Chi Sbꞌitne Ebꞌ Jun Acꞌ Bꞌit
14
Jix lawi tuꞌ,
catuꞌ jix wilon an,
eyecꞌ Naj Yuneꞌ Meꞌ,
linan ecꞌ sjolom wonan Sión.
Eyecꞌ 144,000 ebꞌ yetoj.
Tzꞌibꞌebꞌil oc sbꞌi Naj Yuneꞌ Meꞌ tuꞌ yin spalan junjun ebꞌ,
cꞌal sbꞌi Smam.
2 Catuꞌ jix wabꞌen an,
jix oc jun aw bꞌey satcan.
Caw chi nilili jaxca snilili mimej jaꞌ,
ma jaxca snilili sbꞌilwi cꞌu.
Jaxca tol ey ecꞌaloj ánima chi qꞌuenon ecꞌaloj arpa.
3 Ey ebꞌ chi bꞌitnen jun acꞌ bꞌit sattaj sdespacho yetoj sattaj ebꞌ canwan tzetyetal iquis,
cꞌal sattaj ebꞌ anciano.
Cꞌam junoj mactxequel chi skeꞌ scuycha jun bꞌit tuꞌ yu.
Asanne ebꞌ 144,000 ebꞌ manbꞌil xa el xol ánima sat txꞌotxꞌ,
asan ebꞌ chi skeꞌ sbꞌitneni.
4 Jaꞌ ebꞌ tuꞌ,
cꞌam juneloj jix stzꞌilbꞌanentoj sbꞌa ebꞌ yin amulal,
ma pax yiꞌ yetbꞌi ebꞌ.
Jaꞌ ebꞌ tuꞌ,
tzajan cꞌal ebꞌ yintaj Naj Yuneꞌ Meꞌ tuꞌ bꞌey cꞌal chi toocoj.
Jix mancha el ebꞌ xol ánima.
Yu jun tuꞌ,
yuxan laan ebꞌ jaxca junoj bꞌabꞌel sat awo chi akꞌle tet Dios,
cꞌal tet Naj Yuneꞌ Meꞌ tuꞌ.
5 Cꞌam slekꞌtiꞌal ebꞌ chi ilchai.
Cꞌam junoj spenail ebꞌ jix txeclo a sattaj sdespacho Dios.
Jaꞌ Tzet Oj Yal Oxwan Ángel Tet Ebꞌ Ánima
6 Catuꞌ jix wilon yecꞌ jenenoj junxa ángel bꞌey snan satcan.
Jaꞌ skꞌaneal yet colbꞌanile tol ey cꞌal yin tobꞌalkꞌinal iꞌbꞌil oc yu.
Catuꞌ jix yalon el snan xol ánima bꞌey junjun nación,
cꞌal bꞌey junjun conobꞌ yul yibꞌankꞌinal,
cꞌal bꞌey junjun icꞌaale,
cꞌal bꞌey junjun tiꞌeal,
jix cꞌal yabꞌ ebꞌ masanil.
7 Caw ip yalon tet ebꞌ jaxca tiꞌ:
—Xiwanwej tet Dios.
Alwej watxꞌ kꞌane tet,
yutol tuxa chi jul stiempoal chi naꞌle oc je yin yu.
Iꞌwej ey je bꞌa tet,
yutol jaꞌ jix waꞌnen satcan,
yetoj sat txꞌotxꞌ,
cꞌal jaꞌ mar,
yetoj jaꞌ snukꞌ jaꞌ,
ẍi jun ángel tuꞌ.
8 Ey junxa ángel tzajan sjul yintaj jun bꞌabꞌel tuꞌ,
catuꞌ jix yalon pax jaxca tiꞌ:
—Jix eyqꞌuey jun miman conobꞌ Babilonia.
Jix eyqꞌueyi.
Jaꞌ jun conobꞌ tuꞌ jix etnen el masanil nacionlaj yetoj yamulal.
Jaxca tol jix oc junjun nación tuꞌ yin uqꞌuem anil yu,
ẍi jun ángel tuꞌ.
9 Catuꞌ ey junxa yet yox ángel tzajan yintaj jun yet scaabꞌ tuꞌ.
Caw ip pax yalon junxa tuꞌ jaxca tiꞌ:
—Jaꞌ ebꞌ chi yiꞌey sbꞌa tet jun chi yij Noꞌ tuꞌ,
cꞌal tet yechel,
ebꞌ jix ẍaꞌoc yechel yin spalan ma yin skꞌabꞌ,
10 sowalil oj jul jun miman syaꞌilal yibꞌan ebꞌ yu Dios.
Jaxca an vino caw jow,
cꞌam niꞌoj scal jix oqui,
queytuꞌ sjowal scꞌul Dios oj jul yibꞌan ebꞌ.
Caw jow sicꞌlebꞌil.
Caw oj yabꞌ syaꞌil ebꞌ snan xol kꞌakꞌ kꞌakꞌ yetoj azufre sattaj ebꞌ yángel Dios,
yetoj sattaj Naj Yuneꞌ Meꞌ tuꞌ.
11 Jaꞌ jun lugar bꞌey oj ẍaꞌ syaꞌilal ebꞌ tuꞌ chi a wacacoj smucꞌal tobꞌalkꞌinal.
Cꞌam xewilal yu ebꞌ cꞌualil,
cꞌal akꞌbꞌalil.
Jaꞌ ebꞌ jix yiꞌey sbꞌa tet jun chi yij Noꞌ tuꞌ,
cꞌal tet yechel,
ebꞌ jix ẍaꞌoc sbꞌi jun noꞌ tuꞌ yecheloj,
jaꞌ ebꞌ oj aletoj tituꞌ,
ẍi jun ángel tuꞌ.
12 Yuxan jaꞌ mac jex txequel yet jex xa Dios,
mac jex jijem jex tet tzet chi yal ẍejbꞌanil,
catuꞌ che yaon oc je cꞌul yin Jesús,
sowalil caw tecꞌan che yute je bꞌa yet che yabꞌen syaꞌil,
ẍi jun ángel tuꞌ.
13 Jix lawi tuꞌ,
jix wabꞌen yoc jun aw bꞌey satcan.
Jix yalon ey jin jaxca tiꞌ:
—Tzꞌibꞌe junxa tzet oj wal ey jaach tiꞌ:
“Jaꞌ tinaniꞌ,
caw watxꞌ yet ebꞌ ta chi cam ebꞌ,
jaꞌton ebꞌ eyoc yul skꞌabꞌ Syaawil.”
Caw yel jaxca ton tuꞌ yalon Naj Yespíritu Dios,
yutol oj xew ebꞌ yin smulnail.
Jaꞌ wan tzettaj yetal watxꞌ jix el yunen ebꞌ oj toj yetoj ebꞌ bꞌey satcan,
ẍi.
Jaxca Tol Oj Jatxꞌle A Ánima Bꞌey Yul Yibꞌankꞌinal
14 Jix lawi tuꞌ,
catuꞌ jix wilon jun sajin asun.
Ey jun Naj laan yili jaxca jun mac Akꞌbꞌil Yopiso yu Dios xol ebꞌ ánima chotan oc yibꞌan jun asun tuꞌ.
Eyoc jun corona oro yin sjolom,
catuꞌ mitxꞌbꞌil a jun joox cꞌupbꞌal tiriw caw eel yu.
15 Catuꞌ jix eltej junxa ángel yul sTemplo Dios tuꞌ.
Jix yalon yin ipal tet jun chotan ey yibꞌan jun asun tuꞌ jaxca tiꞌ:
—Aoctoj ja joox tuꞌ xol ixim tiriw,
catuꞌ cha cꞌuponi,
yutol jix jul stiempoal.
Yutol jaxca ixim tiriw tajnajxa eloj,
queytuꞌ ebꞌ ánima bꞌey sat txꞌotxꞌ,
ẍi tet.
16 Eyman cꞌal jix yaoctoj sjoox jun chotan oc yibꞌan asun tuꞌ bꞌey sat txꞌotxꞌ.
Jix yiꞌon a ánima jaxca yet chi a tiriw.
17 Catuꞌ jix eltej junxa ángel yul sTemplo Dios bꞌey satcan.
Iꞌbꞌil pax oc jun joox yet tiriw caw eel yu.
18 Jix eltej junxa ángel bꞌey eyoctoj jun smeẍail xaambꞌal.
Jaꞌ jun tuꞌ ey yopiso yakꞌon mandar kꞌakꞌ kꞌakꞌ.
Caw ip yalontoj tet junxa ángel mitxꞌbꞌil a joox tuꞌ jaxca tiꞌ:
—Aoctoj ja joox caw eel tuꞌ,
yutol jaꞌ an uva bꞌey sat txꞌotxꞌ,
caw kꞌanxa an,
ẍi naj tet.
19 Catuꞌ jix yaon octoj sjoox jun ángel tuꞌ sat txꞌotxꞌ.
Catuꞌ jix yiꞌon a wan uva tuꞌ masanil.
Catuꞌ jix yaon octoj an yul jun miman tecꞌbꞌal uva.
Jaꞌ jun tuꞌ chi yal yeloc apnoj sjowal scꞌul Dios.
20 Jaꞌ jun tecꞌbꞌal uva tuꞌ,
jaꞌ stiꞌel conobꞌ ey.
Jaxca chi yun stecꞌle eltej yal uva sicꞌlebꞌil,
jaxca tuꞌ jix utele ebꞌ ánima tuꞌ.
Caw naat jix too ẍiqꞌuil ebꞌ jix el tuꞌ,
jaxca snaatil bꞌey chi oc sfreno noꞌ che,
queytuꞌ bꞌey jix a lian oj.
Ey 80 legua bꞌey jix a lian oj.
Jaxca xacꞌal junoj pam jaꞌ.