Sema In-istoriyen Peter Ired Ma Ematid Jerusalem
11
Sema iren apostolis tan ematin gwared emiin a doga-dogad cha Judea, chimag cha i piyati wa ngo iren ma Gentiles i esel Afo Chiyos. 2 Idi imoli dis Peter cha Jerusalem, sema echom a Hodjos a emati, inseg-ang cha tep kigwan cha i sema iren Gentiles a emati, mesepol a onoran chiy ogadi na Hodjos, angken kogit. 3 Kigwan cha i “Niyana simekep ked baliy na tothoon nat ekogit tan ekipangan ked si-kara?”4 Et in-istoriyen Peter cha si-kara i emiin a epasamak a kigwan to i 5 “Idi gwaraak cha siyodad na Joppa a mankakararag, gwariy inbiybiy Afo Chiyos cha si-kak babaen na singen kokip. Gwariy mitak a mansa-sa-kod alid dangit a singen banay a ketap a emangkaiba-jat cha epat a soyok to, et sima-kod cha kad-an ko. 6 Idi sini-neng kon chili, mitak iriy animal a ayop, sema iren animal a aathap, sema iren nakimorong, tan sema iren natimayab. 7 Et gwariy inki-ngelan kon esel a kigwan to i ‘Peter, akgwat ka. Panparti ka et pengan ka.’ 8 Nem kigwan ko i ‘Pangaasim, Afo, enchi. Tep ekak enga-engan na iyayparit ono ensekig cha dinteg mi.’ 9 Et sema esel a edafod dangit, imesel mowan a kigwan to i ‘Enog i kigwan i nat mengan ka na iyayparit a mekan iy inpadinis malen Afo Chiyos.’ 10 Emintedon epasamak iwan, et kimayang a emiin mowan cha dangit.
11 “Nontan seman a oras, mimothok i tedon dalekid ma baliy a naiyan-iyanan mi. Sema kapitan na sosolcharon gwared siyodad na Caesarea a si Cornelius i ngaran to, into-no tho iren mena-gway cha si-kak. 12 Et kigwan na Ispirito Santod si-kak i ekak manchegwa-chegwa komen mekiolop cha si-kara. Seja iren enem a aahi tayo, kiyadgwaan chaak ngo. Idi mimothok kawid Caesarea, kimowan kawi ded baliy Cornelius et simekep kawid man. 13 Et si Cornelius, in-istoriya tho i gwariy mita tho konon anghil a man-ak-akgwat cha baliy ton kigwan to i ‘Pengito-no ka na dalekin onkowan ired Joppa say ta-gwayen chiy sa-kin toon iyanngaran na Simon Peter. 14 Konen tod si-kam i mapteng a chamag maypangkep na pesing mon maysalakan, pati emiin a naiyan-iyan cha baliy mo.’ 15 Idi iyanchogiak a on-esel, sima-kod i Ispirito Santo ired ma tothoon esa-sa-nop chiwan a inges toy inpasing ton sima-kod si-kathayo nonta akow na Pintikostis. a 16 Et niyemnem ko ma kigwan Jesus nontan a ‘Si John a Naemonjag, nainbonjag tod tooy chanom, nem si-kayo ngo, ibonjag Afo Chiyos cha si-kayoy Ispirito Santo.’ 17 In-i-kan Afo Chiyos i Ispirito Santo ired ma Gentiles a inges toy inpangi-kan tod si-kathayon Hodjos nonta emati kiyed Jesu Criston Afo thayo. Isonga, siyaak ngon mengiparit na piyan Afo Chiyos a a-magen?”
18 Sema iren ematin Hodjos, idi inki-ngelan cha man, insalcheng chen inseg-ang si Peter. Et chijaw ches Afo Chiyos a kigwan cha i “Angken Gentiles, in-i-kan ngon Afo Chiyos cha si-kariy gwayen bebnekan chiy basol cha say may-i-kanan ira na biyag a nagwariy pengingkaan to.”
Sema Iren Ematid Antioch Cha Probinsiya Na Syria
19 Idi biyono ra wes Stephen, piyadigat cha ira ma echom a emati, et iyansi-si-jan ira. Sema iren echom a emati, kimowan ired Phoenicia, Cyprus, tan Antioch,bcd et idi manbibiyahi ira, inkaskasaba riy mapteng a chamag maypangkep na kaysalakanan, nem sema iren iyankasabaan cha, Hodjos bengat. 20 Nem sema ira ngon echom a ematin dalekin edafod Cyprus tan Cyrene, e kimowan ired siyodad na Antioch, et iyankasaba ngo ired ma Gentiles a kigwan ched si-kara i mapteng a chamag maypangkep Afo Jesus. 21 Et gwariy panakabalin Afo Chiyos ired ma daleki say chakel i ematid Jesus tan naengonod ired si-katho.
22 Sema iren ematid Jerusalem, idi chimag cha i emati wa ira ma Gentiles cha Antioch, into-no res Barnabas chiwan. 23 Idi mimothok si Barnabas cha Antioch, mita thoy imag Afo Chiyos para cha Gentiles chiwan kagol na kaasi tho, et kaimdeng. Et binidin to iren emiin i memasig ira komen mematid Jesus a Afo ra tan ainposoan ira komen mengonod. 24 Tep si Barnabas, mapteng i ogadi thon iyapno na panakabalin na Ispirito Santo, tan mahedsang i pamati tho. Isonga, chakel i toon iyayka-chom ired ma ematid Jesus. 25 Et kimowan si Barnabas cha siyodad na Tarsus say anafen tos Saul. 26 Idi sipol Barnabas si Saul, iyodop tod Antioch. Naekisa-nop ired ma iyangkematid man na mahatawen, tan naiyantoro ired chakel a too. Et chiwed Antioch a ren mengingaran iren ma emati na Kristiyano.
27 Nontan a timpo, gwariy echom a profiten mimothok cha Antioch a edafod Jerusalem. 28 Sa-kid si-karen iyanngaran na Agabus, imakgwat cha sangoanan iren ma emati, et inpadto thoy inpaamta na Ispirito Santod si-kathon kigwan to i gwara diy epaladon bithil a onmothok alid intiron dobong. Et sema inpadton ma profita, agpayson epasamak nonta timpon Claudius. f 29 Et sema iren ematid Antioch, niyemnem chen tolongan i echom chen ematin naiyan-iyan cha Judea. Engi-kan i sa-ki tan sa-ki na kebedinan chen i-kan. 30 Et in-i-kan chiy tolong ched Barnabas tan si Saul say itolod cha ired ma naengibalnay na ematid Jerusalem.