—Titan,

oj jin txꞌox jun miman syaꞌilal oj jul yibꞌan ix yaawil amul ix ey jaach.

Jaꞌ jun ix tuꞌ,

jaꞌton jun miman conobꞌ eyoc scawilal wan jaꞌ jaꞌ.

2 Masanil ebꞌ mimej winaj jix eyqꞌuey yin mul yetoj ix.

Catuꞌ jix etex el masanil sat txꞌotxꞌ yu ix.

Jaxca tol jix oc ebꞌ uqꞌuem anil yu yamulal ix jix yakꞌ yucꞌ ebꞌ jaxca vino,

ẍi ey jin an.

3 Catuꞌ jix txꞌoxle junxa tzetyetal ey jin yu Naj Yespíritu Dios jaxca yin weyicheal.

Catuꞌ jix jin yiꞌontoj jun ángel tuꞌ bꞌey jun cusiltaj txꞌotxꞌ.

Jatuꞌ jix bꞌet wil yin jun ix eya yibꞌan jun chi yij Noꞌ,

cajin yili.

Ecꞌal sbꞌi tzꞌibꞌebꞌil oc yin smimanil noꞌ.

Jaꞌ wan bꞌie tzꞌibꞌebꞌil oc tuꞌ,

caw chi bꞌawa yin Dios.

Jujebꞌ sjolom,

catuꞌ laonebꞌ yucꞌaꞌ.

4 Calan morado yetoj cajin yili spichil jun ix tuꞌ.

Ecꞌal wan chꞌen chi tzejeji eyoc yin.

Ey la oro,

ey la wan chi yij perla,

cꞌal wanxa chꞌen caw ey stool eyoc yin.

Mitxꞌbꞌil a jun oro secꞌ yu.

Nonaj jun secꞌ tuꞌ yu wan tzet cꞌam chi ẍaꞌ scꞌul Dios,

jaꞌton spenail yamulal ix.

5 Tzꞌibꞌebꞌil oc jun bꞌie tol cꞌam mac otajnen tzet ẍi yin spalan ix,

jaxca tiꞌ yoc jun bꞌie tuꞌ:

“Jaꞌ miman Babilonia,

xutx ebꞌ ix amul ix masanil.

Xutx pax masanil tzet man watxꞌoj yul yibꞌankꞌinal,”

ẍi yeocoj.

6 Catuꞌ jix wilon an,

caw uqꞌuem an ix yu ẍiqꞌuil ebꞌ yet xa Dios,

ebꞌ jix smakꞌ cam ix,

yu cꞌal tol jix yakꞌ sbꞌa ebꞌ testigoaloj yin Jesús.

Caw jix qꞌueya jin cꞌul yet jix wilon jun tuꞌ an.

7 Yu jun tuꞌ,

yuxan jix yal jun ángel tuꞌ ey jin jaxca tiꞌ:

—¿Tzet yuxan caw chi qꞌueya ja cꞌul ja wilon jun tiꞌ?

Oj wal ey jaach tzet chi yal yeloc apnoj jun ix tiꞌ,

cꞌal jun chi yij Noꞌ bꞌey eya ix tol ey jujebꞌ sjolom,

cꞌal laonebꞌ yucꞌaꞌ tuꞌ.

8 Jaꞌ jun chi yij Noꞌ jix ja wil tuꞌ,

ey cꞌaltaꞌ ecꞌ peyxa,

cꞌamxa pax tzet eyecꞌ tinaniꞌ.

Oj a pax jul junelxa yul jun xabꞌ cꞌam yich,

yet cꞌamto chi too bꞌey chi qꞌueyle el yin junelne.

Jaꞌ ánima tol man tzꞌibꞌebꞌiloj sbꞌi yul an libro yet kꞌinale yet cꞌamto chi waꞌxi yul yibꞌankꞌinal,

caw oj qꞌueya scꞌul ebꞌ yet oj yilon ebꞌ jun chi yij Noꞌ tol eyxa cꞌaltaꞌ ecꞌ yet peyxa tuꞌ.

Yutol caxcꞌal cꞌam chi ecꞌ tinaniꞌ,

oj jul pax yet scaelal.

9 Jaꞌ mactxequel jelan oj naꞌcha el wan tiꞌ yu.

Jaꞌ jujebꞌ sjolom jun chi yij Noꞌ tuꞌ,

yechel jujebꞌ wonan bꞌey chotan atoj ix amul ix tuꞌ.

10 Yechel pax jujwan mimej yaaw.

Jowan ebꞌ yaaw tuꞌ jix ecꞌ eloj.

Ey jun eyoc yaawilal tinaniꞌ.

Catuꞌ ey junxa tol to oj oc yaawilal.

Jaꞌ yet oj jul junxa tuꞌ,

manxa mimanoj tiempo oj yakꞌ yaawilal.

11 Jaꞌ jun chi yij Noꞌ eyecꞌ yet peyxa tuꞌ,

tol cꞌam chi ecꞌ tinaniꞌ,

jaꞌ oj oc yet swaxaj yaawilal yetbꞌi sbꞌa yetoj ebꞌ jujwan tuꞌ.

Oj lawoj tuꞌ,

catuꞌ oj toj bꞌey oj qꞌueyle el yin junelne.

12 Jal pax laonebꞌ yucꞌaꞌ jun chi yij Noꞌ tuꞌ,

yechel laonwan mimej yaaw cꞌamto chi ẍaꞌel yich yakꞌon yaawilal.

Oj akꞌle cꞌal pax yopiso ebꞌ yetoj jun chi yij Noꞌ tuꞌ,

catuꞌ oj yakꞌon yaawilal ebꞌ yin txenne tiempoal yetoj.

13 Jaꞌ ebꞌ laonwan tuꞌ,

oj ẍaꞌle sbꞌa snaꞌbꞌal ebꞌ,

yet oj yakꞌon yaawilal ebꞌ tuꞌ.

Catuꞌ oj yakꞌon yipal ebꞌ cꞌal yopiso tet jun chi yij Noꞌ tuꞌ.

14 Oj yakꞌle jowal ebꞌ yetoj Naj Yuneꞌ Meꞌ,

jaꞌ Naj oj akꞌon ganar ebꞌ.

Yutol jaꞌ jun tuꞌ,

sYaawil ebꞌ yaaw,

catuꞌ Sreyal ebꞌ rey.

Jaꞌ ebꞌ eyecꞌ yetoj Naj Yuneꞌ Meꞌ tuꞌ,

jaꞌton ebꞌ awtebꞌil el cꞌal ebꞌ sicꞌbꞌil el yu Dios,

yetoj ebꞌ jijem tet,

ẍi jun ángel tuꞌ ey jin an.

15 Jix lawi tuꞌ xin,

catuꞌ jix yalon pax jun ángel ey jin jaxca tiꞌ:

—Jaꞌ wan jaꞌ jaꞌ eyecꞌ bꞌey chotan atoj ix amul ix tuꞌ,

yechel conobꞌ cꞌal yechel nación,

yechel ánima txꞌoj txꞌoj stiꞌ cꞌal yechel ebꞌ txꞌoj txꞌoj icꞌaaleal.

16 Jaꞌ laonebꞌ yucꞌaꞌ jun chi yij Noꞌ jix ja wil tuꞌ xin,

jaꞌton ebꞌ laonwan mimej yaaw,

oj oc ebꞌ acꞌulal yin ix amul ix tuꞌ.

Oj yiꞌecꞌ ebꞌ masanil stzetyetal ix.

Oj can tꞌiran ix yu ebꞌ.

Oj chiꞌle eytoj smimanil ix yu ebꞌ,

catuꞌ oj nusletoj ix.

17 Yutol jaꞌ Dios jix akꞌon yoche ebꞌ jaxca chi yoche scꞌul Dios,

yu jun tuꞌ,

yuxan jun laan ẍaꞌlen sbꞌa snaꞌbꞌal ebꞌ yunen jaxca tuꞌ.

Catuꞌ jix akꞌle pax yopiso ebꞌ tet jun chi yij Noꞌ tuꞌ,

yu yunen el tzet albꞌilxa taꞌ yu Dios.

18 Jaꞌ ix jix el tuꞌ,

yechel jun miman conobꞌ chi akꞌon mandar ebꞌ yaaw bꞌey yul yibꞌankꞌinal.