Pikan Jesus I Epat A Dibon Too
8
Nontan a timpo, esa-sa-nop mowan i chakel a tood kad-an Jesus. Idi nagwara wiy kakanen cha, tiya-gway Jesus i disipolos ton kigwan to i 2 “Emangkaikaasiiak ired ja too tep gwara ired si-kak na tedon akow et nagwara wiy kakanen cha. 3 No pebtik ko ira iy eg ira nin engan, onkapsot emo la ired chalan tep sema iren echom, aragwiy edafoan cha.”4 Et insongbat iren ma disipolos to i “Ahow mango, nem ngoy pesing tayon mengeda na kakanen cha iy iyaydasin iyay a dogad a nagwariy bali-baliy chiyay?”
5 Inbagen Jesus i “Piyen tinapay i gwared si-kayo?”
Kigwan cha i “Pitho.”
6 Et inpatokkong men Jesus iriy too. Ida thoy pithon tinapay et iyansalamat cha Afo Chiyos. Piyetpet-ing ton in-i-kan tod disipolos to et in-ap-ap ched too. 7 Gwara pay iriy otik a babechis a paideng. Iyansalamat si Jesus kagol na paideng et inpaiap-ap to ngo. 8 Engan a emiin i too et iyapsel ira. Et kiyoskos iren ma disipolos i ebay-anan, et pino thoy pithon basket. 9 Say kabibidang na engan, chanchanin epat a dibon too.
Idi iyakcheng ma iwan, inpabtik Jesus i too, 10 et ekidogan a chakos cha disipolos tod bangken kimowan ired sahop na Dalmanutha.
Inbaga Na Pharisees I Mengemag Si Jesus Na Milagron Pamaneknek
11 Gwariy echom a Pharisees a kimowan cha kad-an Jesus, et inchogi ren mekidiskotil. Piyan chen memaras et inbagaan cha i mengemag na milagron mengipaneknek i si Afo Chiyos nowan i engito-no did si-katho. 12 Et ngima-jas si Jesus kagol na engos ton kigwan to i “Si-kayon too niman, niyana nainpili-pilit jon maybiybiyan kayo na milagro? Sejay a konen kod si-kayo, podnon nagwariy maybiybiy a milagrod si-kayo.” 13 Idi iyakcheng a kigwan Jesus iwan, bintihan to wa ira, et iyankeb-ong mowan chiwa bangka et bima-sil cha piig niwa baybay na Galilee.
In-arig Jesus I Toro-toro Na Pharisees Tan Ogadin Herod Cha Para Debag Na Tinapay
14 Iyaytompong a diningding na disipolos Jesus i mengitahin ira na tinapay a sikdop cha. Gwariy sa-sa-kin tinapay chiwa bangka. 15 Et tiyengteng men Jesus i disipolos to i “Tanchaani yoy para debag na Pharisees tan si Herod.” 16 Idi inki-ngelan iren ma disipolos iwan, iyankinowan ira i “Kigwan to emo man tep nagwariy intahin tayon tinapay.”
17 Amten Jesus i chiyan tabtabala, isonga kigwan to i “Niyana jowan tabtabalay kanagwara na tinapay? Eg jo pay laeng nin egwathan? Esa-dinan ayay nemnem jo? 18 Ithan i matha yo, nem eg kayo mahamatha. Ithan i ngila yo, nem eg kayo mahaki-ngel. Diningding jo aya ma epasamak nontan? 19 Idi piyetpet-ing ko ma dimen tinapay a inpahan kod ma dimen dibon too, piyen basket i injanan jo na ebay-anan?”
Kigwan cha i “Sawal na chegwa.”
20 “Et sema pithon tinapay a inpahan kod ma epat a dibon too, piya ngon basket i injanan jo na ebay-anan?”
Kigwan cha i “Pitho.”
21 Et kigwan men Jesus i “Et eg jo pay laeng egwathan?”
Ingkal Jesus I Korab Na Tood Bethsaida
22 Idi mimothok ires Jesus cha Bethsaida, gwariy sa-kin dahin ekorab a intolod ched kad-an Jesus. Ekiadok ira i isagpat toy diwa thod ma dahi say ma-kal i korab to. 23 Et chigwat Jesus iwa ekorab et inbalnay tod awas niwa siyodad. Chiyopdaan toy matha tho tan insagpat toy diwa thod si-katho. Et inbaga wen Jesus i “Gwariy mowan mathaa?” 24 Timangkak i ekorab a kigwan to i “Ahow, kowan mathaa i toon singen kejow a kainahad ira.” 25 Et insagpat men Jesus mowan i diwa thod matha tho. Et sini-neng na ekorab a pasiya. Koston iya-kal i korab to, et marigwes miy peni-neng to. 26 Et inpabtik men Jesus a kigwan to i “Pandiritso ken onbetik. Enog i sa-mad chiwa siyodad a edafoan tayo.”
Sema Kigwan Peter Maypangkep No Siyes Jesus
27 Et kimowan mes Jesus tan disipolos tod otik a siyo-siyodad cha sahop na Caesarea Philippi. Idi man-aahad ira, inbagaan Jesus i disipolos to i “Nengoy nakigwan na too maypangkep no siyaak?”
28 Et kigwan cha i “Nakigwan na echom i si-kam si John a Naemonjag. Nakigwan ngo na echom i si-kam si Elijah. Nakigwan ngo pay na echom i si-kam i sa-kin profita nonta bayag da.”
29 Et inbagen Jesus i “Nem no si-kayo ngo, ngoy nakigwan jo maypangkep no siyaak?”
Insongbat Peter i “Si-kam i Cristo.” a
30 Et binidin ma iren Jesus i eg cha polos igwanggwanggwang no siyes si-kathod angken siyen too.
Sema Pilmiron Inpangowan Jesus Maypangkep Na Ketiy To
31 Et iyanchogid ma timpo, iyantoro wes Jesus cha disipolos to maypangkep na mepesamak alid si-kathon kigwan to i “Si-kak a Anak na Too, mesepol a mandigathak a pasiya. Sema iren iyangkaama, aafo na papari, tan mamaistoro na dinteg, nat egwathen chaak et pebono raak, nem no maykatdon akow, manpawilak.” 32 Indiritson Jesus a engowan niwan, nem si Peter, ingwakdin to et inseg-ang tos Jesus. 33 Nem singab Jesus ira ma disipolos to, et inseg-ang to ngos Peter a kigwan to i “Betihi moak, Satanas! Tep seta mowan nemnema, nat setan i piyan Afo Chiyos, no diket sema piyan na too.”
Sema Panbiyag Na Toon Naematid Jesus
34 Et tiya-gway men Jesus i chakel a too tan disipolos to, et kigwan to i “No gwariy toon piyan ton mekika-chom cha si-kak, mesepol a ibiyang toy biyag to tan sakbathen toy koros to say may-odop cha si-kak. b 35 Tep sema toon menepi na biyag to, ma-tiw cha si-katho, nem sema toon metiy kagol na pamati thod si-kak tan pengowan to na mapteng a chamag, may-i-kanan na biyag a nagwariy pengingkaan to. 36 Tep nengoy kongkonaen na too no kokowaen ton emiin i kongkoned ja dobong iy ma-tiw i biyag to tan mechosa na ingked ingka? Nagwara! 37 Tep nagwariy mebedin a isa-dat na tood biyag to. 38 Niman a timpo, mabesol i tothoo tan eg cha naimag i nakigwan Afo Chiyos. Isonga, sema toon mengibaing cha si-kak a Anak na Too tan toro-torok, ibaing ko ngo no onkowanak alin edikmothan na nihal na karebengan tan panakabalin Awak, tan may-odop i esantoan a anghilis cha si-kak.”