Acꞌ Satcan, cꞌal Acꞌ Yul Yibꞌankꞌinal
21
Jix lawi jun tuꞌ,
catuꞌ jix wilon jun acꞌ satcan,
cꞌal jun acꞌ yul yibꞌankꞌinal.
Yutol jaꞌ bꞌabꞌel satcan cꞌal bꞌabꞌel yul yibꞌankꞌinal,
jix qꞌueyle eloj,
cꞌal yetoj jaꞌ mar,
cꞌamxa jaꞌ.
2 Jain Juan jin tiꞌ an,
jix wil jun sconobꞌ Dios,
tol asan Naj ey yet,
jaꞌton jun acꞌ Jerusalén.
Jix tit satcan,
catuꞌ jix eyoloj.
Caw watxꞌ,
jix waꞌxi el jaxca junoj ix ix tuxa chi too nupioj.
3 Catuꞌ jix wabꞌen yoc jun aw caw ip yoc bꞌey satcan,
jix yal jaxca tiꞌ:
—Ilaꞌla,
jaꞌ snail Dios eyecꞌ snan xol ánima tinaniꞌ.
Catuꞌ oj eecꞌ yetoj ebꞌ.
Oj oc ebꞌ sconobꞌoj.
Jaꞌcaw Dios oj ecꞌ snan xol ebꞌ,
catuꞌ oj oc sDiosaloj ebꞌ.
4 Catuꞌ oj joꞌole el yal sat ebꞌ yu Dios.
Jaꞌ yet tuꞌ cꞌamxa camich oj ocoj,
cꞌamxa okꞌil,
cꞌamxa cuscꞌulal,
cꞌamxa pax syaꞌilal.
Yutol masanil tzetyetal yet yalantoj,
jix ecꞌ can eloj,
ẍi.
5 Catuꞌ jix yalon jun chotan ey yul sdespacho tuꞌ ey jin an jaxca tiꞌ:
—Ilaꞌla,
jaꞌ masanil tzettaj yetal chi wakꞌ acꞌbꞌoj,
ẍi Naj.
Jix yalon pax ey jin jaxca tiꞌ:
—Tzꞌibꞌe wan lalan ja wabꞌen tiꞌ,
yutol caw yel wan kꞌane tiꞌ.
Chi skeꞌ ja waon oc wan kꞌane tiꞌ yipoj ja cꞌul,
ẍi Naj.
6 Jix lawi jun tuꞌ catuꞌ jix yalon pax ey jin jaxca tiꞌ an:
—Jix lawi masanil.
Jain ton bꞌabꞌel jin sattaj masanil tzettaj yetal,
catuꞌ slawubꞌal jin pax an.
Jaxca yakꞌon letra A yetoj Zeta,
quey jin ton tuꞌ.
Jaꞌ mac chi taj stiꞌ,
oj akꞌle jun jaꞌ yucꞌ ebꞌ,
jun jaꞌ snukꞌ jaꞌ chi akꞌwi kꞌinale tol ey cꞌal yin tobꞌalkꞌinal.
Oj akꞌle tet ebꞌ yin saꞌbꞌeal.
7 Jaꞌ ebꞌ chi akꞌon ganar yakꞌon techaoj,
oj ẍaꞌ masanil wan tiꞌ sattaj oj ey jin an.
Yutol oj jin oc sDiosaloj ebꞌ an,
catuꞌ oj oc pax ebꞌ wuninal oj an.
8 Jal pax ebꞌ comon cꞌal chi xiwi,
ebꞌ cꞌam chi yaoc scꞌul win an,
ebꞌ yaabꞌetaj sbꞌeybꞌal,
ebꞌ makꞌom cam ánima,
ebꞌ amul,
ebꞌ atxum,
ebꞌ chi yal sbꞌa tet tzet chi al-le oc diosal,
cꞌal ebꞌ lekꞌtiꞌ,
jaꞌ bꞌey snan xol kꞌakꞌ kꞌakꞌ chi nilxi ẍawwi yetoj azufre jun kꞌakꞌ jaxca yili jaꞌ mar,
jatuꞌ oj ẍaꞌ spaj ebꞌ.
Jaꞌton jun tuꞌ yet scaabꞌ camich,
ẍi Dios.
Acꞌ Jerusalén
9 Ey jun yetbꞌi ebꞌ jujwan ángel inen a jujebꞌ secꞌ nonaj yu syaꞌilal,
jix yalon ey jin jaxca tiꞌ:
—Titan.
Oj jin txꞌox jun ix oj nupoj ey jaach.
Jaꞌ ix oj oc yistil oj Naj Yuneꞌ Meꞌ,
ẍi jun ángel tuꞌ ey jin an.
10 Catuꞌ ey tzet jix xꞌox Naj Yespíritu Dios ey jin jaxca yin weyicheal.
Catuꞌ jix jin iꞌletoj sjolom jun miman wonan naat eyaoj yu jun ángel tuꞌ.
Jatuꞌ jix bꞌet xꞌox jun miman conobꞌ Jerusalén ey jin an,
jun sconobꞌ Dios,
jun jix tit satcan,
catuꞌ jix eyoloj.
11 Caw chi tzejeji jun conobꞌ tuꞌ yu sajkꞌinalil Dios.
Caw chi tzejeji jaxca junoj chꞌen chꞌen caw ey stool,
jaxca chꞌen jaspe.
Laan yili jaxca junoj nen,
chi kꞌaxbꞌo ecꞌ cu sat yul.
12 Joyan oc jun pim muro cimiento yinlaj jun conobꞌ tuꞌ,
naat eya steel smuroal tuꞌ,
lacawebꞌ spuertail eyocoj.
Junjun cꞌal ángel eyecꞌ bꞌey junjun spuertail tuꞌ.
Tzꞌibꞌebꞌil oc sbꞌi ebꞌ lacawebꞌ bꞌulan ebꞌ yicꞌaal Israel yinlaj spuertail tuꞌ.
13 Oxebꞌ spuertail yetcꞌulal bꞌey chi aol cꞌu,
oxebꞌ bꞌey norte,
oxebꞌ bꞌey sur,
catuꞌ oxebꞌ bꞌey yetcꞌulal bꞌey chi too cꞌu.
14 Lacawebꞌ mimej chꞌen ey can eytoj yichoj smuroal jun conobꞌ tuꞌ.
Tzꞌibꞌebꞌil oc sbꞌi ebꞌ ẍejabꞌ Naj Yuneꞌ Meꞌ tuꞌ slacawanil yin junjun wan chꞌen tuꞌ.
15 Jaꞌ jun ángel jix alon ey jin jaxca tiꞌ an,
iꞌbꞌil a jun oro echbꞌal yu.
Jaxca aa yili.
Yutol oj yeche jun conobꞌ tuꞌ,
spuertail,
cꞌal smuroal.
16 Jaꞌ jun conobꞌ tuꞌ,
laan cꞌal sbꞌisil svarail scanpaqꞌuil.
Jix yeche jun ángel tuꞌ yetoj yechbꞌal iꞌbꞌil a tuꞌ.
550 legua jix eloc junjun pacꞌ.
Laan cꞌal el yetoj steel.
17 Jix lawi jun tuꞌ,
catuꞌ jix yechen jantaj steel jun smuroal tuꞌ,
ey 78 vara jix elocoj.
Jaꞌ svara jun ángel tuꞌ,
laan jaxca svara ánima chi yakꞌbꞌalne.
18 Jaꞌ smuroal tuꞌ,
chꞌen jaspe cꞌal eloj.
Jal jun conobꞌ tuꞌ xin,
oro xacꞌal eloj,
laan xacꞌal yili jaxca chꞌen sajin nen.
19 Jaꞌ chꞌen mimej chꞌen ey can eytoj yichoj tuꞌ,
ecꞌal chꞌen chꞌen caw miman stool eyoc yin ebꞌ yu swatxꞌil yili.
Jaꞌ chꞌen bꞌabꞌel,
jaspe cꞌal eyocoj.
Chꞌen yet scaabꞌ,
safiro.
Chꞌen yet yox,
ágata.
Chꞌen yet scan,
esmeralda.
20 Chꞌen yet sjoꞌ,
ónice.
Chꞌen yet swaj,
cornalina.
Chꞌen yet sjuj,
crisólito.
Chꞌen yet swaxaj,
berilo.
Chꞌen yet sbꞌalon,
topacio.
Chꞌen yet slaon,
crisoprasa.
Chꞌen yet sjuslucꞌ,
jacinto.
Chꞌen yet slacaw,
amatista.
21 Jal smajil slacawebꞌal xin,
perla cꞌal el slacawebꞌal.
Junjun smajil junne perlail yei.
Jaꞌ scalleal jun conobꞌ tuꞌ,
oro xacꞌal eloj,
jaxca xacꞌal yili chꞌen nen chi kꞌaxbꞌo el cu sat yul.
22 Cꞌam sTemplo Dios bꞌey jun conobꞌ tuꞌ,
yutol eyecꞌ Naj Kaawil Dios yetoj Naj Yuneꞌ Meꞌ yul-laj masanil jun conobꞌ tuꞌ.
Jaꞌ Dios tuꞌ chi cꞌal skeꞌ masanil tzettaj yetal yu.
23 Jaꞌ jun miman conobꞌ tuꞌ,
cꞌam tzet chi oc yajan cꞌu yu,
cꞌam pax tzet chi oc yajan xꞌaaw yu.
Yutol jaꞌ sajkꞌinalil Dios chi tzejtaneni,
cꞌal sajkꞌinalil Naj Yuneꞌ Meꞌ tuꞌ.
24 Jaꞌ ebꞌ ánima a masanil nación,
oj ecꞌabꞌ ebꞌ yin sajkꞌinalil bꞌey jun conobꞌ tuꞌ.
Oj apnoj ebꞌ mimej yaaw tituꞌ,
catuꞌ oj yakꞌon swatxꞌcꞌulal ebꞌ tet Naj.
25 Jaꞌ spuertail jun miman conobꞌ tuꞌ,
cꞌam bꞌakꞌin oj majchele oj,
yutol cꞌualil xacꞌal tobꞌalkꞌinal.
Catuꞌ cꞌamxa akꞌbꞌalil.
26 Jaꞌ mac oj tit bꞌey junjun nación tuꞌ,
oj tit swatxꞌcꞌulal ebꞌ yetoj.
27 Cꞌam junoj tzet cꞌam swatxꞌil oj yun yul jun conobꞌ tuꞌ.
Cꞌam junoj mac chi unen tzet qꞌuixwiltaj oj oc tituꞌ.
Cꞌal mac chi yakꞌ lekꞌtiꞌal,
cꞌam junoj oj oc tituꞌ.
Asanne ebꞌ tzꞌibꞌebꞌil ey sbꞌi yul an libro yet kꞌinale tol ey cꞌal yin tobꞌalkꞌinal,
jaꞌton an yet Naj Yuneꞌ Meꞌ tuꞌ.