9
Jix lawi tuꞌ,
catuꞌ jix xuon strompeta jun yet sjoꞌ ángel tuꞌ.
Catuꞌ jix wilon an,
eyxa ecꞌ jun weycan titnaj can satcan yibꞌan txꞌotxꞌ.
Jix akꞌle slaweal jun xabꞌ jolan tol cꞌam yich tet jun weycan tuꞌ.
2 Catuꞌ eyman jix sjaj jun xabꞌ tuꞌ.
Jix cꞌoli yaol mucꞌ yul jun xabꞌ tuꞌ,
jaxca ya smucꞌal junoj miman jorna.
Jix kꞌejbꞌi cꞌu yetoj satcan yu jun mucꞌ tuꞌ.
3 Ecꞌal wan noꞌ noꞌ jaxca yili noꞌ kochiꞌ noꞌ jix eyol xol mucꞌ tuꞌ.
Jix sajlemtoj noꞌ yul yibꞌankꞌinal.
Jix akꞌle yipal wan noꞌ tuꞌ ẍiꞌwa jaxca chi yun ẍiꞌwa noꞌ sinam yet yul yibꞌankꞌinal tiꞌ.
4 Jix al-le tet noꞌ tol manche yetnetoj an chꞌim noꞌ,
yetoj tzettaj yetal yaax cꞌultaj chi chꞌibꞌi,
cꞌal teꞌ teꞌ.
Asan ebꞌ ánima man eyoj oc sello Dios yin spalan,
asan ebꞌ chi skeꞌ ẍiꞌle yu noꞌ.
5 Ma akꞌle yakꞌ cam junoj ánima noꞌ.
Tol jix ale cꞌal oc syaꞌilal yin ebꞌ ánima yin joebꞌ xꞌaaw yu noꞌ.
Jaꞌ jun syaꞌil chi yaoc noꞌ tuꞌ,
caw laan jaxca bꞌey chi ẍiꞌ noꞌ sinam.
6 Jaꞌ yet jun tiempoal tuꞌ,
oj seyecꞌ ánima tzet utbꞌil chi yun scami,
man oj ilcha pax tzet utbꞌil oj yun scam ebꞌ.
Caxcꞌal caw chi yoche ebꞌ chi cami,
man cꞌal oj cam pax ebꞌ.
7 Jaꞌ wan noꞌ jaxca noꞌ snoꞌal xuux tuꞌ,
watxꞌ xa ye noꞌ jaxca noꞌ che,
watxꞌ xa ye stoo yin jowal.
Eya jun tzetyetal jaxca oro corona yu noꞌ yin sjolom.
Laan yili sat noꞌ jaxca sat ánima.
8 Jaꞌ xil noꞌ,
laan jaxca xil yaꞌ ix.
Jaꞌ yee noꞌ,
laan jaxca yee noꞌ león.
9 Ey jun tzetyetal eyoc yin smimanil jaxca chꞌen chꞌen pichile chi yaoc ebꞌ soldado.
Laan wal snilili xicꞌ noꞌ jaxca snilili sbꞌilwi wan carreta tokꞌbꞌil yu ecꞌaloj noꞌ che chi yakꞌ ani stoo yin jowal.
10 Ey sꞌuup sne noꞌ jaxca noꞌ sinam.
Jaꞌ sꞌuup noꞌ tuꞌ,
ey yip yetnen ánima yin joebꞌ xꞌaaw.
11 Jaꞌ yul jun xabꞌ,
jatuꞌ jix aol jun ángel eyoc yaawiloj noꞌ noꞌ tuꞌ.
Jaꞌ syaawil noꞌ tuꞌ,
Abadón sbꞌi yin Hebreo.
Jal yin Griego xin,
Apolión sbꞌi.
Chi yal yeloc apnoj qꞌueywawom.
12 Jaxca ton tiꞌ jix yun yecꞌ jun bꞌabꞌel syaꞌilal.
Tol eyto pax caabꞌxa tol to oj juloj.
13 Jix xuꞌ strompeta jun yet swaj ángel tuꞌ.
Jaꞌ jun smeẍail xaambꞌal oro eyecꞌ sattaj Dios,
jaꞌ xiquinlaj jaxca yucꞌaꞌ noꞌ yili.
Jaꞌ snan xol canebꞌ xiquin tuꞌ,
jix wabꞌ yoc jun aw.
14 Jix yal jun aw tuꞌ tet jun yet swaj ángel tuꞌ jaxca tiꞌ:
—Jajel canwan ebꞌ ángel pixan bꞌey stiꞌ jaꞌ jaꞌ miman Éufrates,
ẍi tet ebꞌ.
15 Catuꞌ jix too jajle el ebꞌ ángel tuꞌ scanwanil yu ebꞌ.
Catuꞌ jix too ebꞌ makꞌo cam ánima.
Jaꞌ jun yet yox tujan ebꞌ ánima jix akꞌle cam yu ebꞌ bꞌey sat txꞌotxꞌ.
Yet ton jun yorail tuꞌ,
jun cꞌual tuꞌ,
jun xꞌaawil tuꞌ,
jun abꞌil tuꞌ,
yuxan jix yakꞌ lista sbꞌa ebꞌ ángel tuꞌ.
16 Catuꞌ jix wabꞌen sbꞌisil ebꞌ soldado eya yibꞌan noꞌ che chi colwa smulna yetoj ebꞌ ángel tuꞌ,
tol ey caabꞌ ciento millón sbꞌisil ebꞌ.
17 Yin weyiche cꞌal jix wute wilon noꞌ ẍe ebꞌ tuꞌ.
Jaꞌ ebꞌ eya yibꞌan noꞌ che tuꞌ,
eyoc junjun chꞌen smajiloj xaamscꞌul junjun ebꞌ,
cajin,
yaxin,
cꞌal kꞌan yili chꞌen.
Laan sjolom noꞌ ẍe ebꞌ tuꞌ jaxca sjolom noꞌ león,
chi eltej kꞌakꞌ yetoj mucꞌ cꞌal azufre yul stiꞌ noꞌ ẍe ebꞌ tuꞌ.
18 Jaꞌ jun yet yox tujan ebꞌ ánima jix can bꞌey txꞌotxꞌ txꞌotxꞌ tiꞌ jix cam yu oxebꞌ syaꞌilal chi eltej yul stiꞌ ẍe ebꞌ tuꞌ,
kꞌakꞌ kꞌakꞌ tuꞌ,
mucꞌ tuꞌ,
yetoj azufre tuꞌ.
19 Jaꞌ wan noꞌ tuꞌ,
jaꞌ yin stiꞌ ebꞌ eyoc yipal,
yetoj yin sne ebꞌ.
Jaꞌ sne ebꞌ tuꞌ,
ey sjolom jaxca labꞌa.
Caw chi yetne ebꞌ ánima noꞌ yetoj sne tuꞌ.
20 Jal ebꞌ ánima tol ma cam yu wan syaꞌilal tuꞌ,
cꞌam niꞌoj jix snaꞌ sbꞌa scꞌul ebꞌ yin spenail chi el yuneni.
Ma sbꞌej ebꞌ yalon sbꞌa tet ebꞌ pena espíritu.
Cꞌam pax chi sbꞌej yalon sbꞌa ebꞌ tet tzet chi al-le oc diosal,
wan chi swaꞌne ebꞌ yetoj chꞌen oro,
yetoj chꞌen plata,
cꞌal yetoj chꞌen bronce,
cꞌal yetoj chꞌen chꞌen cꞌal teꞌ teꞌ.
Jaꞌ wan chꞌen dios,
cꞌal teꞌ dios tuꞌ,
cꞌam chi ilwi ebꞌ,
cꞌam pax chi yabꞌ ebꞌ,
cꞌam pax chi skeꞌ sbꞌey ebꞌ.
21 Jaꞌ xol ebꞌ ánima tuꞌ,
ey ebꞌ makꞌom cam ánima,
ey ebꞌ atxum.
Ey ebꞌ mulwom,
ey pax ebꞌ elkꞌom.
Cꞌam cꞌal niꞌoj jix snaꞌ sbꞌa ebꞌ yin spenail.