—Asiꞌwej,

secwej ey tzetyetal eey yul jujebꞌ secꞌ tuꞌ sat txꞌotxꞌ.

Jaꞌ sjowal scꞌul Dios eey yul,

ẍi.

2 Catuꞌ jix too jun bꞌabꞌel ángel tuꞌ,

jix bꞌet secon ey tzet eey yul secꞌ tuꞌ sat txꞌotxꞌ.

Catuꞌ jix pitzcꞌu a wan mimej yaꞌbꞌil yin smimanil jantaj ebꞌ bꞌey eyoc yechel jun chi yij Noꞌ tuꞌ,

catuꞌ chi yiꞌon pax ey sbꞌa ebꞌ tet yechel.

Caw pena wan yaꞌbꞌil tuꞌ,

catuꞌ caw yaꞌ.

3 Jix lawi tuꞌ,

jix secon ey jun yet scaabꞌ ángel tzet eey yul secꞌ yibꞌan jaꞌ mar.

Jix oc jaꞌ mar tuꞌ chicꞌal jaxca ẍiqꞌuil camom.

Yu jun tuꞌ,

yuxan jix cam masanil tzet eeytoj xol-laj jaꞌ.

4 Catuꞌ jix secon ey jun yet yox ángel tzet eey yul secꞌ yibꞌan jaꞌ mimej jaꞌ,

cꞌal yibꞌan snukꞌ jaꞌ.

Jix oc pax jaꞌ chicꞌal.

5 Catuꞌ jix wabꞌen an,

jix yalon jun ángel yaawil jaꞌ jaꞌ jaxca tiꞌ:

—Jaach jin Dios,

asan jaach jichan jaach.

Ey jaach ecꞌ tinaniꞌ,

ey jaach cꞌaltaꞌ ecꞌ yet tax yichbꞌanil.

Jichan cꞌal jix yun ja naꞌon oc yin ebꞌ yetoj jun tzet jix el ja wunen tiꞌ.

6 Yutol jaꞌ ebꞌ ánima,

jix makꞌon el ẍiqꞌuil ebꞌ ja wet,

cꞌal yetoj ebꞌ ja chejabꞌ.

Yu jun tuꞌ,

yuxan asan chicꞌ cha wakꞌ yucꞌ wan ánima tiꞌ tinaniꞌ.

Yuxan smoo ton queytuꞌ chi elol yibꞌan ebꞌ,

ẍi jun ángel tuꞌ.

7 Catuꞌ jix wabꞌen an,

jix kꞌanabꞌ eltej jun mactxequel bꞌey smeẍail xaambꞌal jaxca tiꞌ:

—Yel Kaawil,

jaach Dios,

chi cꞌal skeꞌ masanil tzetyetal ja wu.

Yin yel cꞌal yin sjichanil jix ja wute ja naꞌon oc yin,

ẍi.

8 Catuꞌ jix secon ey jun yet scan ángel tzet eey yul secꞌ yibꞌan cꞌu.

Catuꞌ jix akꞌle yip cꞌu tuꞌ yakꞌwi tzꞌaꞌ ánima yetoj skꞌakꞌal.

9 Caw jix tzꞌaꞌ ánima masanil yu sicꞌlebꞌil.

Ma cꞌaltaꞌ snaꞌ sbꞌa ebꞌ niꞌoj.

Ma pax yal ebꞌ tol miman yeloc apnoj Dios.

Jaꞌ tiꞌ yet ebꞌ,

tol jix bꞌawa a ebꞌ yin,

yutol ey yipal Dios yakꞌon wan syaꞌilal yibꞌan ebꞌ.

10 Catuꞌ jix secon ey jun yet sjoꞌ ángel tzet eey yul secꞌ yibꞌan sdespacho jun chi yij Noꞌ tuꞌ.

Yuxan jix kꞌej jol can el masanil bꞌey eyoc Naj yin yaawilal tuꞌ.

Jaꞌ ebꞌ ánima tuꞌ,

caw chi ẍiꞌey yakꞌ ebꞌ yu syaꞌilal.

11 Tol jacꞌalaꞌ ma cꞌaltaꞌ snaꞌ sbꞌa ebꞌ niꞌoj.

Tol jix bꞌawa a ebꞌ yin Dios a satcan yu syaꞌil chi yabꞌ ebꞌ,

cꞌal yu wan yaꞌbꞌil jix elol yin smimanil ebꞌ tuꞌ.

12 Catuꞌ jix secon ey jun yet swaj ángel tzet eey yul secꞌ yibꞌan jaꞌ miman jaꞌ chi bꞌeyi,

chi yij Éufrates.

Jix tan a jaꞌ Éufrates tuꞌ,

yu yoc sbꞌe jaꞌ tuꞌ sbꞌeoj ebꞌ yaaw oj tit bꞌey chi aol cꞌu.

13 Catuꞌ jix wilon an,

eyecꞌ jun noꞌ dragón,

yetoj jun chi yij Noꞌ,

cꞌal jun chi tzꞌaj yaloc sbꞌa ẍejabꞌoj Dios.

Chi eltej junjun pena espíritu yul junjun stiꞌ ebꞌ.

Jaxca yili noꞌ patzaꞌ,

queytuꞌ yili wan espíritu tuꞌ yoxwanil.

14 Jaꞌ wan tuꞌ,

jaꞌ oxwan pena espíritu tol chi skeꞌ yu xꞌoxon milagro.

Jix too ebꞌ syambꞌa oc jantaj mimej yaaw yul yibꞌankꞌinal,

yu yakꞌlen jowal ebꞌ yetoj Dios yet jun cꞌual miman yeloc apnoj yet Dios,

jaꞌ Dios tol chi cꞌal skeꞌ yu masanil.

15 “Abꞌwej,

jaxca chi yun sjul junoj elkꞌom,

jaxca tuꞌ oj yun jin jul an.

Caw watxꞌ je yet mac jex chex majwai.

Che yaꞌilne je pichil.

Jal jex tol man to watxꞌ oj je yeoc xin,

catuꞌ oj jin jul an,

jaxca tol tꞌiran jex eloj,

catuꞌ oj jex ecꞌ tꞌirtꞌon sattaj masanil ánima.

Caw oj je yakꞌ je qꞌuixwiloj,”

ẍi Naj Kaawil.

16 Jaꞌ ebꞌ pena espíritu tuꞌ,

jix syambꞌa oc sbꞌa ebꞌ mimej yaaw bꞌey jun lugar chi yij Armagedón yin stiꞌ Hebreo.

17 Catuꞌ jix secon ey jun yet sjuj ángel tzet eey yul secꞌ xol kaꞌeꞌ.

Catuꞌ jix eltej jun kꞌane yul sdespacho Dios,

bꞌey jun cuarto asan Dios tuꞌ Ey Yet,

jix yal jun kꞌane tuꞌ yin ipal jaxca tiꞌ:

—Jix lawi,

ẍi.

18 Catuꞌ eyman jix a letzꞌlon,

catuꞌ jix cꞌoli sbꞌilwi cꞌu.

Ey wanxa tzet jix nilili aoj.

Ey jun miman quixcabꞌ jix eqꞌui.

Yechel tax cꞌamto ánima yul yibꞌankꞌinal cꞌamto bꞌey chi ecꞌ junoj quixcabꞌ jaxca jun tuꞌ.

19 Jaꞌ jun miman conobꞌ,

oxebꞌ poꞌoan jix yunne.

Jix eyqꞌuey masanil conobꞌlaj yul yibꞌankꞌinal.

Jix naꞌletej spenail miman conobꞌ Babilonia yu Dios.

Catuꞌ jix yaontoj jun miman syaꞌilal yibꞌan ebꞌ yu sjowal scꞌul.

Jaxca tol jix akꞌle wan vino caw jow yucꞌ ebꞌ yu Dios.

20 Jix qꞌueyel masanil txꞌotxꞌ txꞌotxꞌ sutquiltaj jix can snanlaj jaꞌ,

cꞌal masanil wonanlaj.

21 Catuꞌ jix titqꞌuey mimej sajbꞌat.

Ey mi junoj quintal yalil junjun.

Jix bꞌawa a ánima yin Dios yu sajbꞌat tuꞌ,

yutol caw yaꞌ chi yabꞌ ebꞌ.