Sema Maypangkep Na Sabbath
12
Nonta sa-kin timpo na Sabbath a akow na pan-inana na Hodjos, man-aahad ires Jesus cha payow a etaneman na wheat. Sema iren disipolos to, aofa wa ira, isonga emekpek ira na dawes ton kiyothim cha et kiyakan cha. 2 Gwara ngo iriy Pharisees chiwan a eni-neng na imag chen kigwan ched Jesus i “Matham, nat niyanpatia iren ma disipolos moy dinteg tayon Hodjos a iyayparit i pan-ani na timpo na Sabbath.”3 Insongbat Jesus i “Sigoradon bisa yo ma inpasing David nonta aofa iren ma echom to. 4 Simekep si David chiwa baliy Afo Chiyos et ida tho ma tinapay a iyaytangdal cha Afo Chiyos a iyaypalobos cha dinteg i papari bengat i mengan niwan. Nem kiyakan ngorechan David, et in-i-kanan to ngoy echom to. 5 Tan sigoradon bisa yo ngod ma dinteg Moses i angken iyayparit pay i pan-obda na timpo na Sabbath, nat naiyanbasol iriy pari no naiyan-obda ired ma timplo na seman a akow. 6 Konen kod si-kayo i say ijed jay niman, ekayang iy say sema timplo. 7 Eg jo egwathan i iyaysolat cha esel Afo Chiyos a kigwan to i ‘Say piyan ko, mahaasi kayo, nat sema pengitangdal jod si-kak.’ No igwathan jo koma man, eg jo koma inbasolan ira ma eg iyanbasol. 8 Tep si-kak a Anak na Too, gwariy karebengan kon mengipalobos na ma-mag no timpo na Sabbath.”
Sema Dahin Otik I Diwa Tho
9 Idi imekal mes Jesus chiwan, kimowan chiwa synagog iren ma Pharisees et simekep. 10 Gwariy dahid man a otik i diwa tho. Gwara ngo pay iriy toon man-aanap na kagol na pengicharoman chen Jesus, isonga inbagaan cha i “Kigwan tod dinteg tayo i iyaypalobos i pemapteng tayoy mansekit no timpo na Sabbath?”
11 Insongbat Jesus i “No bilang i gwariy kalniro yon iya-kas cha ebot no timpo na Sabbath, sigoradon onkowan kayon chakos a mengiawas. 12 Ampet siya iy nat mas epateg i too iy say kalniro? Isonga, iyaypalobos chiwa dinteg tayon ma-mag i mapteng no timpo na Sabbath.” 13 Et kigwan tod ma dahi i “Iokjad moy diwam.” In-okjad toy diwa tho, et mimapteng men koston inges toy sa-kin diwa tho. 14 Idi iyakcheng ma iwan, iyamtik ira ma Pharisees say tabtabalen cha no nengo emoy pesing chen memonon Jesus.
Sema Bagaen A Pinispis Afo Chiyos
15 Si Jesus ngo, iyamta thoy nemnem iren ma Pharisees, isonga imekal chiwan. Iyonod na chakel a too, tan inpamapteng Jesus a emiin iriy mansekit. 16 Nem tiyengteng iren Jesus i eg cha ipaamta no siyes si-katho. 17 Epasamak iwan say metongpal i kigwan Isaiah a profita a:
18 “Ajay i bagaen kon pinispis ko.
Si-kathoy ensemek ko
tan naiyapnekan ko na olay.
Ito-nok iwa Ispiritok a man-iyan cha si-katho
say ipaamta thod emiin a too
ma pesing a maypachonong ired sangoanan Afo Chiyos.
19 Eg mekibakal, eg onkeljaw,
tan eg to ngo ipekes i esel tod kalkalsara.
20 Eg to ketnoan i do-bet a imoyeng
tan eg to ngo a-chepen i intohan a mankiyo-kiyop.
Inges niwan i a-magen to
ingkathod pengegwak ali na mapteng a pangkep Afo Chiyos. a
21 Et si-katho diy namnama na emiin a too.” b
Si Jesus Tan Si Beelzebul
22 Nonta sa-kin akow, gwariy dahin intolod ched kad-an Jesus a ekorab tan aomel tep iya-janan na dimonyo. Inpaawas Jesus iwa dimonyo, et mahasi-neng ma iwa dahi tan mahaesel. 23 Et emiin a too, iyasdaaw iren pasiya et inbaga ra i “Si-katho emoy Polin David a miyan sekera?”
24 Nem idi inki-ngelan iren ma Pharisees iwan, kigwan cha i “Si Beelzebul a afo na dimonyos, si-katho bengat i naengi-kan na panakabalin ton menagchag na dimonyos.”
25 Nem amten Jesus i gwared nemnem cha, isonga kigwan tod si-kara i “No manbabakal i tood ili, mechechal iwa ili. Inges to ngod sankaiidian tan pamilja. No manbabakal ira, mechechal ira. 26 Inges to ngod Satanas. No towan chagchaga iriy echom ton dimonyos, say piyan ton a-seden, towan bakala ira, et sema pantorayan to, mechechal. 27 Nakigwan jo i si Beelzebul i engi-kan na panakabalin kon menagchag na dimonyos. No podno tan, siya wa ngarod i engi-kan na panakabalin na olop jon menagchag na dimonyos? Si-kara ngoy mengipaamta i iyankamali kayo. 28 Tep sema Ispirito Santon naedafod Afo Chiyos i engi-kan na panakabalin kon menagchag na dimonyos, tan si-kathoy kaamtaan a mimothok med si-kayoy pantorayan Afo Chiyos.
29 “Si Satanas, inges toy mahedsang a toon naiyanbantay na baliy to. Nagwariy mahaskep cha baliy ton mengibot na kameng to, kampet bedoren cha nin. Et mebedin men ibetik chiy kameng to.
30 “Sema toon eg mayka-chom cha si-kak, towan kontraaak, tan sema toon eg menolong a meni-nop na kalniro, towan igwalak ira. 31 Isonga, konen kod si-kayo i say basol na too tan ngaaw a ese-esel to maypangkep na echom to, mebedin a mepekawanan. Nem sema ese-esel ton ngaaw maypangkep na Ispirito Santo, eg mepeka-pekawanan. 32 Angken siyen toon mengowan na ngaaw maypangkep cha si-kak a Anak na Too, mebedin a mepekawanan, nem angken ngon siyen toon mengowan na ngaaw maypangkep na Ispirito Santo, eg mepeka-pekawanan niman ingked ingka.
Sema Kejow Tan Sema Dawes To
33 “No ibilang jo i mapteng i dawes na kejow, sema kejow to ket, mapteng ngo chechan. Et no ibilang jo i ngaaw i dawes to, ngaaw ngo ma kejow to. Tep sema kaamtaan na kilasi na kejow, sema dawes to. 34 Si-kayon ngaawes a oleg! Ngoy pesing jon mengowan na mapteng iy ngaaw i gwared nemnem jo? Tep angken nengoy gwared nemnem na too, si-kathoy nabimo-day cha temi tho. 35 Sema mapteng a too, mapteng i naimag to tep mapteng i iyaykamid cha nemnem to. Nem sema ngon ngaaw a too, ngaaw ngoy naimag to tep ngaaw ngoy iyaykamid cha nemnem to. 36 Konen kod si-kayo i no akow ali na pengowis Afo Chiyos na tothoo, songbathan cha ngon emiin iwa ese-esel chen nagwariy kenchat to. 37 Tep no mapteng i konen jo, konen Afo Chiyos i maronong kayo. Nem no ngaaw i konen jo, konen Afo Chiyos i mechosa kayo.”
Inbaga Ra I Mengemag Si Jesus Na Milagro
38 Sema wa iren echom a mamaistoro na dinteg tan sema iren Pharisees, kigwan ched Jesus i “Maistoro, pangaasim, pengibiybiy ked si-kawi na milagron mengipaneknek i edafod Afo Chiyos i panakabalin mo.”
39 Insongbat Jesus i “Si-kayon too niman, ngaaw kayo tan eg jo in-ono-onong i kapateg jod Afo Chiyos. Nainpili-pilit jon maybiybiyan kayo na milagro. Nem nagwariy maybiybiy cha si-kayo, malaksid na sinjal bengat a inges toy epasamak cha Jonah a profita nonta bayag da. c 40 Tep si Jonah, iyan-iyan cha ekes na paideng a banay na tedon akow tan tedon dagwi. Et si-kak a Anak na Too, man-iyanak ngod kaybekaan ko na tedon akow tan tedon dagwi. d 41 No akow ali na pengowis Afo Chiyos na tothoo, sema iren i-Nineveh, on-akgwat iren mengipabasol cha si-kayo tep si-kara enan, nonta inki-ngelan chiy kaskasaben Jonah, iyanbabawi ira. Nem konen kod si-kayo i say ijed jay niman, ekayang iy say si Jonah, nem eg kayo pay laeng manbabawi. 42 No seman alin akow, sema pay a riyna na Sheba nonta bayag da, on-akgwat ngon mengipabasol cha si-kayo tep si-katho enan, edafo did kaaragwian a ilin manki-ngel na daing a kigwan Ari Solomon. Nem konen kod si-kayo i say ijed jay niman, ekayang iy say si Solomon, nem eg jo pay piyan a iki-ngelan i toro-toro tho.”
Sema In-oli Na Dimonyo
43 Intoloy Jesus a engiarig i “No on-ekal i dimonyod too, mangwasgwasgwas cha kedoga-dogad a nagwariy chanom a mengenap na dogad a pan-inanaan to. Tan no nagwariy sepolen to, 44 konen to i ‘On-oliak gayam chiwa baliy a edafoan ko.’ Et no on-oli di, metaen to i nagwariy naiyan-iyan chiwan, tan esi-sian tan iyaysingpet da. 45 Onkowan men mena-gway na pithon dimonyos a mas mahedsel iy say si-katho et onkowan ma iren mekiiyan chiwa too. Et sema too, mas kakaasi pay iy nonta pilmiro. Et inges niyay i mepesamak ired ja mangkahedsel a toon sibibiyag niman.”
Si Inen Jesus Tan Sema Iren Ahi Ton Daleki
46 Idi maramen man-eesel pay si Jesus cha tothoo, mimothok si ineto tan sema iren aahi ton dalekid ma kad-an to, et inpata-gway cha. 47 Gwariy engowan cha Jesus i “Igwa ires inam tan aahim a kainakgwat cha awas a piyan chaka konon tetbalen.”