Jujwan Ángel Yetoj Jujebꞌ Syaꞌilal
15
Jix lawi tuꞌ,
jix wilon junxa yechel bꞌey satcan,
tol caw miman yeloc apnoj.
Caw jix qꞌueya jin cꞌul wilon an.
Ey jujwan ángel yetoj jujebꞌ slawubꞌ syaꞌilal.
Jaꞌ jujebꞌ syaꞌilal tuꞌ oj tzꞌajtzen masanil sjowal scꞌul Dios.
2 Jix wilon pax jun tzetyetal jaxca jaꞌ mar,
jun nen calan yetoj kꞌakꞌ xacꞌal yili.
Ey wan ebꞌ linan ecꞌ scawilal tuꞌ.
Jaꞌ ebꞌ tuꞌ,
jaꞌton ebꞌ jix akꞌon ganar jun chi yij Noꞌ tuꞌ,
cꞌal yechel,
catuꞌ jix yakꞌon ganar yibꞌan snúmeroal sbꞌi,
yutol ma ẍaꞌ ebꞌ.
Lalan stenon junjun yarpa ebꞌ jix yakꞌ Dios.
3 Chi sbꞌitne ebꞌ jun sbꞌit naj Moisés,
naj yakꞌomal servil Dios,
catuꞌ chi sbꞌitnen ebꞌ jun sbꞌit Naj Yuneꞌ Meꞌ.
Chi yal jun bꞌit tuꞌ jaxca tiꞌ:
Jaach Kaawil,
jaach cu Diosal,
masanil tzettaj yetal chi cꞌal skeꞌ ja wu.
Caw miman yeloc apnoj jantaj tzet cha waꞌne,
caw chi qꞌueya cu cꞌul kiloni.
Caw yel,
watxꞌ cꞌal ja bꞌeybꞌal,
catuꞌ caw jichan jaach,
Sreyal jaach masanil nación.
4 ¿Tumi ey junoj mactxequel cꞌam chi xiw ey jaach,
jaach Kaawil?
¿Tumi ey junoj mac cꞌam chi alon watxꞌ kꞌane ey jaach?
Yutol asan jaach tzꞌajan jaach.
Oj tit ánima bꞌey masanil nación,
catuꞌ oj jul yiꞌon ey sbꞌa ebꞌ ey jaach,
yutol jix yil ebꞌ,
tol jichan cꞌal chi yun ja naꞌon oc yin ánima,
ẍi ebꞌ.
5 Jix lawi cꞌal tuꞌ,
jix wilon sjajcha jun cuarto Asan Dios Ey Yet yul sTemplo bꞌey satcan,
jun bꞌey cꞌuan ecꞌ sley.
6 Jatuꞌ jix wil yeltej jujwan ángel.
Iꞌbꞌil oc jujebꞌ syaꞌilal yu ebꞌ,
junjun cꞌal yet junjun ebꞌ.
Eyoc junjun caw saj pichile yu junjun ebꞌ caw chi tzejeji.
Eyoc junjun oro kꞌalile xaamscꞌul junjun ebꞌ.
7 Ey jun xol ebꞌ canwan tzetyetal iquis jix akꞌon junjun oro secꞌ tet junjun ebꞌ ángel tuꞌ.
Jaꞌ junjun secꞌ ebꞌ jix akꞌle tuꞌ,
nonaj yetoj sjowal scꞌul Dios,
jaꞌ Dios iquis cꞌal yin tobꞌalkꞌinal.
8 Jix noel yul jun cuarto tuꞌ yu smucꞌal stzejejial cꞌal yipal Dios.
Cꞌam junoj mac comon cꞌal chi skeꞌ yoctoj yul templo tuꞌ masantaꞌcꞌal jix lawi jujebꞌ syaꞌilal iꞌbꞌil oc yu ebꞌ ángel tuꞌ sjujwanil.