Sema Intoron Jesus Maypangkep Na Pankararag
11
Idi sa-kin akow, mankakararag si Jesus cha sa-kin dogad. Idi iyakcheng a iyankararag, kigwan na sa-kin disipolos to i “Afo, itoroi mo kawin mankararag a inges toy inpasing John a Naemonjag a iyantoro na disipolos to.” 2 Et kigwan Jesus cha si-kara i “No mankararag kayo, inges niyay i konen jo koma i:‘Awa, sapay koma mechejaw i ngaran mon esantoan.
Sapay koma onmothok aliy pantorayan mod dobong.
3 I-kani mo kawi na kakanen mi na gwiya-gwa-gwa.
4 Pekawanim i basol mi
tep napiyakawanan mi ira ma iyanbasol cha si-kawi.
Et enog i intolok a mesolisog kawi
say nat ma-gwak kawi na basol.’ ”
5 Kigwan Jesus mowan ired ma disipolos to i “No bilang i gwariy sa-kid si-kayon gwariy kajem mo, et onkowan ked baliy to no kawa na kalebiyan a konen mo i ‘Ahi, pangaasim i-kani moak na tedon tinapay 6 tep sema bisitak a iyanbiyahi, ahay mothok to et nagwariy ipahan kod si-katho.’ 7 Et sema kajem mod gwared sekep na baliy to, konen to i ‘Enogak i dinistirbo. Iyaytolbek maliy bengbeng, tan jimo-kow kawi wala na aanak ko. Isonga, nat mebedin a onbangonak a mengi-kan.’ 8 Konen kod si-kayo i angken seman, no engkay onbangon iwa kajem mo et i-kanan toka na mesepol mo, nat kagol na kajem mo, no diket kagol na naemasigan mon manbaga. 9 Isonga, konen kod si-kayo i pemasig kayon manbaga-baged Afo Chiyos, et i-kan toy jowan ibaga. Pemasig kayon mengena-enap, et sepolen jo ma jowan anafa. Pemasig kayo pay a menogtogtog na bengbeng et medokathan et say mahasekep kayo. 10 Tep sema naiyanbaga-baged Afo Chiyos, may-i-kanan. Sema naengana-anap, sepolen to. Tan sema naenogtogtog, medokathan i bengbeng para cha si-katho. 11 Tep si-kayon awa, no manbagay anak jo na paideng, ampet siya iy i-kanan jo na oleg? 12 No manbaga na ikdog, ampet siya iy i-kanan jo na kamajan? 13 Isonga, si-kayo wen mabesol, no amta yon mengi-kan cha anak jo na mapteng, mas sigoradon si Awejon gwared dangit, i-kan toy Ispirito Santo cha si-kayon manbaga!”
Si Jesus Tan Si Beelzebul
14 Nonta sa-kin akow, enagchag si Jesus na dimonyon engipaomel na sa-kin dahi. Idi bimo-day iwa dimonyo, mahaesel iwa dahi, et iyasdaaw a pasiya iriy too. 15 Nem gwariy echom a engomang a kigwan cha i “Si Beelzebul a afo na dimonyos, a si-kathoy naengi-kan na panakabalin Jesus a menagchag na dimonyos.” 16 Et gwara ngoy echom a piyan chen memaras Jesus, et inbagaan cha i mengemag na milagron mengipaneknek i edafoy panakabalin tod Afo Chiyos.
17 Nem amten Jesus i gwared nemnem cha, isonga kigwan tod si-kara i “No manbabakal i tood ili, mechechal iwa ili. Inges to ngod pamilja. No manbabakal ira, mechechal ira. 18 Inges to pay ngod Satanas. No towan chagchaga iriy echom ton dimonyos, say piyan ton a-seden, towan bakala ira, et mechechal i pantorayan to. Tep nakigwan jo i si Beelzebul i engi-kan na panakabalin kon menagchag na dimonyos. 19 No podno tan, siya wa ngarod i engi-kan na panakabalin na olop jon menagchag na dimonyos? Si-kara ngoy mengipaamta i iyankamali kayo. 20 Tep si Afo Chiyos i engi-kan na panakabalin kon menagchag na dimonyos, tan si-kathoy kaamtaan a mimothok med si-kayoy pantorayan Afo Chiyos.
21 “Si Satanas, may-arig cha mahedsang a toon iyan-almas na chakel. No bantayan toy baliy to, nagwariy mahakibot na kameng to. 22 Nem no gwariy toon mahedkedsang a memekal cha si-katho, maagwak si Satanas. Et sema almas a iyanchinelan to, ma-kal cha si-katho, et sema kameng to, maygwaris med echom. 23 Sema toon eg mayka-chom cha si-kak, towan kontraaak, tan sema toon eg menolong a meni-nop na kalniro, towan igwalak ira.”
Sema In-oli Na Dimonyod Too
24 Kigwan pay Jesus i “No on-ekal i dimonyod too, mangwasgwasgwas cha kedoga-dogad a nagwariy chanom a mengenap na dogad a pan-inanaan to. Tan no nagwariy sepolen to, konen to i ‘On-oliak gayam chiwa baliy a edafoan ko.’ 25 Et no on-oli di ma dimonyo, metaen to i esi-sian tan iyaysingpet da. 26 Onkowan men mena-gway na pithon dimonyos a mas mahedsel iy say si-katho, et onkowan ma iren mekiiyan chiwa too. Et sema too, mas kakaasi pay iy nonta pilmiro.”
27 Idi niyankonen Jesus ira man, sema sa-kin biin ekisa-nop cha echom a too, inpekes toy esel ton kigwan to i “Magesat i engianak cha si-kam tan iyansosod si-kam!” 28 Nem insongbat Jesus i “Ahow, nem mas magesat iwa toon mengi-ngel na esel Afo Chiyos et a-magen to!”
Piyan Na Tothoos Jesus A Mengibiybiy Na Kaskasdaaw A Sinjal
29 Idi manchachakel iriy tothoon manki-ki-ngel, kigwan Jesus i “Si-kayon too niman, ngaaw kayo. Nainpili-pilit jon maybiybiyan kayo na milagro. Nem nagwariy maybiybiy cha si-kayo, malaksid na sinjal bengat a inges toy epasamak cha Jonah a profita nonta bayag da. b 30 Tep sema epasamak cha Jonah, si-kathoy sinjal para cha toon gwared siyodad na Nineveh say amta ra i into-non Afo Chiyos si Jonah cha kad-an cha. Et sema mepesamak cha si-kak a Anak na Too, si-kathoy sinjal para cha too niman. 31 No akow ali na pengowis Afo Chiyos na tothoo, sema riyna na Sheba nonta bayag da, on-akgwat a mengipabasol cha si-kayo tep si-katho enan, edafo did kaaragwian a ilin manki-ngel na daing a kigwan Ari Solomon. Nem konen kod si-kayo i say ijed jay niman, ekayang iy say si Solomon, nem eg jo pay piyan a iki-ngelan i toro-toro tho. 32 No seman alin akow, sema iren i-Nineveh, on-akgwat iren mengipabasol cha si-kayo tep si-kara enan, nonta inki-ngelan chiy kaskasaben Jonah, iyanbabawi ira. Nem konen kod si-kayo i say ijed jay niman, ekayang iy say si Jonah, nem eg kayo pay laeng manbabawi.”
Sema Matha, May-arig Cha Silow Na Angel
33 Kigwan pay Jesus i “Nagwariy mengepoy na intohan, et sa-dinan to ono tangeban to, no diket ipa-tok tod kayang say sema iren toon onsekep chiwan, si-nengen chiy silow to. 34 Seta matham, may-arig cha silow na angel mo. No mapteng i peni-neng mo, esilowan i emiin a nemnem mo, nem no ngaawes ngoy peni-neng mo, enbolinget i nemnem mo. 35 Isonga, tanchaanim, nahol ni kin mo i esilowan i nemnem mo, nem enbolinget gayam. 36 Tep no koston esilowan i nemnem mon nagwaren polos i enbolinget, manihal a emiin i nemnem mon singen esilowan na intohan.”
Inseg-ang Jesus Ira Ma Pharisees Tan Mamaistoro Na Dinteg
37 Idi iyakcheng si Jesus a iyan-esel, tiya-gway na Pharisee say mekidihob cha si-katho. Et kimowan si Jesus chiwan et ekitokkong a mengan. 38 Iyas-asdaaw iwa Pharisee tep nat iyanbolo nin si Jesus asan mengan. c 39 Et kigwan Jesus cha si-katho i “Si-kayon Pharisees, inges jo ma toon engasang na awas na tasa tan beneg na pingkan, nem sema sekep to, iyapno na ensekig tep nainbili-biling jon naengamag na mapteng cha sangoanan na echom, nem ngaaw kayo tan napinidit jon mengeda na nat kegwen jo. 40 Si-kayon egwenggweng a too! Angel tayo aya bengat i piyarsowen Afo Chiyos? Eg to ngo piyarsowiy nemnem tayo? 41 Pemapteng joy nemnem jo say tolongan jo iriy iyangkebitheg, et koston edinis kayo wa.
42 “Nem kakaasi kayon Pharisees! Tep nasiningpet jon mengi-kan cha Afo Chiyos na maykasampolod ma gwared si-kayo, angken sema babechiseng a tanem a naiyay-amis na nakiyakan jo, nem nat a-magen joy kostod echom jo, tan nat ensemek jos Afo Chiyos. Mapteng no siningpet jon engamag iren ja mas ainportanti iy maramen intoloy jo pay a engemag na sigod.
43 “Kakaasi kayon Pharisees! Tep piyan jon ontokkong chiwa kamaptengan a tokkongan cha synagog tan piyan jo pay a mesalodoan no onkowan kayod kad-an na market.
44 “Kakaasi kayo! Tep inges joy dogad a iyaybekaan na iyangketiy a nat mepeschian et onkathin i tood man tep nat amta ra i simekig ira kagol na inkathin chiy dogad a iyaybekaan na iyangketiy.” d
45 Et kigwan na sa-kin maistoro na dinteg i “Maistoro, no konen mo ira tan cha Pharisees, mowan ibaing kawi ngo.” 46 Insongbat Jesus i “Kakaasi kayo ngon mamaistoro na dinteg! Tep sema bili-bilin a nainpilit jon patien na too, singen inges toy enbel-at a nainpasakbat jod too, nem eg kayo oncha-chen menakbat angken otik bengat.
47 “Kakaasi kayo! Tep naimag joy panchon iren ma profiten biyono iren ma afo-afo yo la. 48 No a-magen jo man, jowan ibiybiy i apolbaran joy ima-imag na afo-afo yo la. Tep si-kariy emono-bono iren ma profita, tan si-kayoy naengamag na panchon cha. 49 Isonga, si Afo Chiyos a Kalaingan, kigwan to nontan da i ‘Mengito-noak na profita tan apostolis cha Hodjos. Sema echom a profita tan apostolis, bonoen cha, tan sema echom ngo, pedigathan cha.’ 50 Et si-kayon too niman, mechosa kayo kagol na ingkathiy iren ma emiin a profita manipod nonta ingkaparsowa na dobong. 51 Mechosa kayo kagol na ingkathiy chen iyanchogid ingkabonon Abel ingkathod ingkabonon Zechariah a etiy cha dogad a gwared kawa na timplo tan altar cha bo-dayan to. Ahow, si-kayon toon sibibiyag niman, konen kod si-kayo i si-kayoy mechosa kagol na ingkathiy na emiin iren ma too.
52 “Kakaasi kayon mamaistoro na dinteg! Tep singen ingkal joy tolbek a naiyandohat na bengbeng a sakepan na toon piyan chen amtaen i podnon iyaysolat cha esel Afo Chiyos. Eg jo piyan a amtaen iwa podno, nem naekibiyang kayod tothoon piyan chen amtaen iwa podno.”