Jun Mil Abꞌil
20
Catuꞌ jix wilon an,
ey jun ángel jix eytej satcan,
jix eyol sat txꞌotxꞌ.
Iꞌbꞌil oc slaweal jun xabꞌ cꞌam yich yu,
yetoj jun chꞌen miman cadena.
2 Catuꞌ jix mitxꞌle jun noꞌ jaxca miman labꞌa,
jun chi yij yin dragón yu.
Jaꞌ jun noꞌ dragón tuꞌ,
jaꞌton jun jix yute sbꞌa labꞌail yet peyxa,
jaꞌton diablo,
Satanás.
Jun mil abꞌil jix pixle can ey yu jun ángel tuꞌ.
3 Jix kꞌojle eytoj yul jun xabꞌ cꞌam yich.
Catuꞌ jix smajchen can stiꞌ,
jix yaon can oc spixil stiꞌ,
yet watxꞌ cꞌamxa chi etnewi ánima bꞌey masanil nación,
masantaꞌcꞌal chi lawi jun mil abꞌil tuꞌ.
Jato yet oj lawoj jun mil abꞌil tuꞌ,
catuꞌ sowalil chi jajle atej niꞌojxa tiempo.
4 Catuꞌ jix wilon an,
ey wan despacholaj.
Chotan ey wan ebꞌ akꞌbꞌil yopiso snaꞌon oc yin yaawilal.
Catuꞌ jix wilon pax ebꞌ tzokꞌbꞌil el sjolom,
yu cꞌal tol yakꞌnaj sbꞌa ebꞌ testigoal yin Jesús,
catuꞌ yalnaj el skꞌane Dios ebꞌ.
Jaꞌ ebꞌ tuꞌ,
ma yiꞌey sbꞌa ebꞌ tet jun chi yij Noꞌ tuꞌ,
cꞌal tet yechel.
Ma ẍaꞌoc yechel ebꞌ yin spalan ma yin skꞌabꞌ.
Catuꞌ jix wilon an,
jix pitzcꞌu a ebꞌ,
jix yakꞌon yaawilal ebꞌ yetoj Cristo jun mil abꞌil.
5 Jal pax wanxa ebꞌ camnaj xin,
ma to pitzcꞌu a ebꞌ masantaꞌcꞌal jix lawi jun mil abꞌil tuꞌ.
Jaꞌ ebꞌ eyecꞌ yetoj Cristo,
jaꞌ ebꞌ tuꞌ bꞌabꞌel pitzcꞌunaj aoj.
6 Caw watxꞌ yet ebꞌ bꞌabꞌel oj pitzcꞌu a tuꞌ.
Asan Dios ey yet ebꞌ.
Cꞌam yalon yet jun yet scaabꞌ camich yibꞌan ebꞌ.
Oj akꞌle yopiso ebꞌ yin yakꞌomal xaambꞌal tet Dios yetoj tet Cristo.
Catuꞌ oj yakꞌon yaawilal ebꞌ yetoj Cristo tuꞌ jun mil abꞌil.
7 Jaꞌ yet oj tzꞌajna jun mil abꞌil tuꞌ,
catuꞌ oj jajle atej Satanás bꞌey eeytoj preso tuꞌ.
8 Pilan oj ecꞌ yetne ebꞌ ánima bꞌey masanil nación bꞌey yul yibꞌankꞌinal.
Oj yetne jun chi yij Gog,
yetoj jun chi yij Magog.
Catuꞌ oj yakꞌon yambꞌale oc sbꞌa ebꞌ tuꞌ yu naj Satanás tuꞌ yin jowal.
Ecꞌal ebꞌ soldado tuꞌ jaxca sbꞌisil yarenail stiꞌ jaꞌ mar.
9 Jaꞌ yet oj toj ebꞌ yin jowal tuꞌ,
caw oj noel sat txꞌotxꞌ yu ebꞌ.
Oj apnoj joyan ebꞌ bꞌey jun slugar ebꞌ yet xa Dios majbꞌilxa el yu,
cꞌal jun sconobꞌ camcꞌulnebꞌilxa yu.
Catuꞌ oj sbꞌejon eytej kꞌakꞌ Dios bꞌey satcan,
catuꞌ oj eyol yibꞌan ebꞌ soldado tuꞌ.
Pilan oj tzꞌaꞌ ebꞌ masanil.
10 Jaꞌ naj diablo,
jun jix etnen ebꞌ tuꞌ,
oj kꞌojletoj xol jun miman kꞌakꞌ chi nilxi,
calan yetoj azufre,
jaxca yili mimej mar,
bꞌey kꞌojbꞌil pax toj jun chi yij Noꞌ,
cꞌal jun chi tzꞌaj yaloc sbꞌa ẍejabꞌoj Dios.
Oj yabꞌ syaꞌil ebꞌ tituꞌ yet cꞌualil cꞌal akꞌbꞌalil yin tobꞌalkꞌinal.
Yet Chi Naꞌle Oc Yin Masanil Ebꞌ Ánima
11 Jix lawi jun tuꞌ,
catuꞌ jix wilon jun miman despacho caw saj,
yetoj jun Naj chotan ey yul.
Pilan jix el ebꞌ a sat txꞌotxꞌ cꞌal satcan sattaj jun chotan ey yul jun miman despacho tuꞌ.
Cꞌamxa bꞌey jix txeclo a ebꞌ.
12 Jix wilon pax yin masanil ebꞌ camnaj linan oc ebꞌ masanil sattaj Dios,
ebꞌ mimanbꞌanebꞌil cꞌal ebꞌ cꞌam yeloc apnoj.
Jix lawi jun tuꞌ,
jix jajle wan an libro.
Catuꞌ ey junxa an jix jajle pax oj,
an libro yet kꞌinale tol ey cꞌal yin tobꞌalkꞌinal.
Catuꞌ jix naꞌle oc yin tzettaj yetal jix el yunen junjun ebꞌ camnaj tuꞌ.
Jatacꞌalaꞌ tzet tzꞌibꞌebꞌil ey yul wan libro tuꞌ.
13 Catuꞌ jix yakꞌon entregar jaꞌ mar masanil camnaj xol jaꞌ.
Jacꞌalaꞌ pax naj yaawil camich,
cꞌal slugar ebꞌ camnaj,
pilan cꞌal jix yakꞌ entregar ebꞌ jantaj camnaj ey tituꞌ.
Catuꞌ jix naꞌle oc yin ebꞌ masanil.
Jatacꞌalaꞌ tzet jix el yunen junjun ebꞌ.
14 Jaꞌ camich tuꞌ,
cꞌal slugar ebꞌ camnaj tuꞌ,
jix kꞌojle cantoj snan xol jun miman kꞌakꞌ chi nilxi,
laan yili jaxca junoj miman mar.
Jaꞌ jun kꞌakꞌ tuꞌ,
jaꞌton jun tuꞌ chi yij yin scaabꞌ camich.
15 Masanil mac man tzꞌibꞌebꞌiloj sbꞌi yul an libro yet kꞌinale tol ey cꞌal yin tobꞌalkꞌinal tuꞌ,
jacꞌal tuꞌ jix kꞌojle cantoj ebꞌ.