Sema Epaladon Diga-digat Iren Ma Emati
12
Nontan a timpo, inchogin Ari Herod a pedigathan i echom a emati. 2 Inpabono tho ngos James a ahin John na ispada. 3 Idi miten Herod i kaimdeng ira ma Hodjos kagol a imag to, inpadmet to ngos Peter. Epasamak iwan nonta timpon Piyasta na Tinapay a Nagwariy Para Debag To. a 4 Idi chinmet ches Peter, inpakalebos Herod. In-awat tos Peter cha epat a gropon sosolcharon san-a-pat cha sa-kin gropo, et binidin to ira i bantayan ches Peter. Tep sema planon Herod, no mekcheng miy Piyasta na Inda-bas na Anghil cha Hodjos, kowisen tos Peter cha sangoanan na chakel a too, et ipabono tho. 5 Et iyan-iyan si Peter cha kalebosan, nem sema ira ngon emati, inpasnek chen iyankararag cha Afo Chiyos a kinchow cha i tolongan tos Peter.Iyaybolos Si Peter Cha Kalebosan
6 Mimothok iwa dagwi asan akow na ketongpal na planon Herod a mengowis Peter say ipabono tho. Si Peter ngo, manjo-jo-kow cha kawa na chegwen kowadja a ekadinaan na chegwa. Gwara ngo iriy kowadjen manbanbantay chiwa sakepan na kalebosan. 7 Biglen gwariy iyanparang a anghil Afo Chiyos cha kad-an Peter, et esilowan iwa kwadto. Piyegpeg toy pasanan Peter say onbangon et kigwan na anghil i “Kanoim, akgwat ka.” Et iya-kal a chakos i kadined diwen Peter. 8 Et kigwan na anghil i “Panbaro tan pansapathos ka.” Nonta imag men Peter iwan, kigwan mowan na anghil i “Idibot moy ta-kep na barom cha angel mo et tened moak.” 9 Et tined Peter iwa anghil et bintihan chiy kalebosan. Nem si Peter ngo, nat amta tho i podnoy imag na anghil. Kin to i kokip bengat. 10 Et dima-bas si Peter tan anghil chiwa pilmiron kowadja et chiwa mowan cha maykadgwen kowadja, et mimothok ired ma pasbol cha sakepan na kalebosan a ontorong maled siyodad. Iyandohat bengat i pasbol et imawas ira. Idi sibi riy ngoro na pilmiron kalsara, biglen iyan-omas iwa anghil.
11 Et iyamtaan Peter i nat mankokokip, et kigwan to i “Emiin a epasamak cha si-kak, podno. Agpayson into-non Afo Chiyos i anghil to et tiyolongan toak say nat bonoen toak Herod tan say emiin a ngaaw a niyannamnamaa iren ma Hodjos i mepesamak cha si-kak, nat metongpal.”
12 Idi iyamtaan Peter i iyaydibchi wa, kimowan cha baliy Mary a inen John Mark. Chakel i toon esa-sa-nop a mankakararag chiwan. 13 Tiyogtog Peter iwa sakepan, et sema biin bagaen a si Rhoda i ngaran to, kimowan a metaen to no siyay mantogtogtog. 14 Nem idi piyeschian toy esel Peter, diningding ton dohatan i selbeng kagol na imdeng to. Iyamtik kitdin engigwanggwang ired ma echom i man-ak-akgwat si Peter cha sakepan. 15 Kigwan iren ma echom i “Ebang-ag ka!” Nem inpilit Rhoda i podno, et kigwan cha i “Anghil to emo man.”
16 Nem intolo-toloy Peter a timogtog, et idi diyohatan chiy selbeng, mita ra et iyasdaaw ira. 17 Et iyanchingjas si Peter cha si-kara say on-eket ira, et in-istoriya thod si-kara i inpasing Afo Chiyos cha si-kathon engibo-day cha kalebosan. Idi in-istoriya wen Peter iwan, kigwan to i “Kowan jo ma epasamak cha James tan sema iren echom a aahi tayo.” Et bimetik si Peter a kimowan cha sa-kin dogad.
18 Idi dadabi, iyanngalawngaw ira ma kowadja nonta iyamtaan cha i nagwares Peter cha kalebosan. 19 Et inpaanap Herod si Peter, nem nat mahasafol cha. Isonga, binistigal to ira ma kowadja, et inbilin to i bonoen cha ira. Idi iyakcheng iwan, bintihan Herod i Judea et kimowan cha siyodad na Caesarea a naiyan-iyanan to.
Sema Ingkathiy Herod
20 Idi man-iiyan si Herod cha Caesarea, bimonget a chili ired tothoon gwara ired siyodad na Tyre tan Sidon. Isonga, enganap ira na pesing chen mekisingpet cha Herod tep sema ilin naiyantorayan Herod, chiwan i naengalaan cha na nakiyakan cha. Isonga, sema inpasing cha, ekitebal nin ired Blastus a naengimanchal na baliy Herod say tolongan to ira. Et iyansa-ki iren kimowan cha Herod say mekisingpet cha si-katho.
21 Idi mimothok i akow a pinispis Herod a mekiaspol cha si-kara, iyanbaros Herod na naiyosal na arin timokkong cha throno tho, tan iyan-esel ired ma chakel a toon esa-sa-nop ira. 22 Et kimeljaw ira ma toon kigwan cha i “Nat too ma man-eesel, no diket chiyos!” 23 Biglen inpasahit na anghil Afo Chiyos si Herod tep nat kigwan to i si Afo Chiyos bengat i chejawen koma na tothoo. Et kiyakan na bihis i angel Herod et etiy.
24 Nem sema esel Afo Chiyos, timolo-toloy a naiyaygwadsak, tan sema bilang na toon iyanki-ngel niwan tan piyati ra, dima-dato.
25 Si Barnabas ngo tan si Saul, idi kincheng cha wiy iyayto-noan ired Jerusalem, imoli ira led Antioch, et intahin ches John Mark.