Cawan Testigo Chi Bꞌinai
11
Catuꞌ jix akꞌle jun teꞌ aa laan jaxca vara ey jin an.
Jix yalon ey jin jaxca tiꞌ:
—Aan linanoj.
Eche sTemplo Dios,
catuꞌ cha wechen pax jun smeẍail xaambꞌal.
Catuꞌ cha bꞌison ebꞌ chi yiꞌey sbꞌa tet Dios yul tuꞌ.
2 Manche ja weche pax yamakꞌil templo tuꞌ.
Yutol jaꞌ yamakꞌil tuꞌ,
akꞌbꞌil xa tet ebꞌ man Israeloj.
Jaꞌ ebꞌ tuꞌ,
42 xꞌaaw oj etnele sconobꞌ Dios yu ebꞌ,
yet chi oc ebꞌ yaawilal yibꞌan ebꞌ.
3 Ey cawan mactxequel oj waoc yopiso tol oj yakꞌ sbꞌa testigoal win an.
1,260 cꞌu oj ecꞌ yalel jin kꞌane ebꞌ.a
Jaꞌ an pichile eel,
oj yaoc ebꞌ,
yet watxꞌ chi txeclo eloj,
tol eyoc ebꞌ yin cuscꞌulal,
ẍi.
4 Jaꞌ cawan testigo tuꞌ,
jaꞌton caabꞌ teꞌ xutxal olivo albꞌil yu naj Zacarías.
Yetoj pax oj,
jaꞌton caabꞌ tzejtebꞌal kopan oc yajantaj Naj Kaawil bꞌey sat txꞌotxꞌ.
5 Chi eltej kꞌakꞌ yul stiꞌ ebꞌ,
ta ey mac chi ochen chi etnen ebꞌ.
Jaꞌ ebꞌ chi chichon oc scꞌul yin ebꞌ,
chi tzꞌaꞌey ebꞌ yu kꞌakꞌ kꞌakꞌ tuꞌ junelne.
Queytuꞌ oj yun scam masanil mac chi ochen chi etnen ebꞌ.
6 Jaꞌ ebꞌ testigo tuꞌ,
ey yip ebꞌ stenon oc tucan nabꞌ,
yet watxꞌ cꞌamxa chi yakꞌ nabꞌ tuꞌ yajbꞌan chi ecꞌ ebꞌ yalel skꞌane Dios tuꞌ.
Ey pax yip ebꞌ yaon oc jaꞌ yin chicꞌal.
Catuꞌ chi skeꞌ yaon oc ebꞌ yal cꞌal tzet yaꞌbꞌilal bꞌey sat txꞌotxꞌ txꞌotxꞌ tiꞌ yu ebꞌ,
jatacꞌalaꞌ tzet chi yoche ebꞌ.
7 Jal pax yet oj lawoj yalon el skꞌane Dios ebꞌ tuꞌ,
catuꞌ ey jun caw pena noꞌ caw jow,
jaꞌton jun chi aol yul jun xabꞌ cꞌam yich,
jaꞌ oj toj jucna yin ebꞌ.
Catuꞌ oj yakꞌlen jowal yetoj ebꞌ.
Oj akꞌle ganar ebꞌ yu jun caw pena noꞌ tuꞌ,
catuꞌ oj makꞌle cam ebꞌ yu.
8 Oj can telan smimanil ebꞌ scawanil yul-laj scalleal jun miman conobꞌ bꞌey jix ale oc Naj Kaawil yin culus.
Jaꞌ jun conobꞌ tuꞌ,
chi yij Sodoma,
catuꞌ chi yijon pax Egipto yu xꞌoxle eloj,
tol caw pena.
9 Nan scan cꞌu ecꞌal ánima oj ecꞌ matzꞌloj ebꞌ yin smimanil ebꞌ camnaj tuꞌ.
Ey ebꞌ a junjun conobꞌ,
cꞌal junjun nación,
cꞌal junjun icꞌaale,
cꞌal junjun tiꞌeal,
oj matzꞌloj ebꞌ yin ebꞌ.
Ma chaꞌle mujle smimanil ebꞌ cawan camnaj tuꞌ yu ebꞌ ánima tuꞌ.
10 Oj tzala a masanil ánima yul yibꞌankꞌinal tiꞌ yutol jix cam ebꞌ.
Tol tax oj saꞌle ecꞌ tzettaj yetal ebꞌ xol.
Caw oj tzala ebꞌ yu jix cam ebꞌ tuꞌ,
yutol caw jix yabꞌ syaꞌil ebꞌ yu cawan ebꞌ ẍejabꞌ Dios tuꞌ.
11 Jal yet oj lawoj nan scan cꞌual tuꞌ xin,
oj pitzcꞌunele a ebꞌ yu Dios.
Catuꞌ oj a pax waan ebꞌ.
Caw oj xiwa jantaj mac oj iloni.
12 Catuꞌ oj oc jun aw bꞌey satcan,
caw ip oj yun yal-le tet ebꞌ cawan tuꞌ jaxca tiꞌ:
—Aanwejtej bꞌey satcan tiꞌ,
ẍi tet ebꞌ.
Yu jun tuꞌ,
yuxan oj toj ebꞌ xol jun asun bꞌey satcan tuꞌ.
Tuxa cꞌal tꞌanan atoj ebꞌ acꞌul tuꞌ yin ebꞌ.
13 Oj ecꞌ jun quixcabꞌ yet jun txolan tuꞌ.
Caw jow oj yun yeqꞌui.
Jun yet slaon tujan na oj eyqꞌuey bꞌey jun miman conobꞌ tuꞌ.
Jujebꞌ mil ánima oj cam yu.
Jal wanojxa ánima xin,
caw oj xiwa ebꞌ sicꞌlebꞌil.
Oj yalon ebꞌ,
tol caw miman yeloc apnoj Dios eyecꞌ bꞌey satcan.
14 Jaxca ton tiꞌ oj yun yecꞌ jun yet scaabꞌ syaꞌilal.
Eyto pax junxa eyman oj juloj.
Jun Sjuj Trompeta Chi Xuꞌlei
15 Catuꞌ jix xuon strompeta jun yet sjuj ángel tuꞌ.
Catuꞌ jix oc wan aw bꞌey satcan.
Caw ip yalon jaxca tiꞌ:
Jaꞌ ebꞌ chi ijbꞌan bꞌey yul yibꞌankꞌinal,
jaꞌ tinaniꞌ chi can yopiso ebꞌ yul skꞌabꞌ Dios Kaawil,
chi can pax yul skꞌabꞌ Cristo,
jaꞌton jun Akꞌbꞌil Yopiso yu Dios Kaawil.
Jaꞌ oj akꞌon Yaawilal yin tobꞌalkꞌinal,
ẍi ebꞌ.
16 Catuꞌ jix ey noan ebꞌ 24 anciano chotan ey yul sdespacho eyecꞌ sattaj Dios tuꞌ sat txꞌotxꞌ.
Jix cꞌoli yiꞌon ey sbꞌa ebꞌ tet Dios.
17 Jix yalon ebꞌ jaxca tiꞌ:
Jaach Dios,
tol chi cꞌal skeꞌ ja wu masanil.
Ey jaach ecꞌ tinaniꞌ,
ey jaach cꞌaltaꞌ ecꞌ yet tax yichbꞌanil,
/catuꞌ oj jaach jul pax oj.
/ Jaach Kaawil,
chi kal yu diosalil ey jaach.
Yutol jix ja kꞌanbꞌalne jun miman ja wopiso,
yet jix ja chaꞌon el yich ja wakꞌon Yaawilal.
18 Jix tit sjowal wan nacionlaj yet jix ja chaꞌon el yich ja wakꞌon Yaawilal,
jix jul cꞌal scꞌual ja waon oc syaꞌilal ebꞌ.
Jix jul pax stiempoal ja naꞌon oc yin ebꞌ camnaj.
Oj ja pajtze junjun ebꞌ chach akꞌon servil,
jaꞌton ebꞌ ja chejabꞌ,
yetoj ebꞌ ja wet xa yei,
cꞌal ebꞌ chi oc eyilal ey jaach.
Ebꞌ ey yeloc apnoj,
cꞌal ebꞌ cꞌam yeloc apnoj,
oj ja pajtze junjun ebꞌ.
Yetoj pax oj,
jix jul stiempoal ja wakꞌon lawoj el ebꞌ chi akꞌwi lawoj tzetyetal ey bꞌey sat txꞌotxꞌ tiꞌ,
ẍi ebꞌ.
19 Jix lawi tuꞌ,
catuꞌ jix jajcha sTemplo Dios eyecꞌ bꞌey satcan.
Caw txequelxa yeoc Scaẍail Swa Kꞌane Dios* yul sTemplo tuꞌ.
Jix cꞌoli sbꞌilwi cꞌu,
catuꞌ chi letzꞌloni.
Ey wanxa tzetyetal chi nilili.
Jix ecꞌ pax jun quixcabꞌ,
catuꞌ jix tit jun miman sajbꞌat.