Sema Kaskasaben John A Naemonjag
3
Nontan a timpon gwares Jesus cha Nazareth, iyanparang si John a Naemonjag a iyankaskasabed sahop na Judea a nagwariy toon naiyan-iya-iyan 2 a kigwan to i “Panbabawi kayo na basol jo tep chanchani diy pantorayan Afo Chiyos.” 3 Tep si John a Naemonjag, si-katho ma engibanagan Isaiah a profita nonta kigwan to i:“Gwariy sa-kin toon
mankelkeljaw chiwa
dogad a nagwariy toon
naiyan-iya-iyan a
towan kona i:
‘Isagana yoy chedanen
alin Afo.
Singpet joy chalan a
panchedanan to.’ ” a
4 Say baron John a Naemonjag, aagwel na bowek na camel tan ebalkesan na kathat. Say nakiyakan to, choron tan chanom na dinowan. 5 Sema iren toon gwared Jerusalem tan sema iren naiyan-iyan cha emiin a siyodad na Judea tan dogad a iyay-askang cha kolos a Jordan, kimowa-kowan ired kad-an John. 6 Ingwanggwanggwang chiy basol cha, et biyonjagan iren John cha kolos a Jordan.
7 Nem idi miten John a Naemonjag i chakel a Pharisees tan Sadducees b a mankokowan ali chen manbonjag, kigwan to i “Si-kayon ngaawes a oleg! Siyay engowan i mahabetik kayod chosen Afo Chiyos no mebonjagan kayo? 8 Mesepol a maybiybiy cha panbiyag jo i agpayson iyanbabawi kayo na basol jo. 9 Enog i kigwan ngo i bebtihan joy chosen Afo Chiyos tep si Abraham i afo yo la. Tep konen kod si-kayo i angken seja pay iren batho, mebedin a panbalin Afo Chiyos na poli-polin Abraham. 10 Sema chosen Afo Chiyos, may-arig cha gwasay a iyaysaganen menongba na kejow. Isonga, sema emiin a kejow a nat mandawes na mapteng, metongbed ma sengeg cha et maykepil cha afoy.
11 “Nainbonjag kod si-kayoy chanom say maybiybiy i iyanbabawi kayo na basol jo. Nem igwan aliy toon mantetened alid si-kak a mas manakabalin iy say si-kak et nat maykariak a menakbat na sapathos to. c Say ibonjag to did si-kayo, Ispirito Santo tan afoy. 12 May-arig cha toon man-eg-egni na para ja-pi say maysi-jan i irik cha ja-pi. Sema irik, isekep tod agong, nem sema ja-pi, ikepil tod ma afoy a nat ma-ma-chep.”
Iyanbonjag Si Jesus
13 Idi engkay, edafo wa dis Jesus alid Galilee a kimowan cha kolos a Jordan say manpabonjag cha John. 14 Imanig si John a kigwan to i “Si-kak komay bonjagan mo. Niyana kimowan ka din bonjagan taha?”
15 Nem insongbat Jesus i “Tiwa et, angken anogot ka wa tep kosto no tongpalen tayo ma emiin a mapteng a piyan Afo Chiyos a ma-mag.” Et imanogot si John et biyonjagan to.
16 Idi ebonjagan mes Jesus, kima-jat a chakos cha chanom. Edohatan miy dangit, et mita thoy Ispiriton Afo Chiyos a inges toy kalapatin mansa-sa-kod ali ingkathod pima-tok cha si-katho. d 17 Et gwara waliy esel alid dangit a kigwan to i “Sejay i ensemek kon pasiyen Anak ko. Si-kathoy panchadsahan kon chili.”