Cawan Chi Yij Noꞌ
13
Jix lawi tuꞌ xin,
jix oc linan jun noꞌ dragón tuꞌ yibꞌan yarenail stiꞌ jaꞌ mar.
Catuꞌ jix wilon an,
jix aol jun chi yij Noꞌ xol jaꞌ mar.
Jujebꞌ sjolom,
catuꞌ laonebꞌ yucꞌaꞌ.
Ey cꞌal a scorona junjun yucꞌaꞌ tuꞌ.
Tzꞌibꞌebꞌil oc jun sbꞌi yin junjun sjolom tuꞌ.
Jaꞌ junjun bꞌie tuꞌ,
chi bꞌuchwa yin Dios.
2 Jaꞌ jun chi yij Noꞌ jix wil tuꞌ an,
laan yili jaxca junoj noꞌ mimej tzꞌibꞌin bꞌalam.
Laan yajan jaxca yajan noꞌ oso.
Laan stiꞌ noꞌ jaxca yet noꞌ león.
Jix yakꞌ yopiso noꞌ dragón tet.
Catuꞌ jix yaon oc noꞌ yin yaawiloj sqꞌuexeloj jun noꞌ dragón tuꞌ.
Miman yopiso noꞌ jix yakꞌ tet.
3 Ey jun sjolom jun chi yij Noꞌ tuꞌ yasinajtoj.
Jaxca tol camnaj el jun sjolom tuꞌ yu yasil tuꞌ.
Jix ancha cꞌal pax jun yasil tuꞌ.
Yu jun tuꞌ yuxan caw jix qꞌueya scꞌul ánima bꞌey masanil sat txꞌotxꞌ yu.
Catuꞌ jix oc tzajan ebꞌ yintaj.
4 Jix yiꞌey sbꞌa ebꞌ tet jun noꞌ dragón tuꞌ,
yutol jaꞌ jix akꞌon yopiso jun chi yij Noꞌ tuꞌ,
yuxan jix yiꞌ pax ey sbꞌa ebꞌ tet jun chi yij Noꞌ tuꞌ.
Jix yalon ebꞌ jaxca tiꞌ:
—¿Tumi ey junoj chi apni jaxca jun chi yij Noꞌ tiꞌ?
¿Tumi taꞌ ey junoj chi skeꞌ yakꞌlen jowal yetoj?
ẍi ebꞌ.
5 Jix akꞌle pax spermiso jun chi yij Noꞌ tuꞌ smimanbꞌane sbꞌa,
cꞌal yalon bꞌuchwal kꞌane yin Dios.
42 xꞌaaw jix akꞌle spermiso yakꞌon yaawilal.
6 Caw pena jix yal yin Dios.
Jix bꞌuchwa yin sbꞌi Dios tuꞌ,
cꞌal yin stemplo.
Jix bꞌuchwa pax yin jantaj ebꞌ eyecꞌ satcan.
7 Jix akꞌle pax spermiso yakꞌwi jowal yetoj ebꞌ yet xa Dios,
masantaꞌ jix yakꞌ ganar scan ebꞌ yalan yu.
Jix akꞌle yopiso yijbꞌale masanil bꞌey junjun conobꞌ,
cꞌal junjun nación.
Caxcꞌal txꞌoj txꞌoj icꞌaale ebꞌ,
caxcꞌal txꞌoj txꞌoj stiꞌ ebꞌ,
jix ijbꞌale ebꞌ masanil yu.
8 Oj yiꞌey sbꞌa masanil ánima sat txꞌotxꞌ tet jun chi yij Noꞌ tuꞌ.
Jal ebꞌ tzꞌibꞌebꞌil ey sbꞌi yul an libro yet kꞌinale tol ey cꞌal yin tobꞌalkꞌinal,
man oj yiꞌey sbꞌa ebꞌ tet.
Jaꞌ ebꞌ tuꞌ jaꞌ tax yet cꞌamto chi waꞌxi yul yibꞌankꞌinal,
jix tzꞌibꞌele cantoj sbꞌi ebꞌ yul slibro Naj Yuneꞌ Meꞌ,
Naj makꞌbꞌil camoj.
9 Masanil mac chi abꞌen wan tiꞌ,
ya ojabꞌ oc xiquin ebꞌ tet sicꞌlebꞌil.
10 Jaꞌ mac chi yiꞌtoj yet animail preso,
oj iꞌle pax toj ebꞌ preso.
Jaꞌ mac chi tejwi cam ánima yetoj espada,
espada,
oj tejon pax camoj.a
Yu jun tuꞌ,
yuxan jaꞌ jaon yet jon xa Dios tiꞌ,
tecꞌan ojabꞌ chi kute cu bꞌa kabꞌen syaꞌil,
catuꞌ chi kaon cꞌal oc cu cꞌul yin Dios tuꞌ.
11 Jix lawi tuꞌ,
jix wilon yaol junxa chi yij Noꞌ yul txꞌotxꞌ.
Jaꞌ junxa tuꞌ,
laan yili jaxca yuneꞌ meꞌ,
yutol caabꞌne yucꞌaꞌ.
Jaxa yet chi kꞌanabꞌi,
kotaj tol manaj jun yuneꞌ meꞌ,
yutol laan skꞌanabꞌ jaxca skꞌanabꞌ jun noꞌ dragón.
12 Caw laan yopiso yetoj jun bꞌabꞌel chi yij Noꞌ.
Jix yakꞌ sowalil masanil ánima bꞌey sat txꞌotxꞌ yiꞌon ey sbꞌa tet jun bꞌabꞌel chi yij Noꞌ tuꞌ,
jun yasinajtoj sjolom tuꞌ,
anchanaj pax oj.
13 Ey wan milagro jix el xꞌoxoni,
tol caw miman yeloc apnoj.
Masantaꞌ chi yiꞌtej kꞌakꞌ bꞌey satcan,
catuꞌ chi eyol sat txꞌotxꞌ yil ánima.
14 Jix akꞌle spermiso xꞌoxon wan milagro tuꞌ sattaj jun bꞌabꞌel chi yij Noꞌ tuꞌ.
Catuꞌ jaxca tuꞌ jix yute yetnen ánima bꞌey sat txꞌotxꞌ.
Jix yalon pax tet ebꞌ,
tol sowalil chi swaꞌne junoj yechel jun bꞌabꞌel chi yij Noꞌ tuꞌ ebꞌ,
caxcꞌal yasinaj yu espada,
iquis cꞌal pax oj.
15 Jix akꞌle yip jun yet scaabꞌ chi yij Noꞌ tuꞌ yakꞌon pitzcꞌu a yechel jun bꞌabꞌel tuꞌ.
Yu jun tuꞌ,
yuxan jix kꞌanabꞌ aoj.
Jix yakꞌon cam masanil mactxequel ma yiꞌey sbꞌa tet.
16 Jix yal jun noꞌ tuꞌ,
tol sowalil chi oc yechel yin masanil ánima junjun yin swatxꞌ kꞌabꞌ,
ma yin spalan.
Caxcꞌal unin ma icham ánima,
caxcꞌal bꞌeom ma mebꞌa,
caxcꞌal yet xa sbꞌa ma yakꞌomaloj servil,
jix oc yechel yin ebꞌ masanil.
17 Jaꞌ jun echele tuꞌ,
ey bꞌey tol jaꞌ sbꞌi jun chi yij Noꞌ tuꞌ,
ey bꞌey jaꞌ snúmeroal.
Jaꞌ ebꞌ man eyoj oc yechel yin,
ma skeꞌ smanwi ebꞌ,
cꞌam pax chi skeꞌ xonwi ebꞌ.
18 Ta jaex jelan jex,
ta chi naꞌcha el je yu,
oj skeꞌ snaꞌcha el je yu,
tzet chi yal yeloc apnoj snúmeroal jun chi yij noꞌ tuꞌ,
yutol jaꞌ jun número tuꞌ,
chi txꞌoxon sbꞌi junoj ánima.
666 jun número tuꞌ.