Siyolisog Na Diablos Jesus
4
Idi ebonjagan mes Jesus, iyapno na panakabalin na Ispirito Santo. Et bintihan toy kolos a Jordan, et intoro-torong na Ispirito Santod ma dogad a nagwariy toon naiyan-iya-iyan. 2 Gwares Jesus chiwan na epat a polon akow, et siyoli-solisog na Diablo. Nontan a timpo, nagwariy kiyakan Jesus, et idi epalabas ira ma epat a polon akow, aofa wa.3 Isonga, kigwan na Diablod si-katho i “No agpayson si-kam i Anak Afo Chiyos, bilin mo ja batho i manbalin na mekan.” 4 Nem insongbat Jesus i “Iyaysolat cha esel Afo Chiyos i ‘Nat mekan bengat i panbiyagan na too.’ ” a
5 Idi iyakcheng iwan, iyodop na Diablos Jesus cha ekayang a dogad, et inbiybiy ton emiin i ili-ilid ja dobong na kemtang. 6 Et kigwan tod Jesus i “I-kan koy karebengan mon mantoray iren ja ili-ili tan kinabaknang cha. Tep iyay-i-kan a emiin ira ja ili-ilid si-kak, et mebedin a i-kan kod ma toon piyan ko. 7 No chejawen moak, kegwen mo din emiin ira jay.” 8 Nem insongbat Jesus i “Iyaysolat cha esel Afo Chiyos i:
‘Si Afo Chiyos a Afom, si-katho bengat i chejawen mo tan pansilbian mo.’ ” b
9 Idi iyakcheng ma, iyodop na Diablos Jesus cha Jerusalem, et inpaakgwat tod kahejangan a partid ma timplon kigwan to i “No agpayson si-kam i Anak Afo Chiyos, japtok ked sa-kod. 10 Tep iyaysolat cha esel Afo Chiyos i:
‘Bidinen Afo Chiyos iriy anghilis ton mengajo tan manbantay cha si-kam.’
11 Et iyaysolat ngod man i:
‘Egchian chaka say nat mesekithan i sekim cha batho.’ ” c
12 Insongbat Jesus mowan i “Ahow, nem iyaysolat ngod esel Afo Chiyos i ‘Enog i piyaras si Afo Chiyos a Afom.’ ” d
13 Kincheng na Diablon emiin i ekila-kilasin paras to, nem nat mebedin a panbesol tos Jesus. Isonga, bintihan na Diablo say mengenap na sa-kin gwaya thon memaras mowan.
Inchogin Jesus A Mantoro
14 Et imolis Jesus cha Galilee a gwared si-kathoy panakabalin na Ispirito Santo. Iyaychamag i maypangkep cha Jesus cha emiin a iyay-esop a siyo-siyodad. 15 Naiyantoros Jesus ired synagog et chijaw na emiin a too.
Sema Iren Toon Gwared Galilee, Eg Cha Igwat I Intoron Jesus
16 Et kimowan si Jesus cha Nazareth a bimadegan to. Idi mimothok i timpon Sabbath a akow na pan-inana na Hodjos, kimowan cha synagog tep si-kathoy nainpasing to na olay. Imakgwat a memesa na esel Afo Chiyos. 17 In-awat ched si-kathoy ekofikop a papil a iyaysolathan na kigwan Isaiah a profita nontan da. Et in-okjad Jesus iwa papil et sipol toy piyan ton besaen a kigwan to i:
18 “Gwared si-kak i Ispiriton Afo Chiyos
tep pinispis toak a mankasaba
na mapteng a chamag ired ma iyangkebitheg.
Into-no thoak alin mengowan cha tothoo i
maybolos ma ira ma iyangkebalod,
tan mahasi-neng ma ira ma iyangkekorab,
tan maydibchi wa ira ma mandigat
ired ma mengipadigat cha si-kara.
19 Into-no thoak ngo din Afo Chiyos a
mengipaamta i mimothok miy timpo
no isalakan Afo Chiyos i tothoo tho.” e
20 Idi iyakcheng a iyanbases Jesus niwan, kiyopikop to ma papil mowan a in-oli thod ma toon engiawat cha si-katho, et timokkong a mantoro. Et sema emiin a tood synagog, sini-neng chen chili. 21 Et kigwan tod si-kara i “Niman seja esel Afo Chiyos a inki-ngelan jo, etongpal cha sangoanan jo.”
22 Et chijaw na emiin a toos Jesus tan iyasdaaw ira tep ekanas a mayki-ngelan i kigwan to. Nem kigwan cha ngo i “Nat sejay ayay anak Joseph?” 23 Isonga, kigwan Jesus cha si-kara i “Sigoradon konen jod si-kak ira ja ese-esel a ‘Doktor, pemapteng mo nin i angel mo.’ Konen jo ngod si-kak i ‘Pengemag ked ja siyodad mo na milagron inges toy imag mo konod Capernaum a chimag mi.’ ”
24 Et intoloy Jesus a engowan i “Sejay a konen kod si-kayo, podnon nagwariy profiten naigwat na kaidian to. 25 Agpayson konen ko wed si-kayo i nonta timpon Elijah a profita, nat imoran na tedo tan kagachowen tawen, tan paladoy bithil chiwa intiron sahop. Et angken chakel iriy ebalod ja Israel, 26 nat into-non Afo Chiyos si Elijah a ontolong na angken sa-kid si-kara, no diket into-no thon ontolong na ebalod Zarephath cha sahop na Sidon. f 27 Tan angken chakel iriy toon paladoy kolid ched ja Israel nonta timpon Elisha a profita, nagwared si-kariy inpamapteng Afo Chiyos, no diket si Naaman bengat a i-Syria.” g
28 Idi inki-ngelan na emiin a tood ma synagog i kigwan Jesus, paladoy bonget cha. 29 Imakgwat ira et chiyagchag ched awas na siyodad. Et inkowan ched kilig na chepdas chiwa chontog a iyaytegwenan na siyodad cha say iekas cha. 30 37 Nem iyanchalan si Jesus cha kawa iren ma too et bimetik.
Enagchag Si Jesus Na Dimonyo
31 Idi iyakcheng iwan, chimalong si Jesus cha Capernaum a siyodad na Galilee. Nonta timpon Sabbath a akow na pan-inana na Hodjos, kimowan si Jesus a mantorod synagog. 32 Et iyasdaaw iriy too niwa inpasing ton iyantoro tep gwariy karebengan tod nakigwan to.
33 Gwara ngod ma synagog i dahin iya-janan na dimonyo. Kimeljaw a kigwan to i 34 “Jesus a i-Nazareth, niyana mowan pekibibiyangi kawi? Kimowan ka din mengomas kawi? Amtak no siya ka. Si-kam iwa Esantoan a into-no din Afo Chiyos.”
35 Et inseg-ang Jesus iwa dimonyon kigwan to i “Eket ka! Awas ka!” Inpa-kas na dimonyo ma dahid sangoanan na tothoo, et bintihan ton nat siyogathan to.
36 Sema toon gwared man, iyasdaaw iren emiin et iyankinowan i “Nengon kilasin ese-esel ira man? Tep gwariy karebengan tan panakabalin ton memidin angken dimonyos et bimetik ma ira.” 37 Et sema iren ima-imag Jesus, iyaychamag chiwa emiin a siyo-siyodad a gwared ma sahop to.
Inpamapteng Jesus I Chakel A Toon Mansekit
38 Et bimo-day si Jesus chiwa synagog et simekep cha baliy Simon. Iyaytompong a gwared man i inepon Simon a biin paladoy petang to. Isonga, ekikaasi ired Jesus say tolongan to. 39 Imaskang si Jesus chiwa mansekit, et inbilin to i ma-kal i petang to et iya-kal ma. Et bimangon men chakos iwa bii et pikan to ires Jesus.
40 Idi mandedenek maliy akow, emiin a toon gwariy echom chen mansekit a ekila-kilasiy sahit cha, intolod ched kad-an Jesus. Et insagpat Jesus i diwa thod sa-ki tan sa-kid si-kara et inpamapteng to ira. 41 Et sema ngo iren dimonyos, bintihan chiy chakel a toon injanan cha, et kimeljaw iren kigwan cha i “Si-kam iwa Anak Afo Chiyos!” Nem siyelkag iren Jesus, et nat intolok ton on-esel ira tep amta ra i si-kathoy Cristo.
Iyantoros Jesus Cha Judea
42 Idi kagwis ma, bimetik si Jesus et kimowan cha iyaydasin a dogad. Et ina-inap iren ma tothoo. Idi sibi ra, iyadok cha i nat onbetik. 43 Nem kigwan Jesus cha si-kara i “Mesepol a onkowanak cha echom a siyo-siyodad say ikasabaak i mapteng a chamag maypangkep na pantorayan Afo Chiyos. Tep si-kathoy kagol na engito-noan toak Afo Chiyos chiyay.” 44 Et intolo-toloy Jesus a iyankasa-kasaba ired ma synagog na Hodjos cha sahop na Judea.