6 Idi afil alin akow a Sabbath, simekep si Jesus cha synagog a mantoro. Gwariy dahid man a otik i gwanan a diwa tho. 7 Gwara ngo pay iriy echom a mamaistoro na dinteg tan Pharisees a chiyan bantayes Jesus say amtaen cha no pemapteng to ma too no timpo na Sabbath. Tep man-aanap ira na kagol a pengicharoman ched si-katho. 8 Nem amten Jesus i gwared nemnem cha, et kigwan tod ma dahin otik i diwa tho i “Gomali. Akgwat ked ja sangoanan mi.” Et imakgwat iwa dahi et kimowan chiwan.

9 Et kigwan Jesus ired ma echom i “Nengoy nemnem jo? Iyaypalobos chiwa dinteg tayon ma-mag i mapteng no timpo na Sabbath? A-magen tayo komiy mapteng ono ngaaw? Mena-cha na too ono memono na too?” 10 Sini-neng Jesus cha si-karen emiin et kigwan tod ma dahin otik i diwa tho i “Iokjad moy diwam.” In-okjad toy diwa tho et mimapteng men kosto. 11 Nem sema iren mamaistoro na dinteg tan sema iren Pharisees, bimonget iren pasiya, et iyantabtabal ira no nengoy a-magen ched Jesus.

12 Nontan a timpo, timiyed si Jesus cha chontog a mankararag. Gwared man na sandabin mankakararag cha Afo Chiyos. 13 Idi dadabi, tiya-gway to iriy disipolos to, et pinispis toy sawal na chegwed si-karen ngiyaranan to na apostolis. 14 Sema iren pinispis Jesus, si Simon a ngiyaranan to pay na Peter tan si Andrew a ahi tho, si James ni John, si Philip, si Bartholomew, 15 si Matthew, si Thomas, si James a anak Alphaeus, si Simon a iyanngaran na Zealot tep intakchel toy ili tho, 16 si Judas a anak James, tan si Judas Iscariot a enraidor Jesus.

17 Idi iyakcheng iwan, chimalong ires Jesus cha chekdan et imakgwat chiwan. Chakel i echom ton disipolos a esi-si-nop chiwan, pati chakel a toon edafo di ired Judea tan Jerusalem tan sema iren siyodad na Tyre tan Sidon a gwared kilig na baybay. Kimowan ired man say manki-ngel na itoron Jesus tan say a-kalen toy sahit cha. 18 Et sema iren mandigat tep iya-janan ira na dimonyos, chiyagchag Jesus ira ma dimonyos a gwared si-kara. 19 Et sema emiin a toon gwared man, inpahat chen mengapkap Jesus tep emangkedafoy panakabalin cha si-katho, et sema panakabalin toy engipamapteng cha si-karen emiin.

20 Et sini-neng Jesus ira ma disipolos ton kigwan to i:

“Magesat kayon iyangkebitheg tep mayka-chom kayod pantorayan Afo Chiyos.

21 “Magesat kayon aofa niman tep no sa-ki din akow, mepsel kayo wa.

“Magesat kayon mannanangis niman tep no sa-ki din akow, onngi-ngi kayo.

22 “Magesat kayo no owesen cha kayo na too, eg cha kayo egwathen, omangen cha kayo, tan chechalen chiy ngaran jo tep naemati kayod si-kak a Anak na Too. 23 No mepesamak ira man, panchadsak kayo tan panjaptok kayod pan-imdengan jo tep sema kongkonen iyay-ejan cha dangit para cha si-kayo, banay a pasiya. Tep sema pesing na toon manpadigat cha si-kayo, inges toy nainpasing iren ma afo-afo ra len naiyanpadigat na profita nonta bayag da.

24 “Nem kakaasi kayon babaknang tep igwat jo waliy mapteng na inpanbiya-biyag jo. Nagwara wiy a-daen jo.

25 “Kakaasi kayon iyapsel niman tep no sa-ki din akow, maopa kayo wa.

“Kakaasi kayon manngi-ngi-ngi niman tep no sa-ki din akow, on-engos tan onnangis kayo.

26 “Kakaasi kayon nachijaw na emiin a too tep inges niwan i nainpasing ngo iren ma afo-afo ra len iyanchaya-chayaw na naiyan-ite-itek a profita.”

27 “Nem si-kayon manki-ki-ngel, konen kod si-kayo i semek jo iriy naengontred si-kayo, tan amag joy mapteng ired ma toon naengowes cha si-kayo. 28 Chawat jod Afo Chiyos a bindisjonan to ira ma naemotbot kayo tan ikararagi yo ira ma naengipadigat cha si-kayo. 29 No gwariy menedpak na tamil mo, pesedpak mo pay i piig. No gwariy mengeda na ta-kep na barom, i-kan mo ngoy kamisitam. 30 No gwariy mengibaga na kompormid si-kam, i-kan mo, tan no gwariy mengeda na kokowam, enog i inpilit a ioli tho. 31 Et seta piyan jon a-magen na echom jod si-kayo, si-katho ngo komay a-magen jod si-kara.

32 “No sema bengat iren mahasemek cha si-kayo i ensemek jo, gwara ayay kongkona yo? Tep angken sema iren mabesol a too, ensemek cha ira ma mahasemek cha si-kara. 33 Et no sema bengat iren naengamag na mapteng cha si-kayo i na jo na mapteng, gwara ayay kongkonaen jo? Tep angken mabesol a too, naimag cha ngo tan. 34 Et no ibodoran jo bengat i toon amta yo i ioli chiy biyodod cha, gwara ayay kongkonaen jo? Angken mabesol a too, nainbodoran chiy echom cha tep sigoradoen chen ioli iren ma echom cha ma biyodod cha. 35 Nem sema a-magen jo ngo koma, semek jo ira ma naengontred si-kayo tan amag joy mapteng cha si-kara. Tan ipabodori yo ira, angken nat namnamaen jo i ioli chiy biyodod cha. Tep no setan i a-magen jo, banay i kongkonaen jo, et anak to kayon Afo Chiyos a Kahejangan. Tep si Afo Chiyos, mahaasi ired ma ngaaw a too tan sema iren toon nat naiyansalamat cha si-katho. 36 Mesepol a mahaasi kayon inges tos Awejon mahaasi.”

37 Intoloy Jesus a engowan i “Enog i kiyowis i echom jo say nat kowisen to kayo ngon Afo Chiyos. Enog i inbasolan i echom jo say nat ibasolan to kayo ngon Afo Chiyos, no diket pakawani yoy echom jo say pekawanan to kayo ngon Afo Chiyos. 38 I-kani yoy echom jo, et i-kanan to kayo ngon Afo Chiyos. Et say i-kan Afo Chiyos, mesolok pay tep singen mesedsed, mejakjak, et ma-choman ingkathod onjo-tat. Tep sema karakel na i-kan jo, ingesen to ngoy karakel na i-kan Afo Chiyos cha si-kayo.”

39 Et in-arig ngon Jesus i “Mebedin ayen ibalnay na ekorab i sa-kin ekorab? No a-magen to man, sigoradon ma-kas iren chegwed ebot. 40 Et nagwariy naiyan-achal a ekayang iy say maistoro tho. Nem no iyakcheng a etoroan, mebedin ngon may-inges chiwa maistoro tho.

41 “Apay nga si-nengen moy iyaytoning cha matha na echom mo iy eg mo si-nengen i balengen cha matham? 42 Tan apay nga konen mod echom mo i ‘Itolok mon a-kalen ko ta iyaytoning cha matham’ iy eg mo si-nengen i balengen cha matham? Si-kam a naengibili-biling a naengamag na mapteng, ekal mo nin itha balengen cha matham say marigwes i peni-neng mo, et mebedin a a-kalen mo wiy iyaytoning cha matha na echom mo.”

43 Kigwan pay Jesus i “Say mapteng a kejow, nat naiyandawes na ngaaw, tan say ngaaw a kejow, nat naiyandawes ngo na mapteng. 44 Naaamtaan i kilasi na kejow cha dawes to. Tep eg naaalay dawes na fig cha do-bet a iyasbithan, tan eg naaala ngoy dawes na grape cha mawini. 45 Inges to ngo ired ma too. Sema mapteng a too, mapteng i naimag to tep mapteng i iyaykamid cha nemnem to. Nem sema ngon ngaaw a too, ngaaw ngoy naimag to tep ngaaw ngoy iyaykamid cha nemnem to. Tep angken nengoy gwared nemnem na too, si-kathoy nabimo-day cha temi tho.”

46 Et kigwan pay Jesus i “Apay nga inngaran jod si-kak i Afo iy eg jo a-magen i nakigwan ko? 47 Sema toon onkowan cha kad-an kon mengi-ngel na konen ko et a-magen to, konen kod si-kayo no ngoy kay-arigan to. 48 May-arig chiwa toon engitegwen na baliy ton inko-ko thod batho say chiwan i kaybekaan to. Et idi bimarakan i kolos et into-kan to ma baliy, nat egwedgwed tep eki-det a iyatgwen. 49 Nem sema toon mengi-ngel na konen ko, nem eg to a-magen, may-arig chiwa toon engitegwen na baliy tod pithek. Nat inko-ko thod bathon mengitegwen na baliy tod man. Et idi bimarakan i kolos et into-kan to ma baliy, iyatgwang a chakos et kolpin echaral.”