19
Jix lawi jun tuꞌ,
catuꞌ jix wabꞌen yel yaw ebꞌ eyxa ecꞌ satcan.
Caw ip jix yun yalon ebꞌ jaxca tiꞌ:
Aleluya.
Jaꞌ cu Diosal,
jaꞌ jix akꞌon cu colbꞌanil.
Caw miman yeloc apnoj,
miman pax yeloc apnoj yipal Naj.
2 Yin caw yel cꞌal jichan chi yun snaꞌon oc Naj yin masanil.
Yutol jix naꞌle oc yin jun ix yaawil amul ix,
ix jix etnen el ánima yul yibꞌankꞌinal yu yamulal tuꞌ.
Jix akꞌle ecꞌ spaj tet ix yu Dios yu ebꞌ ẍejabꞌ jix smakꞌ cam ix,
ẍi ebꞌ.
3 Jix lawi tuꞌ,
catuꞌ jix yalon pax ebꞌ jaxca tiꞌ:
—Aleluya.
Cꞌam bꞌakꞌin oj oc tucan ya wacacoj smucꞌal stzꞌaꞌ jun conobꞌ tuꞌ,
ẍi ebꞌ.
4 Catuꞌ jix ey noan ebꞌ 24 anciano tuꞌ sat txꞌotxꞌ yetoj ebꞌ canwan tzetyetal iquis.
Catuꞌ jix yiꞌon ey sbꞌa ebꞌ tet Dios chotan ey yul sdespacho.
Jix cꞌoli yalon ebꞌ jaxca tiꞌ:
—Amén.
Aleluya,
ẍi ebꞌ.
5 Catuꞌ jix wabꞌen yoc jun kꞌane chi eltej bꞌey sdespacho Dios,
tol chi yal jaxca tiꞌ:
Jex yeynajil,
cꞌal jex miman je yeloc apnoj,
cꞌal jex yakꞌomal servil,
yetoj jex chex xiw tet Dios,
alwej watxꞌ kꞌane tet cu Diosal je masanil,
ẍi.
Skꞌinal Snupil Naj Yuneꞌ Meꞌ
6 Jix wabꞌen pax junelxa,
jaxca yel yaw yul snukꞌ ecꞌal ánima.
Caw chi nilili ebꞌ,
jaxca snilili junoj miman jaꞌ yet chi bꞌeyi.
Jaxca snilili sbꞌilwi cꞌu,
queytuꞌ yoc yul snukꞌ ebꞌ,
catuꞌ jix yalon ebꞌ jaxca tiꞌ:
Aleluya.
Yutol jaꞌ Naj Kaawil cu Diosal,
jix ẍaꞌel yich yakꞌon Yaawilal Naj.
Masanil tzetyetal chi skeꞌ yu Naj.
7 Tzalajonwej,
ey ojabꞌ cu tzalacꞌulal.
Kalwej watxꞌ kꞌane tet.
Yutol jix aapnoj yorail snupi Naj Yuneꞌ Meꞌ.
Jaꞌ yistil oj yiꞌ tuꞌ,
watxꞌ xa yei.
8 Jix akꞌle yaoc jun pichile caw watxꞌ sicꞌlebꞌil,
caw saj,
caw chi tzejeji yili,
ẍi ebꞌ.
Jaꞌ jun pichile caw saj tuꞌ,
chi yal yeloc apnoj swatxꞌ bꞌeybꞌal ebꞌ yet xa Dios.
9 Ey jun ángel jix alon ey jin jaxca tiꞌ an:
—Tzꞌibꞌe wan oj wal tiꞌ:
“Jaꞌ ebꞌ awtebꞌil yin jun miman loꞌbꞌe yu Naj Yuneꞌ Meꞌ,
caw watxꞌ yet ebꞌ,”
ẍi.
—Jaꞌ wan kꞌane tiꞌ,
caw yel,
catuꞌ yet Dios,
ẍi pax ey jin an.
10 Jix lawi jun tuꞌ,
catuꞌ jix jin ey kaan sattaj jun ángel tuꞌ,
yu wiꞌon ey jin bꞌa tet.
Jix yal pax ey jin jaxca tiꞌ:
—Manche ja wute jaxca tuꞌ,
yutol jain tiꞌ,
yakꞌomal jin pax servil Dios ja wetoj,
yetoj ebꞌ ja wuẍtaj tecꞌan chi yute sbꞌa yakꞌon sbꞌa testigoal yin tzet jix xꞌoxel Jesús.
Jaꞌ tet Dios,
jatuꞌ cha wiꞌey ja bꞌa,
yutol jaꞌ tzet jix xꞌoxel Jesús,
jichan.
Jaꞌ chi iptzen ebꞌ ẍejabꞌ Dios,
ẍi jun ángel ey jin an.
Jun Mac Eya Yibꞌan Jun Noꞌ Sajin Che
11 Catuꞌ jix wiloni,
tol jajan satcan.
Catuꞌ jix wilon jun noꞌ sajin che.
Jaꞌ jun eya yibꞌan,
Jijem cꞌal Caw Yel,
sbꞌi.
Yutol tool cꞌal chi yute sbꞌa yet chi naꞌle oc yin junoj mactxequel yu,
cꞌal yet chi akꞌwi pax jowal.
12 Jaꞌ sbꞌakꞌ sat,
laan jaxca xaj kꞌakꞌ.
Ecꞌal scorona eyoc yin sjolom.
Ey jun bꞌie tzꞌibꞌebꞌil oc yin,
catuꞌ asanne Naj yotaj jun bꞌie tuꞌ.
13 Jaꞌ spichil eyocoj bꞌonbꞌil yetoj chicꞌ,
Skꞌane Dios,
sbꞌi.
14 Tzajan oc ebꞌ soldado a satcan masanil yintaj.
Caw watxꞌ spichil ebꞌ eyocoj,
catuꞌ caw saj.
Cꞌam niꞌoj tzꞌil eyoc yin.
Ey cꞌal oc ebꞌ yibꞌan junjun noꞌ sajin che.
15 Eeltej jun espada caw eel yul stiꞌ jun mac bꞌey tzajan oc ebꞌ tuꞌ,
catuꞌ chi makꞌle ebꞌ nación yu yetoj ebꞌ eyoc acꞌulal yin Naj.
Jaꞌ oj oc Yaawiloj ebꞌ yetoj jun chꞌen kꞌojoche.a
Jaxca chi yun stecꞌle eltej yal an uva,
queytuꞌ oj utele ebꞌ yu.
Caw oj akꞌle syaꞌilal ebꞌ sicꞌlebꞌil yu sjowal scꞌul Dios.
Yutol jaꞌ Dios,
chi cꞌal skeꞌ masanil tzettaj yetal yu.
16 Jaꞌ yin spichil cꞌal yin sat xubꞌ,
jatuꞌ tzꞌibꞌebꞌil oc jun bꞌie tiꞌ:
“Sreyal ebꞌ rey,
sYaawil ebꞌ yaaw”.
17 Catuꞌ jix wiloni,
ey jun ángel linan oc bꞌey cꞌu.
Catuꞌ jix yalon yin ipal tet masanil noꞌ noꞌ chi ecꞌ jenenoj bꞌey snan satcan jaxca tiꞌ:
—Titanwej,
yambꞌawej oc je bꞌa yu jun miman loꞌbꞌe oj yakꞌ Dios.
18 Catuꞌ chi jul je chiꞌon ẍiꞌbꞌeal ebꞌ rey,
cꞌal ẍiꞌbꞌeal ebꞌ mimej syaawil ebꞌ soldado,
cꞌal ebꞌ mimej winaj.
Ẍiꞌbꞌeal noꞌ che,
cꞌal ẍiꞌbꞌeal ebꞌ eyoc yibꞌan noꞌ.
Ebꞌ yet sbꞌa,
ebꞌ akꞌom servil,
ebꞌ cꞌam yeloc apnoj,
ebꞌ miman yeloc apnoj,
oj je chiꞌ ẍiꞌbꞌeal ebꞌ masanil,
ẍi jun ángel tet noꞌ tzꞌiquin.
19 Catuꞌ jix wiloni,
eyecꞌ jun chi yij Noꞌ,
yetoj ebꞌ rey bꞌey sat txꞌotxꞌ,
cꞌal ebꞌ soldado.
Jix syambꞌa sbꞌa ebꞌ masanil,
yu yakꞌlen jowal ebꞌ yetoj jun eya yibꞌan che tuꞌ,
cꞌal yetoj ebꞌ soldado tzajan oc yintaj.
20 Jaꞌ jun chi yij Noꞌ tuꞌ,
jaꞌ jix bꞌabꞌi smitxꞌey ebꞌ yin eymanil.
Catuꞌ jix mitxꞌle pax jun chi tzꞌaj yaloc sbꞌa ẍejabꞌoj Dios,
jun txꞌoxnen wan milagro sattaj jun chi yij Noꞌ tuꞌ.
Jaꞌ wan milagro tuꞌ jix yakꞌbꞌalne yu yetnen ebꞌ jix ẍaꞌoc sbꞌi jun chi yij Noꞌ tuꞌ yin,
ebꞌ jix yiꞌey sbꞌa tet yechel.
Jaꞌ jun chi yij Noꞌ tuꞌ,
cꞌal jun jix tzꞌaj yaloc sbꞌa ẍejabꞌoj Dios tuꞌ,
iquisto ebꞌ,
catuꞌ jix kꞌojletoj ebꞌ xol jun miman kꞌakꞌ chi nilxi yetoj azufre,
jaxca xacꞌal yili junoj mar.
21 Jal wanxa ebꞌ xin,
jix akꞌle cam ebꞌ masanil yu chꞌen espada eeltej yul stiꞌ jun eya yibꞌan noꞌ che tuꞌ.
Catuꞌ jix no can scꞌul noꞌ tzꞌiquin masanil yu ẍiꞌbꞌeal ebꞌ tuꞌ.