3 “Magesat iriy mahaamta i mesepol ches Afo Chiyos tep mayka-chom ired pantorayan Afo Chiyos.

4 “Magesat iriy naimengos tep pekedsang Afo Chiyos i nemnem cha.

5 “Magesat iriy iyangkekombaba tep tegwiren chiy dobong.

6 “Magesat iriy mengamkam a pasiyen mengemag na piyan Afo Chiyos a mapteng tep tolongan iren Afo Chiyos.

7 “Magesat iriy mahaasi tep kaasian ngo iren Afo Chiyos.

8 “Magesat iriy naetofog i nemnem ched piyan Afo Chiyos tep metaen ches Afo Chiyos.

9 “Magesat iriy naengisingpet na tood echom to tep maybilang iren anak Afo Chiyos.

10 “Magesat iriy naepadigat tep naimag chiy piyan Afo Chiyos tep mayka-chom ired pantorayan to.

11 “Magesat kayo no omangen cha kayo na too, pedigathen cha kayo, tan man-ite-itek iren ibasolan cha kayo maypangkep na emiin a ngaawes tep naemati kayod si-kak. 12 Panchadsak tan pan-imdeng kayon pasiya tep sema kongkonen iyay-ejan cha dangit para cha si-kayo, banay a pasiya. Tep sema pesing na toon manpadigat cha si-kayo, inges toy nainpasing chen iyanpadigat na profita nonta bayag da.”

13 Intoloy Jesus a iyantoro i “May-arig kayod asin a mesepol na tood ja dobong. Nem no ondamsis i asin, ngoy pesing ton may-oliy namnam to? Nagwara wiy silbi tho, isonga maykepil et ikathin na too.

14 “May-arig kayo pay ngod silow a naenilow na nemnem na tothoo. No gwariy siyodad a iyaypa-tok cha chontog, nat may-emot tep inam-ay a mesi-neng. 15 Nagwara ngoy mengepoy na intohan et tangeban to, no diket ipa-tok tod kayang say emiin a gwared sekep na baliy, mahasi-neng ma ira. 16 Isonga, mesepol ngon mansilow kayo ngod sangoanan na tothoo say metaen chiy mapteng a naima-imag jo et say chejawen ches Awejon gwared dangit.”

17 Et kigwan men Jesus i “Enog i niyemnem i kimowanak alin a-kalen ko ma dinteg Moses tan sema kigwan iren ma profita, no diket kimowanak alin tongpalen a emiin i kigwan cha. 18 Sejay a konen kod si-kayo, podnon basta gwara pay i dangit tan dobong, nagwaren polos i mepokaw cha dinteg, sema kahedpengan a esel ono sema sa-kin tolnek, ingkathod metongpal men emiin. 19 Isonga, no gwariy eg to patien i angken enka-jas a bilin Afo Chiyos tan mengitoro na echom i angken eg cha patien, maybilang a kababaan cha pantorayan Afo Chiyos. Nem sema naemati niwa bili-bilin tan naengitoro na echom a patien cha ngo ira, maybilang a ekayang cha pantorayan Afo Chiyos. 20 Tep konen kod si-kayo i nat mebedin a mayka-chom kayod pantorayan Afo Chiyos ampet mas maronong kayo iy say sema iren Pharisees tan mamaistoro na dinteg.”

21 Intoloy men Jesus a engowan i “Inki-ngedan jo wala ma iyaybilin cha tothoo nonta bayag da a ‘Enog i bono. Sema memono, mekowis et mechosa.’ 22 Nem konen kod si-kayo i angken sema mengibonget na echom to, mekowis et mechosa. Sema memaing ngo na echom ton kigwan to i ‘Nagwariy kenkenchat mo,’ chosaen iren ma aafo. Tan sema mengowan cha echom to i ‘Mahedsel ka,’ may-ejan chiwa afoy na inpiyirno.

23 “Isonga, no gwariy itangdal mod timplon Afo Chiyos iy nemnemnemen mo i gwariy sahit na nemnem na echom mod si-kam, 24 ispam i tangdal mod sangoanan na altar, et kowan ka nin chiwa echom mon mekiadok say man-inawatan kayo wa. Et oli ka wen mengitangdal cha Afo Chiyos.

25 “No gwara pay i mengicharom ked korti, pekitbal ked si-kathon chakos iy mankokowan kayod korti, nahol ni iawat toked kowis, et sema kowis, iawat toked kowadja et say maykalebos ka. 26 Sejay a konen kod si-kam, podnon nat mebedin a maybolos ked kalebosan ingkathod bejaran mon emiin i othang mo.

27 “Inki-ngedan jo wala ma iyaybilin a ‘Enog i biibii.’ 28 Nem konen kod si-kayo i sema meni-neng na biin gwariy kamkam to, singen ekibii waled ma nemnem to. 29 Isonga, no seta gwanan a matham i panbasolan mo, ekal mo et ikepil mo. Tep magangkana no ekolangan i angel mo iy say kompliton mayba-tok cha inpiyirno. 30 Tan no seta ngon gwanan a diwam i panbasolan mo, ketnom et ikepil mo. Tep magangkana no ekolangan i angel mo iy say kompliton mayba-tok cha inpiyirno.

31 “Iyaybilin ngo nontan da i angken siyen dahin mengisi-jan na imbaliy to, mesepol a mengi-kan cha si-katho na solat a mengipaneknek i iyansi-jan ira. 32 Nem konen kod si-kayo angken siyen dahin mengisi-jan na imbaliy to ampet ekidahiy bii, panbalin to ma biin ekidahi no mengimbaliy mowan. Tan sema ngon dahin mengimbaliy niwa biin iyaysi-jan ket, ekibii.

33 “Inki-ngedan jo wala ma iyaybilin cha tothoo nonta bayag den ‘Enog i inbabawi ma siyangbaan jo, no diket tongpal jo ma siyangbaan jod Afo Chiyos.’ 34 Nem konen kod si-kayo i enog i sangsangben polos. Enog i insangba i ‘Sapay koma dangit i manmathaak’ tep si-kathoy natimokkongan Afo Chiyos a mantoray. 35 Enog i insangba i ‘Sapay koma dobong i manmathaak’ tep si-kathoy naiyan-inanaan na sekin Afo Chiyos. Tan enog i insangba i ‘Sapay koma Jerusalem i manmathaak’ tep si-kathoy siyodad na ekayang a Ari. 36 Angken seta toktok jo, enog i in-osal a isangba man tep angken sa-kin bowek na toktok jo, nat mebedin a panbalin jo na polaw ono etoling. 37 Mapmapteng no konen jo bengat i ‘ahow’ ono ‘enchi’ a nagwariy may-echom a sangba. Tep angken nengoy sangben inchoman jo, naedafod Satanas.

38 “Inki-ngedan jo wala ma iyaybilin nonta bayag da a ‘No gwariy menogat na matha na echom, mesogat ngoy matha tho. No gwara pay i mengkal na sangi na echom, ma-kal ngoy sangi tho.’ 39 Nem konen kod si-kayo i enog i bales no gwariy mengemag na ngaaw cha si-kayo. Seja pesing jo koma kitdi, no gwariy menedpak na gwanan a tamil mo, pesedpak mo pay i piig. 40 No gwara pay i mengicharom cha si-kam et a-daen to pay i barom, pa-dam ngo pay i ta-kep na barom. 41 Tan no gwariy memidit ken menakbat na kalka thod sa-kin kilomitro, sakbat mod chegwen kilomitro. 42 No gwariy mengibaga na kompormid si-kam, i-kan mo, tan no gwara pay i memodod na kompormi, ibolod mo.

43 “Inki-ngedan jo wala ma iyaybilin nonta bayag da a ‘Semek joy kakajem jo, nem owes jo iriy naengontred si-kayo.’ 44 Nem konen kod si-kayo i semek jo iriy naengontred si-kayo, tan ikararagi yo iriy naengipadigat cha si-kayo 45 say anak to kayon Awejon gwared dangit. Tep nainpabo-day Afo Chiyos i akow cha tothoon mapteng tan sema iren tothoon ngaaw. Nainpaoran tod dogad ira na maronong tan sema iren nat maronong. 46 Tep no sema bengat iren mahasemek cha si-kayo i ensemek jo, gwara ayay kongkona yo? Angken sema iren naedisjon a para singil na binis, naimag cha tan. 47 Tan no kajem jo bengat i natimbal jo, jowan amaga bengat i naimag na echom. Angken sema iren eg mahaamten Afo Chiyos, naimag cha ngo tan. 48 Isonga, mesepol a nagwariy kolang jon inges tos Awejon gwared dangit a nagwariy kolang to.”