Jaꞌ Yet Jix Sloꞌon Eytoj Jun An Yaliẍ Libro Naj Juan
10
Jix lawi jun tuꞌ,
catuꞌ jix wilon yeytej jun ángel bꞌey satcan,
tol miman yipal,
catuꞌ jix eyol sat txꞌotxꞌ.
Jaxca tol spichil yeoc jun asun yin.
Eya jun jaxca kꞌukꞌulcan yin sjolom.
Caw chi tzejeji sat jaxca yet chi chaw yajan cꞌu.
Jaꞌ yajan,
jaxca pilaliẍ chi nilxi kꞌakꞌ yin.
2 Ey jun an yaliẍ libro jajan iꞌbꞌil a yu yul skꞌabꞌ.
Jix yaey swatxꞌ yajan yibꞌan jaꞌ mar.
Jal sqꞌuexan jix ey sat txꞌotxꞌ.
3 Catuꞌ jix awwi.
Caw ip jix yun yawwi jaxca noꞌ león,
yet chi el yaw noꞌ.
Jaꞌ yet jix lawi yawwi tuꞌ,
catuꞌ jix nilili a jaxca snilili a jujebꞌ tujan cꞌu,
catuꞌ jix kꞌanabꞌi.
4 Jix lawi snilili jujebꞌ tujan cꞌu tuꞌ skꞌanabꞌ xin,
catuꞌ ian jix jin tzꞌibꞌe tzet jix wabꞌ tuꞌ,
ey pax jun nukꞌe jix oc bꞌey satcan ey jin jaxca tiꞌ:
—Tucꞌal cha cꞌubꞌa yul ja cꞌul tzet jix yal jujebꞌ tujan cꞌu jix nilili tuꞌ,
manche ja tzꞌibꞌe,
ẍi ey jin an.
5 Jaꞌ jun ángel tuꞌ,
jix sqꞌuetxbꞌa a swatxꞌ kꞌabꞌ satcan,
jun linan oc yibꞌan jaꞌ mar tuꞌ,
cꞌal sat txꞌotxꞌ tuꞌ.
6 Jaꞌ yet jix kꞌanabꞌi,
jix slocontej sbꞌi Naj iquis yin tobꞌalkꞌinal,
Naj jix waꞌnen satcan,
cꞌal sat txꞌotxꞌ,
jaꞌ mar,
cꞌal masanil tzettaj yetal ey bꞌey junjun.
Jix yal jun ángel tuꞌ yet jix slocontej sbꞌi Dios tuꞌ jaxca tiꞌ:
—Jaꞌ tinaniꞌ,
cꞌamxa chi ecꞌ tiempo.
7 Yutol oj yun tzet naꞌbꞌil xacꞌaltaꞌ yu Dios yet oj ẍaꞌon el yich xuon strompeta jun yet sjuj ángel tuꞌ.
Jaꞌ tzet naꞌbꞌilxa taꞌ yu tuꞌ,
albꞌil yu tet ebꞌ yakꞌomal servil,
jaꞌton ebꞌ profeta,
ẍi jun ángel tuꞌ.
8 Jaꞌ jun aw jix wabꞌ yoc bꞌey satcan tuꞌ,
jix kꞌanabꞌ pax a ey jin junelxa,
jix yalon jaxca tiꞌ:
—Asiꞌ.
Chaꞌ an yaliẍ libro jajan tuꞌ,
an mitxꞌbꞌil a yu jun ángel linan oc yibꞌan jaꞌ mar tuꞌ,
cꞌal sat txꞌotxꞌ tuꞌ,
ẍi ey jin an.
9 Yu jun tuꞌ,
yuxan jix jin to scꞌatan jun ángel tuꞌ,
catuꞌ jix jin kꞌanon ecꞌ an yaliẍ libro tuꞌ tet,
jix yalon ey jin jaxca tiꞌ:
—Iꞌtoj an,
catuꞌ cha loꞌon an.
Caw chiꞌ julinaj xacꞌal stoo an yul ja tiꞌ,
jaxca yaal awcabꞌ.
Oj kꞌaꞌbꞌoj cꞌal pax el an yul ja cꞌul,
ẍi ey jin an.
10 Catuꞌ jix jin chaꞌon ecꞌ an juun tuꞌ tet jun ángel tuꞌ.
Catuꞌ jix jin loꞌon eytoj an.
Chiꞌ julinaj xacꞌal yoctoj yul jin tiꞌ,
jaxca yaal awcabꞌ.
Tol jix kꞌaꞌbꞌi el yul jin cꞌul.
11 Catuꞌ jix al-le ey jin jaxca tiꞌ:
—Sowalil oj ja wal junelxa,
tzettaj yetal oj jul yibꞌan conobꞌlaj,
yibꞌan nacionlaj,
yibꞌan junjun tiꞌeal,
cꞌal yibꞌan ebꞌ rey,
ẍi ey jin an.