Sema Kaskasaben John A Naemonjag
3
Idi maykapolo tan dimen tawen na inpantoray Tiberius Caesar na Roma, si Pontius Pilate i gobirnador na Judea, tan si Herod i naiyantoray na Galilee. Si Philip a ahin Herod, naiyantoray na sahop na Iturea tan Trachonitis, tan si Lysanias, naiyantoray na Abilene. 2 Si Annas tan si Caiaphas i kahejangan a pari. Nontan a timpo, si John a Naemonjag a anak Zechariah, kimowan cha dogad a nagwariy toon naiyan-iya-iyan. Nontan a gwared man, inpaamten Afo Chiyos i piyan ton a-magen John. 3 Et kimowan si John cha emiin a sahop chiwa chegwen kilig na kolos a Jordan, et iyankasabed man a kigwan to i “Panbabawi kayo et panbonjag kayo say pekawanan Afo Chiyos i basol jo.” 4 Sema inpasing John, iyaypadtod sola-solat Isaiah a profita nonta bayag den kigwan to i“Gwariy sa-kin toon
mankelkeljaw chiwa
dogad a nagwariy toon
naiyan-iya-iyan a
towan kona i
‘Isagana yoy chedanen
alin Afo.
Singpet joy chalan a
panchedanan to.
5 Penoi yoy ebaben dogad
tan panchekdan joy
chonchontog.
Idiritso yoy kolkolben
kalsara
tan ekal joy onsokbab cha
chalan.
6 Et si-nengen na emiin a too
ma into-non Afo Chiyos a
mengisalakan cha si-kara.’ ” a
7 Chakel i toon kimowan cha kad-an John a manpabonjag ired si-katho. Et kigwan John cha si-kara i “Si-kayon ngaawes a oleg! Siyay engowan i mahabetik kayod chosen Afo Chiyos no mebonjagan kayo? 8 Mesepol a maybiybiy cha panbiyag jo i agpayson iyanbabawi kayo na basol jo. Enog i kigwan ngo i bebtihan joy chosen Afo Chiyos tep si Abraham i afo yo la. Tep konen kod si-kayo i angken seja pay iren batho, mebedin a panbalin Afo Chiyos na poli-polin Abraham. 9 Sema chosen Afo Chiyos, may-arig cha gwasay a iyaysaganen menongba na kejow. Isonga, sema emiin a kejow a nat mandawes na mapteng, metongbed ma sengeg chen maykepil cha afoy.”
10 Et kigwan na tothoo i “No seman, nengoy a-magen mi koma?” 11 Insongbat John i “Sema gwariy chegwen baro tho, mesepol a i-kan toy sa-kid ma toon nagwariy baro tho. Tan sema gwariy kakanen to, mesepol a mengi-kan chiwa toon nagwariy kakanen to.”
12 Gwara ngo ira ma toon para singil na binis a kimowan cha kad-an John say manpabonjag ira. Et inbaga red John i “Maistoro, nengo komay a-magen mi?” 13 Kigwan John cha si-kara i “Enog i siyolohan i binis a inbilin ched si-kayo.”
14 Et inbaga ngo iren ma echom a solcharo i “Si-kawi ngay? Nengo komay a-magen mi ngo?” Kigwan John cha si-kara i “Enog i tiya-kot iriy too tan enog i tistigo na ite-itek maypangkep cha si-kara say manpilak kayo, no diket kepnek kayo na sowilcho yo.”
15 Kagol niwa kigwa-kigwan John, niyamnama iren ma too ma ikowan ali na Cristo, et niyemnemnem cha i “Si John emo ma Cristo, ono enchi?” 16 Nem kigwan John cha si-karen emiin i “Nainbonjag kod si-kayoy chanom say maybiybiy i iyanbabawi kayo na basol jo. Nem igwan aliy toon mankokowan alin mas manakabalin iy say si-kak et nat maykariak angken memasbas na iket na sapathos to. Say ibonjag to did si-kayo, Ispirito Santo tan afoy. 17 May-arig cha toon man-eg-egni na para ja-pi say maysi-jan i irik cha ja-pi. Sema irik, isekep tod agong to, nem sema ja-pi, ikepil tod ma afoy a nat ma-ma-chep.” 18 Gwara pay i chakel a echom a inbilin John chiwa inpankasaba tho na mapteng a chamag cha si-kara.
19 Et inseg-ang ngon John si Herod a naiyantoray na Galilee tep inimbaliy Herod si Herodias a sigod a imbaliy na ahi tho tan ima-imag toy echom a ngaaw. 20 Et in-inchoman Herod i ngaaw a imag to tep inpakalebos tos John.
Iyanbonjag Si Jesus
21 Idi aneng pay maykalebos si John a Naemonjag, biyonjagan toy chakel a too, et iyanpabonjag ngos Jesus. Idi ebonjagan mes Jesus, iyankararag, et idi mankakararag, edohatan i dangit, 22 et sema Ispirito Santon kalapatiy kasi-neng to, sima-kod ali ingkathod pima-tok cha si-katho. Et gwara waliy esel alid dangit a kigwan to i “Si-kam i ensemek kon pasiyen anak ko. Si-kam i panchadsahan kon chili.”
Sema Tonton Jesus
23 Idi inchogin Jesus a mantoro, chanchanin tedon poloy tawen to. Kin na tothoo i anak Joseph.
Si Joseph, anak Heli.
24 Si Heli, anak Matthat.
Si Matthat, anak Levi.
Si Levi, anak Melchi.
Si Melchi, anak Jannai.
Si Jannai, anak Joseph.
25 Si Joseph, anak Mattathias.
Si Mattathias, anak Amos.
Si Amos, anak Nahum.
Si Nahum, anak Esli.
Si Esli, anak Naggai.
26 Si Naggai, anak Maath.
Si Maath, anak Mattathias.
Si Mattathias, anak Semein.
Si Semein, anak Josech.
Si Josech, anak Joda.
27 Si Joda, anak Joanan.
Si Joanan, anak Rhesa.
Si Rhesa, anak Zerubbabel.
Si Zerubbabel, anak Shealtiel.
Si Shealtiel, anak Neri.
28 Si Neri, anak Melchi.
Si Melchi, anak Addi.
Si Addi, anak Cosam.
Si Cosam, anak Elmadam.
Si Elmadam, anak Er.
29 Si Er, anak Joshua.
Si Joshua, anak Eliezer.
Si Eliezer, anak Jorim.
Si Jorim, anak Matthat.
Si Matthat, anak Levi.
30 Si Levi, anak Simeon.
Si Simeon, anak Judah.
Si Judah, anak Joseph.
Si Joseph, anak Jonam.
Si Jonam, anak Eliakim.
31 Si Eliakim, anak Melea.
Si Melea, anak Menna.
Si Menna, anak Mattatha.
Si Mattatha, anak Nathan.
Si Nathan, anak David.
32 Si David, anak Jesse.
Si Jesse, anak Obed.
Si Obed, anak Boaz.
Si Boaz, anak Salmon.
Si Salmon, anak Nahshon.
33 Si Nahshon, anak Amminadab.
Si Amminadab, anak Admin.
Si Admin, anak Arni.
Si Arni, anak Hezron.
Si Hezron, anak Perez.
Si Perez, anak Judah.
34 Si Judah, anak Jacob.
Si Jacob, anak Isaac.
Si Isaac, anak Abraham.
Si Abraham, anak Terah.
Si Terah, anak Nahor.
35 Si Nahor, anak Serug.
Si Serug, anak Reu.
Si Reu, anak Peleg.
Si Peleg, anak Eber.
Si Eber, anak Shelah.
36 Si Shelah, anak Cainan.
Si Cainan, anak Arphaxad.
Si Arphaxad, anak Shem.
Si Shem, anak Noah.
Si Noah, anak Lamech.
37 Si Lamech, anak Methuselah.
Si Methuselah, anak Enoch.
Si Enoch, anak Jared.
Si Jared, anak Mahalaleel.
Si Mahalaleel, anak Cainan.
38 Si Cainan, anak Enos.
Si Enos, anak Seth.
Si Seth, anak Adam.
Et si Adam, anak Afo Chiyos. b