Jun Ix Ix Yetoj Jun Noꞌ Dragón
12
Jix lawi jun tuꞌ,
jix xꞌoxon a sbꞌa jun yechel bꞌey satcan caw miman yeloc apnoj.
Ey jun ix ix,
jaꞌ cꞌu eyoc spichiloj.
Jaꞌ xꞌaaw eyoc sbꞌatxlubꞌoj yajan.
Catuꞌ lacawebꞌ weycan eya scoronaoj.
2 Mimejalxa ix.
Caw chi el yaw ix yu syaꞌilal jun unin tuꞌ.
Caw chi yoche chi colchai.
3 Eyman jix xꞌoxa sbꞌa junxa yechel satcan tuꞌ.
Ey jun miman cajin noꞌ dragón.
Jujebꞌ sjolom,
laonebꞌ yucꞌaꞌ.
Ey cꞌal a scorona junjun sjolom tuꞌ.
4 Jun yet yox tujan weycan jix sloctej yetoj sne bꞌey satcan,
jix skꞌojon ey sat txꞌotxꞌ.
Jix lawi tuꞌ,
jix apni linan sattaj ix ix mimejalxa tuꞌ,
yutol chi cꞌal ali jun unin tuꞌ,
catuꞌ chi yoche noꞌ chi ẍiꞌeytoj.
5 Winaj unin jun jix ali yu ix tuꞌ.
Jaꞌton oj akꞌle yopiso yin yijbꞌan masanil nación yetoj jun chꞌen kꞌojoche.a
Jix ali cꞌal jun unin tuꞌ,
catuꞌ jix iꞌletoj scꞌatan Dios bꞌey sattaj sdespacho.
6 Jaꞌ jun ix tuꞌ,
jix elaoj,
jix too bꞌey cusiltaj txꞌotxꞌ.
Jaꞌ taꞌ tuꞌ watxꞌ xa ye jun slugar yu Dios.
1,260 cꞌub oj akꞌle sloꞌbꞌe tituꞌ.
7 Catuꞌ jix oc pax jun miman jowal bꞌey satcan.
Jaꞌ jun bꞌabꞌel ángel chi yij Miguel,
yetoj ebꞌ yet ángelal,
jaꞌ ebꞌ jix akꞌlen jowal yetoj jun noꞌ dragón tuꞌ.
Catuꞌ jix syambꞌan sbꞌa jun dragón tuꞌ yetoj yángel yin ebꞌ.
8 Ma cꞌal yakꞌ ganar ebꞌ.
Yu jun tuꞌ,
yuxan cꞌamxa slugar ebꞌ jix akꞌle bꞌey satcan.
9 Jaxca ton tiꞌ jix yun skꞌojle eltoj jun miman dragón tuꞌ.
Jacꞌal ton oc jun tuꞌ yutenaj sbꞌa labꞌail yet peyxa.
Jaꞌton diablo,
jun Satanás.
Jun chi etnen masanil ánima sat txꞌotxꞌ tiꞌ.
Kꞌojbꞌil eytej diablo sat txꞌotxꞌ yetoj cꞌal ebꞌ yángel.
10 Catuꞌ jix wabꞌen yoc jun aw bꞌey satcan,
caw ip jix yun yalon jaxca tiꞌ:
—Jaꞌ tinaniꞌ jix txeclo a jun colbꞌanile chi yakꞌ cu Diosal.
Jix xꞌoxon pax eloj tol caw ey yipal,
catuꞌ Yaaw yei.
Jaꞌ Cristo akꞌbꞌil yopiso yu,
jaꞌ Naj jix txꞌoxon eloj,
tol jaꞌ chi ijbꞌan masanil,
jal pax jun naj chi akꞌon queja yin ebꞌ kuẍtaj,
ebꞌ kanabꞌ tet Dios yet cꞌualil cꞌal akꞌbꞌalil,
jaꞌton naj diablo,
kꞌojbꞌilxa eltoj.
11 Jaꞌ ebꞌ tuꞌ,
jix yakꞌ ganar ebꞌ yutol jix cam jun Naj Yuneꞌ Meꞌ tuꞌ syaꞌiloj ebꞌ yet jix el ẍiqꞌuil.
Jix yakꞌ pax ganar ebꞌ,
yutol tecꞌan jix yute sbꞌa ebꞌ yakꞌon sbꞌa testigoal yin.
Cꞌam niꞌoj jix xiw ebꞌ scami,
jaꞌ tiꞌ yet ebꞌ,
tol bꞌejan jix yute scꞌul ebꞌ scami.
12 Yu jun tuꞌ,
yuxan tzalajonwej jex satcanlaj.
Tzalajonwej cu masanil ey jon ecꞌ bꞌey satcan tiꞌ.
Caw okꞌbꞌal jex cꞌule jex ey jex ecꞌ sat txꞌotxꞌ,
cꞌal jex ey jex ecꞌ yibꞌanlaj jaꞌ mar.
Yutol jix ey apnoj diablo ey jex tuꞌ.
Caw chi jowbꞌi a sicꞌlebꞌil,
yutol yotaj,
tol txenxane stiempoal,
ẍi.
13 Jaꞌ yet jix yilon jun noꞌ dragón tuꞌ,
tol jix kꞌojle eytoj sat txꞌotxꞌ,
catuꞌ jix cꞌoli yujtele ecꞌ ix alinaj yuneꞌ tuꞌ yu.
14 Jix ale oc caabꞌ xicꞌ ix caw mimej,
laan jaxca xicꞌ noꞌ mimej chii.
Catuꞌ jix too jenenoj ix bꞌey slugar bꞌey cusiltaj txꞌotxꞌ yet watxꞌ cꞌam chi michꞌcha ix yu jun tuꞌ.
Jaꞌ taꞌ tuꞌ oj akꞌle sloꞌbꞌe ix nan scan abꞌil.
15 Jaꞌ yet tuꞌ ey jun miman jaꞌ jix pitzcꞌu a yu jun pena noꞌ tuꞌ.
Jaꞌ yul stiꞌ chi eltej.
Chi yoche chi iꞌletoj ix tuꞌ yu jun jaꞌ tuꞌ.
16 Jaxa txꞌotxꞌ txꞌotxꞌ jix colon can el ix.
Jix jajcha jun miman jolan yul txꞌotxꞌ.
Jaꞌ tituꞌ jix toocan tobꞌton jun miman jaꞌ tuꞌ.
17 Catuꞌ jix tit sjowal jun noꞌ dragón tuꞌ yin ix sicꞌlebꞌil,
yuxan jix too yakꞌle jowal yetoj wanxa ebꞌ yuneꞌ ix.
Ebꞌ chi jijen ẍejbꞌanil Dios,
ebꞌ tecꞌan chi yute yaon oc snaꞌbꞌal yin skꞌane Jesucristo.
18 Jix lawi tuꞌ,
catuꞌ jix too swaꞌnen ey sbꞌa jun chi yij dragón tuꞌ yibꞌan yarenail bꞌey stiꞌ jaꞌ mar.