, tiyolongan to ira.
6 Et binisita ren emiin i dogad a naiyan-iyanan na tood Cyprus ingkathod mimothok ired siyodad na Paphos. Chiwan i engaspolan cha na sa-kin Hodjon para amag na magic a kigwan to i profiten Afo Chiyos, nem itek iwan. Si Elymas Bar-Jesus i ngaran to. 7 Sema too, echom na gobirnador cha Cyprus a si Sergius Paulus i ngaran to. Sema gobirnador, edaing a too. Tiya-gway tos Barnabas tan si Saul tep piyan ton iki-ngelan i esel Afo Chiyos. 8 Nem si Elymas a para amag na magic, kiyontra thos Barnabas tan si Saul tep nat piyan ton mematiy gobirnador cha Jesus. (Elymas i ngaran cha esel na Greeks. Sema banag to, para amag na magic.) 9 Nem si Saul a iyanngaran pay na Paul, iyapno na panakabalin na Ispirito Santo, et sini-neng ton chilis Elymas 10 a kigwan tod si-katho i “Si-kam a anak na Diablo, nakiyontram a emiin i mapteng. Maliksi ken menaol na too tan naimag moy ekila-kilasin ngaaw. Nainpanbalin mo na olay i podnon Afo Chiyos na ite-itek. 11 Chosaen token Afo Chiyos, et mekorab ka wen nat mahasi-neng ka na nihal na akow na piyen akow.” Apaman a kigwan Paul iwan, gwariy ena-din na mathen Elymas a singen kolpot tan enbolinget, et nat mahasi-neng ma, et mankapkapkap a mengenap na mengibalnay cha si-katho. 12 Idi mita na gobirnador i epasamak cha Elymas, ematid Jesus tep iyasdaaw cha inpantoro iren Paul maypangkep Jesus.
Kimowan Ires Paul Cha Antioch A Iyay-esop Cha Pisidia
13 Idi iyakcheng iwan, si Paul ira, bintihan chiy Paphos, et iyandogan ired bapor a onkowan cha Perga a siyodad cha probinsiya na Pamphylia. Idi mimothok ired man, inpayas iren John Mark, et imolis John Mark cha Jerusalem. 14 Si Paul ngo ira, bintihan chiy Perga, et intoloy cha ingkathod mimothok ired Antioch a siyodad a iyay-esop cha sahop na Pisidia. Idi Sabbath a akow na pan-inana iren ma Hodjos, kimowan ired synagog et ekitokkong ira. 15 Idi bisa ra wiy dinteg Moses tan sola-solat iren ma profita, sema iren aafo na synagog, engito-no iren mengowan ired Paul i “Aahi, no gwariy konen jo ired ja tothoo i pekedsang chiy nemnem cha, kowan jo di.”
16 Isonga, imakgwat si Paul et iyanchingjas ired ma too say on-eket ira. Et kigwan to i “Si-kayon poli-polin Israel tan si-kayon Gentiles a naiyanchayaw cha Afo Chiyos, iki-ngeli yoy konen ko. 17 Si-kathayon poli-polin Israel, sema Chiyos a nachijaw tayo, pinispis toy afo-afo thayo la. Nonta timpon nainpan-iyan ched Egypt, inpachakel to ira, et inbo-day to ired Egypt babaen na panakabalin to. 18 Nonta epat a polon tawen a iyan-aha-ahad ired ma dogad a nagwariy toon naiyan-iya-iyan, ino-inosan Afo Chiyos ira ma afo-afo thayo len iyanbaso-basol cha si-katho. 19 Et idi mimothok ira ma afo-afo thayo led ma sahop na Canaan, inpaagwak Afo Chiyos cha si-kara i pithon gropon toon naiyan-iyan chiwan, et intawid tod si-kara ma sahop. 20 Iyanchogid timpon kimowan iriy afo-afo thayo led Egypt ingkathod timpon iyanchogi iren man-iyan cha Canaan, epat a dasos tan dimen polon tawen.
“Idi iyakcheng iwan, enotok si Afo Chiyos na kokowis a iyantoray iren ma afo-afo thayo la ingkathod timpon Samuel a profita. 21 Et kigwan iren ma afo-afo thayo la i piyan chiy ari, et pinispis Afo Chiyos si Saul a anak Kish a polin Benjamin say si-kathoy ari cha, et iyantoray si Saul na epat a polon tawen. 22 Et ingkal Afo Chiyos si Saul, et chiyotohan tos David a ari cha. Tep kigwan Afo Chiyos i ‘Si David a anak Jesse, toon piyan toy piyan ko. b A-magen toy emiin a piyan kon a-magen to.’ c 23 Sejay a si David, sa-kin poli-poli tho di ma inkarin Afo Chiyos a mengito-nod poli-polin Israel say isalakan to ira. Et sema mengisalakan, si-kathos Jesus. 24 Edagwas si John a Naemonjag iy say si Jesus, et inkasaba thod emiin a poli-polin Israel i mesepol a bebnekan chiy basol cha et manpabonjag ira say ibiybiy chen iyanbabawi ira. 25 Idi chanchanin kekchengen John a Naemonjag iwa obden into-non Afo Chiyos a a-magen to, kigwan tod tothoo i ‘Kin jo emo i si-kak i into-non Afo Chiyos a mengisalakan cha si-kayo. Nat si-kak, no diket sema toon mantetened alid si-kak. Et kagol na kinakayang to, nat maykariak angken memasbas na iket na sapathos to.’
26 “Aahi, si-kayon poli-polin Abraham tan si-kayon Gentiles a naiyanchayaw cha Afo Chiyos, si-kathayoy engipaamtaan Afo Chiyos na mapteng a chamag maypangkep na kaysalakanan. 27 Tep sema iren toon naiyan-iyan cha Jerusalem tan sema iren naengibalbalnay cha si-kara, nat amta ra i si Jesus i into-non Afo Chiyos a mengisalakan cha si-kara. Nat egwathan cha ngoy kigwan iren ma profita maypangkep Jesus, angken nabisa riy sola-solat iren ma profita na Siyabba-Sabbath. Nem tiyongpal met laeng iren ma tooy kigwan iren ma profita i mepesamak nonta kiyowis ches Jesus a kigwan cha i pathiy i chosa tho. 28 Angken nagwariy amta ren basol a imag Jesus, inbaga ra ngorechan cha Pilate i ipabono tho. 29 Idi imag iren ma too man, tiyongpal chen emiin i iyaysolat maypangkep Jesus cha esel Afo Chiyos. Et sema iren echom Jesus, in-epas chiy angel tod koros, et inbeka ra. 30 Nem inpanpawil Afo Chiyos. 31 Et chakel i akow a iyanpara-parang si Jesus ired ma echom ton ekiolop cha si-kathon iyanchogid Galilee ingkathod Jerusalem. Et niman si-kariy naengipaamten Jesus cha si-kathayon Hodjos. 32 Isonga, kimowan kawi din konen mid si-kayoy mapteng a chamag. Tep sema inkarin Afo Chiyos ired ma afo-afo thayo la, 33 tiyongpal to wa para cha si-kathayon poli-poli cha babaen na engipapawil ton Jesus. Seman ngoy iyaysolat cha maykadgwen Psalmon kigwan tod man i:
‘Si-kam i anak ko.
Niman ipaamtak i si-kak i Awam.’ d
34 Iyaysolat ngod ma esel Afo Chiyos i inpanpawil Afo Chiyos si Jesus say eg meti-metiy mowan. Tep kigwan Afo Chiyos i:
‘I-kan kod si-kam iriy esantoan a bindisjon a inkarik cha David a sigoradon metongpal.’ e
35 Kigwan to ngod sa-kin psalmo i:
‘Eg mo itolok a mebojok i angel na anak mon Esantoan.’ f
36 “Sema toon engibanagan iren ma esel, nat si David tep idi kincheng David a imag i piyan Afo Chiyos a a-magen to nonta inpanbiyag to, etiy. Et inbeka red bekaan iren ma afo-afo tho la et eboyok i angel to. 37 No diket sema engibanagan iren ma esel, si Jesus. Tep nat eboyok i angel to tep inpanpawil Afo Chiyos. 38 Aahi, piyan kon amtaen jo i kagol na imag Jesus, mebedin men mepekawanan i emiin a basol jo. 39 Tep kagol na imag Jesus, ibilang Afo Chiyos a maronong i emiin a naematid Jesus, nem nagwariy ibilang ton maronong kagol na pematian to bengat na dinteg Moses. 40 Isonga, tanchaani yo i sema kigwan iren ma profita nontan da, nat mepesamak cha si-kayon kigwan to i:
41 ‘Si-kayon naiyan-angja, matha yo
tep gwariy pesing ko na panbiyag jon
kasdaawan jo et metiy kayo.
Angken gwariy toon mengowan cha si-kayo
na kasdaaw a a-magen ko,
eg jo pati-patien i mepesamak.’ ” g
Setan bengat i kigwan Paul.
42 Idi man-aawas si Paul tan si Barnabas chiwa synagog, inbagaan iren ma too no onkowan ali cha mowan na sigonchen Sabbath say itoloy chiy chiyan itoro. 43 Idi manbebetik i emiin a too, gwariy chakel a ekiolop ired Paul tan si Barnabas. Sema echom, Hodjos ira, tan sema ngon echom, Gentiles iren naiyanchayaw cha Afo Chiyos. Ekitebal si Paul tan si Barnabas cha si-kara, et inbilin ched si-kara i memasig iren memiyal na kaasin Afo Chiyos.
44 Idi sigonchen Sabbath, chanchanin emiin a toon gwared ma siyodad, esa-sa-nop iren mekiki-ngel na esel Afo Chiyos. 45 Nem idi mita iren ma Hodjos i chakel a too, imapal ira. Et kiyontra chiy niyankonen Paul et kiyelkel-ingan cha. 46 Et si Paul tan si Barnabas, ema-men etoled iren iyan-esel a kigwan cha i “Mesepol a si-kayon Hodjos, si-kayo nin i engowanan mi na esel Afo Chiyos. Nem nat piyan jon iki-ngelan, isonga singen jowan kowisiy angel jon kigwan jo i nat maykari kayon may-i-kanan na biyag a nagwariy pengingkaan to. Isonga, bebtihan mi kayo, et onkowan kawin mengowan na mapteng a chamag ired ma Gentiles. 47 Tep sejay i kigwan Afo Chiyos cha si-kawin
‘Pinispis tahejon manbalin na silow para ired ma Gentiles
say ipaamta yoy pesing a maysalakan
ired tood emiin a soli na dobong.’ ” h
48 Idi inki-ngelan iren ma Gentiles i kigwan Paul, kaimdeng iren chili, et piyategan chen pasiyiy esel Afo Chiyos maypangkep na kaysalakanan. Et emiin a toon pinispis Afo Chiyos a may-i-kanan na biyag a nagwariy pengingkaan to, emati ira.
49 Et iyaygwadsak i esel Afo Chiyos cha intiron sahop. 50 Nem sema iren Hodjos a nat emati, iyawis chiy bibiin iyangkekayang i kasasaad chen naiyanchayaw cha Afo Chiyos tan dalekin naengibalnay chiwa siyodad say pedigathan ches Paul tan si Barnabas, et inpabtik cha ired ma sahop cha. 51 Nem si Paul tan si Barnabas, piyokpohan chiy depok cha seki ra say si-kathoy bancha i sema iren too, si-kara ngoy menongbat Afo Chiyos kagol na imag cha. Et kimowan si Paul tan si Barnabas cha siyodad na Iconium. 52 Et sema iren ematin gwared Antioch, banay i imdeng cha tan iyapno ngo ira na panakabalin na Ispirito Santo.