Jun Yet Sjuj Spixil An Juun
8
Jaꞌ Naj Yuneꞌ Meꞌ tuꞌ,
jaꞌ yet jix snicꞌon el jun yet sjuj spixil jun juun tuꞌ,
nan mi hora tzꞌinini xacꞌal satcan.
2 Catuꞌ jix wilon an,
linan ecꞌ jujwan ángel sattaj Dios.
Jix akꞌle strompeta junjun ebꞌ.
3 Catuꞌ jix jul junxa ángel,
yetoj jun oro txayibꞌ chꞌen bꞌey chi tzꞌaꞌ tzetyetal sukꞌukꞌi sabꞌ.
Jix jul oc linan yetoj sattaj jun smeẍail xaambꞌal.
Caw miman tzettaj yetal sukꞌukꞌi sabꞌ jix akꞌle tet,
yet watxꞌ chi yakꞌ tzꞌaꞌ yibꞌan jun meẍa tuꞌ.
Oro jun meẍa tuꞌ.
Jatuꞌ eyecꞌ sattaj jun despacho.
Jaꞌ yet jix ecꞌ sabꞌ jun tzettaj yetal sukꞌukꞌi sabꞌ tuꞌ,
laan cꞌal pax jix yun stoo yetoj xa ebꞌ yuninal xa Dios.
4 Jaꞌ yul skꞌabꞌ jun ángel tuꞌ jix a smucꞌal tzettaj yetal sukꞌukꞌi sabꞌ tuꞌ yetoj xa ebꞌ yet xa Dios,
jix apni sattaj Dios.
5 Catuꞌ jix yakꞌon no xayibꞌ jun ángel tuꞌ yetoj kꞌakꞌ jix yiꞌon eytej yibꞌan jun smeẍail xaambꞌal tuꞌ,
catuꞌ jix skꞌojon eytoj sat txꞌotxꞌ.
Catuꞌ jix cꞌoli sbꞌilwi cꞌu,
yetoj wanxa chi nilili.
Jix letzꞌlon a cꞌu,
catuꞌ jix ecꞌ jun quixcabꞌ.
Chi El Yaw Wan Chꞌen Trompeta
6 Catuꞌ jix swaꞌnen sbꞌa ebꞌ jujwan ángel tuꞌ yu xuon strompeta ebꞌ.
7 Jix xuꞌ strompeta jun bꞌabꞌel ángel,
catuꞌ eyman jix tit sajbꞌat,
yetoj kꞌakꞌ,
calan yetoj chicꞌ.
Jix eyqꞌuey wan tuꞌ sat txꞌotxꞌ,
yu jun tuꞌ,
yuxan jix tzꞌaꞌtoj jun yet yox tujan yul yibꞌankꞌinal tiꞌ yetoj cꞌal teꞌ teꞌ.
Jal an yaax chꞌim xin,
jix tzꞌaꞌtoj an masanil.
8 Jix xuon strompeta jun yet scaabꞌ ángel,
yuxan ey jun tzetyetal jaxca junoj miman wonan eyoc skꞌakꞌal jix kꞌojle eytoj xol jaꞌ mar.
Yu jun tuꞌ,
yuxan jix chicꞌbꞌitoj jun yet yox tujan jaꞌ mar tuꞌ.
9 Yuxan jaꞌ noꞌ noꞌ yul-laj jaꞌ mar tuꞌ,
jix cam jun yet yox tujan noꞌ noꞌ tuꞌ.
Yetoj pax wan barco,
jix lawi el jun yet yox tujanil.
10-11 Jix xuon strompeta jun yet yox ángel,
yuxan jix titqꞌuey jun miman weycan bꞌey satcan.
Txꞌojwal Skꞌaꞌil sbꞌi.
Caw chi kopxitoj kꞌakꞌ yin stzꞌaꞌtoj jaxca chi yun stzꞌaꞌtoj teꞌ taa.
Jaꞌ jun yet yox tujan jaꞌ mimej jaꞌ chi bꞌeyi,
yetoj cꞌal jaꞌ snukꞌ jaꞌ.
Jaꞌ jaꞌ bꞌey jix eyqꞌuey tuꞌ,
laan jix yun can el jaꞌ jaxca yaal junoj teꞌ txꞌojwal skꞌaꞌil.
Ecꞌal ánima jix cam yu jaꞌ jaꞌ tuꞌ,
yutol caw kꞌaꞌ jix yun cantoj jaꞌ.
12 Jix xuon strompeta jun yet scan ángel tuꞌ,
yuxan jix etex el jun yet yox tujan cꞌu,
cꞌal xꞌaaw,
yetoj weycan.
Catuꞌ jix kꞌejbꞌi eloj.
Yu jun tuꞌ,
yuxan junjun cꞌu yetoj junjun akꞌbꞌal,
jaꞌ jun yet yox tujan jix kꞌejbꞌi eloj.
13 Jix lawi tuꞌ,
jix wilon an,
ey jun ángel chi jeneni ecꞌ snan satcan.
Jix wabꞌen an,
caw ip jix yun ya yaw jaxca tiꞌ:
—¡Ay!
¡Ay!
¡Ay!
Okꞌbꞌalcꞌule ebꞌ ánima yul yibꞌankꞌinal,
yutol oxwanto ángel tol to oj xuꞌ strompeta,
ẍi jun ángel tuꞌ.