—Jix eyqꞌuey jun miman conobꞌ Babilonia.

Jix eyqꞌueyi.

Jix oc snaoj ebꞌ pena espíritu.

Jix oc can slugar oj bꞌey chi syambꞌa sbꞌa junjun tujan ebꞌ tzꞌil espíritu.

Jix oc can sweyubꞌoj noꞌ tzꞌiquin caw yaabꞌetaj cꞌal cꞌam swatxꞌil,

cꞌal wan caw cꞌam chi yoche ánima.

3 Yutol jix oc masanil nación uqꞌuem anil yu svinoal,

jaꞌton yamulal.

Catuꞌ yu jix mulwi ebꞌ mimej yaaw sat txꞌotxꞌ yetoj.

Catuꞌ jix oc ebꞌ txonwom sat txꞌotxꞌ bꞌeomal yu,

yutol caw pekꞌ jun conobꞌ tuꞌ yetoj tzettaj yetal,

ẍi jun ángel tuꞌ.

4 Jix lawi jun tuꞌ,

catuꞌ jix wabꞌen yoc junxa aw bꞌey satcan,

jix yalon eytej jaxca tiꞌ:

—Jex jin conobꞌ,

elan tituꞌ,

yet watxꞌ man locanoj jex xol masanil tzet man watxꞌoj chi el yunen ebꞌ,

catuꞌ cꞌam chex oc yetoj ebꞌ yet oj jul syaꞌilal yibꞌan ebꞌ.

5 Yutol jaꞌ smul ix tuꞌ,

caw jix chꞌibꞌtoj bꞌululoj,

masantaꞌcꞌal jix aol bꞌulan satcan tiꞌ.

Catuꞌ jix naꞌle eytej spenail ix tuꞌ yu Dios.

6 Jaxca jix utele wanxa mactxequel yu ix,

cael ojabꞌ chi yun je yaon ecꞌ spaj yin ix yu tzet jix yunne.

Jaꞌ tzet eey yul jun svaso jix yakꞌ yucꞌ wanxa mactxequel,

cael ojabꞌ caw jow che yute je yakꞌon spaj tet ix.

7 Yu jix yiꞌa can sbꞌa ix sicꞌlebꞌil,

catuꞌ asan yin sbꞌeomal jix yaoc snaꞌbꞌal ix,

yuxan queytuꞌ che yute je yaon oc syaꞌtajil ix,

cꞌal scuscꞌulal ix.

Ilaꞌ,

tol jix snaꞌ ix yin spixan jaxca tiꞌ “Jain tiꞌ,

reina jin an.

Chotan jin bꞌey jin despacho.

Man jin laan oj jaxca junoj ix ix camnajxa yichamil.

Cꞌam bꞌakꞌin oj wil niꞌoj syaꞌilal,”

ẍi ix jix snaꞌon ix.

8 Yu jun tuꞌ,

yuxan junne cꞌual oj yun sjul syaꞌilal yibꞌan ix.

Caw oj cus ix.

Oj yakꞌ wail ix.

Oj nusle tzꞌaꞌ ix xol kꞌakꞌ,

catuꞌ oj cam ix.

Queytuꞌ oj yun sjul yibꞌan ix jaxca tuꞌ,

yutol miman yipal Dios Kaawil,

jaꞌ Naj oj naꞌon oc yin ix,

ẍi jun aw tuꞌ.

9 Jaꞌ ebꞌ mimej yaaw yul yibꞌankꞌinal jix mulwi yetoj jun chi al-le ixal tuꞌ,

locan ebꞌ yetoj sbꞌeomal.

Jaxa yet oj yilon ebꞌ ya wacacoj smucꞌal stzꞌaꞌi,

caw oj okꞌ ebꞌ.

Catuꞌ oj cꞌuyuyoj ebꞌ yu.

10 Naat ta oj tit linan ebꞌ yu xiwilal yu jun syaꞌilal tuꞌ.

Catuꞌ oj yalon ebꞌ jaxca tiꞌ:

—¡Ay!

¡Ay!

Okꞌbꞌalcꞌule jun miman conobꞌ Babilonia tiꞌ.

Caw miman yeloc apnoj jun conobꞌ tiꞌ,

junne pax txolan jix jul syaꞌtajilal,

ẍi a ebꞌ.

11 Oj cus ebꞌ txonwom yu,

catuꞌ oj okꞌ ebꞌ yu,

yutol cꞌamxa mac oj manon xon ebꞌ tuꞌ.

12 Jaꞌton wan tzettaj yetal chi xon ebꞌ tiꞌ:

Oro,

plata,

wan chꞌen caw ey stool,

perla,

an kꞌap caw sakꞌal yili,

an lino,

an sera,

an morado cꞌal an cajin.

Masanil la teꞌ sukꞌukꞌi yecꞌ sabꞌ,

masanil tzet chi waꞌxi yetoj marfil,

cꞌal teꞌ teꞌ caw caw,

bronce,

hierro,

cꞌal chꞌen mármol.

13 Ey pax canela,

yetoj wanxa teꞌ sukꞌukꞌi skꞌuxi cꞌal wan sukꞌukꞌi sabꞌ yet chi tzꞌaꞌi,

mirra,

cꞌal yal sukꞌukꞌi sabꞌ.

Ey pax vino,

aceite,

yetoj jarina caw watxꞌ,

cꞌal tiriw.

Ey pax noꞌ wacax,

ey la noꞌ meꞌ,

yetoj noꞌ che.

Ey pax carreta.

Tol tax ebꞌ eyoc yin yakꞌomaloj servil,

caxcꞌal ánima chi cꞌal xon ebꞌ,

cꞌamxa pax mac oj manon tinaniꞌ.

14 Oj yal ebꞌ txonwom tuꞌ tet ebꞌ a conobꞌ tuꞌ jaxca tiꞌ:

—Jaꞌ wan sat teꞌ chi yoche ocoj,

jix qꞌueyeloj.

Masanil sbꞌeomal,

cꞌal wan tzettaj yetal watxꞌ ey,

pilan jix qꞌueyel masanil junelne,

ẍi ebꞌ.

15 Jaꞌ ebꞌ jix txonon wan tzettaj yetal tuꞌ,

jix oc ebꞌ bꞌeomal yu jun conobꞌ tuꞌ,

naat ta oj can ebꞌ yu xiwilal yu jun syaꞌilal tuꞌ.

Oj cꞌuyuyoj a ebꞌ catuꞌ oj okꞌ ebꞌ yu.

16 Catuꞌ oj yalon ebꞌ jaxca tiꞌ:

—¡Ay!

¡Ay!

Okꞌbꞌalcꞌule jun miman conobꞌ tiꞌ.

Laan wal jaxca junoj ix ix tol caw watxꞌ spichil eyocoj.

Ey morado yili,

ey cajin yili.

Caw ey oro eyoc yin,

ey la wanxa chꞌen caw ey stool,

cꞌal wan chꞌen chi yij perla.

17 Tol junne txolan jix lawi el masanil sbꞌeomal tuꞌ,

ẍi ebꞌ oj yalon ebꞌ.

Masanil ebꞌ yaaw barco yetoj cꞌal ebꞌ chi ecꞌabꞌ yul teꞌ,

cꞌal ebꞌ chi mulna oc yin smitxꞌkꞌabꞌil barco tuꞌ,

yetoj ebꞌ chi mulna yul-laj jaꞌ mar,

naat jix can linan ebꞌ masanil.

18 Jaꞌ yet jix yilon ya wacacoj smucꞌal jun conobꞌ tuꞌ tzꞌaꞌi,

jix a yaw ebꞌ yin ipal jaxca tiꞌ:

—¿Tumi ey junojxa conobꞌ chi apni jaxca jun miman conobꞌ tiꞌ?

ẍi ebꞌ.

19 Jix stiẍatoj pojoj ebꞌ xol xil yaꞌ yu scuscꞌulal.

Caw jix michꞌcha scꞌul ebꞌ yokꞌi.

Catuꞌ chi cꞌuyuyi ebꞌ.

Catuꞌ chi swekꞌon el yaw ebꞌ jaxca tiꞌ:

—¡Ay!

¡Ay!

Okꞌbꞌalcꞌule jun miman conobꞌ tiꞌ.

Jix bꞌeombꞌi a jantaj ebꞌ ey sbarco yu.

Junne pax txolan jix lawi ey jun conobꞌ tiꞌ tinaniꞌ,

ẍi ebꞌ.

20 Tzalaanwej cꞌal yu jun conobꞌ tiꞌ jex a satcan,

yetoj jex ẍejabꞌ jex Jesucristo,

cꞌal jex ẍejabꞌ jex Dios,

yetoj je masanil jex yet jex xa,

tzalaanwej.

Yutol je yu,

yuxan jaxca tiꞌ jix yun snaꞌle oc yin jun conobꞌ tiꞌ yu Dios,

catuꞌ jix yakꞌon syaꞌilal.

21 Jix lawi jun tuꞌ,

ey jun ángel caw miman yipalil.

Jix yiꞌa jun miman chꞌen,

jaxca suyey junoj ẍꞌenal smolinoal tiriw.

Jix skꞌojon eytoj jun chꞌen tuꞌ xol jaꞌ mar.

Jix yalon jaxca tiꞌ:

—Queyton tuꞌ oj yun skꞌojle ey miman conobꞌ Babilonia.

Cꞌamxa bꞌakꞌin oj il-le yu ánima junelxa.

22 Cꞌamxa bꞌakꞌin oj abꞌle yoc arpa,

cꞌal flauta,

yetoj trompeta tituꞌ.

Cꞌamxa mac oj mulna tituꞌ.

Cꞌamxa bꞌakꞌin oj abꞌle yecꞌ suyuyoj junoj ẍꞌenal molino.

23 Cꞌamxa skꞌakꞌal tzejtebꞌal oj oc tituꞌ,

cꞌamxa bꞌakꞌin oj abꞌle swejeji ánima yin junoj kꞌin nupil tituꞌ.

Jaxca tuꞌ oj utele jun conobꞌ tuꞌ,

yutol jaꞌ jantaj ebꞌ txonwom yet yalantoj,

yel miman yeloc apnoj ebꞌ yintaj masanil ebꞌ ey bꞌey sat txꞌotxꞌ.

Yetoj pax oj,

yutol jix cꞌal etnewi ánima bꞌey junjun nación yu yatxumal ebꞌ.

24 Jaꞌ bꞌey jun conobꞌ tuꞌ,

jix iꞌle el ẍiqꞌuil ebꞌ ẍejabꞌ Dios cꞌal ẍiqꞌuil ebꞌ yet xa Dios.

Masanil jantaj ebꞌ makꞌbꞌil cam bꞌey masanil yul yibꞌankꞌinal,

oj oc ẍiqꞌuil ebꞌ smuloj jun conobꞌ tuꞌ,

ẍi jun ángel tuꞌ.