Jaꞌ Ebꞌ Jix Ale Oc Selloal Xol Ebꞌ Israel
7
Jix lawi tuꞌ,
jix wilon yin canwan ángel,
linan oc junjun ebꞌ xiquinlaj txꞌotxꞌ txꞌotxꞌ tiꞌ.
Chi stenon oc tucan canebꞌ tujan skaꞌeꞌal yul yibꞌankꞌinal ebꞌ.
Yu ebꞌ tuꞌ,
yuxan cꞌamxa niꞌoj kaꞌeꞌ chi ecꞌ sat txꞌotxꞌ,
cꞌal yibꞌan jaꞌ mar.
Cꞌamxa junoj teꞌ chi bꞌilwi niꞌoj.
2 Catuꞌ jix wilon yaol junxa ángel bꞌey chi aol cꞌu.
Iꞌbꞌil oc sello Dios iquis yu.
Caw ip jix yun yawwi tet ebꞌ ángel scanwanil.
Ebꞌ canwan akꞌbꞌil yopiso yetnentoj tzettaj yetal sat txꞌotxꞌ,
cꞌal yetoj tzettaj yetal yul-laj jaꞌ mar.
Jix yal tet ebꞌ jaxca tiꞌ:
3 —Manche to je yetnetoj tzettaj yetal ey sat txꞌotxꞌ,
cꞌal tzettaj yetal yul-laj jaꞌ mar,
cꞌal teꞌ teꞌ,
masantaꞌcꞌal oj kaoc selloal yin spalan junjun ebꞌ yakꞌomal servil cu Diosal,
ẍi tet ebꞌ.
4 Catuꞌ jix wabꞌen sbꞌisil ebꞌ sellonebꞌilxa,
tol 144,000 ebꞌ.
Jaꞌ ebꞌ tuꞌ,
wet Israelal ebꞌ.
Ey cꞌal yet junjun bꞌulan ebꞌ Israel xol ebꞌ tuꞌ.
5 Lacawebꞌ mil ebꞌ yicꞌaal Judá jix oc selloal.
Lacawebꞌ mil ebꞌ yicꞌaal Rubén.
Lacawebꞌ mil ebꞌ yicꞌaal Gad.
6 Lacawebꞌ mil ebꞌ yicꞌaal Aser.
Lacawebꞌ mil ebꞌ yicꞌaal Neftalí.
Lacawebꞌ mil ebꞌ yicꞌaal Manasés.
7 Lacawebꞌ mil ebꞌ yicꞌaal Simeón.
Lacawebꞌ mil ebꞌ yicꞌaal Leví.
Lacawebꞌ mil ebꞌ yicꞌaal Isacar.
8 Lacawebꞌ mil ebꞌ yicꞌaal Zabulón.
Lacawebꞌ mil ebꞌ yicꞌaal José.
Lacawebꞌ pax mil ebꞌ yicꞌaal Benjamín.
Jix Il-le Ebꞌ Ánima Saj Spichil Yu Naj Juan
9 ix lawi tuꞌ,
jix wilon an.
Ecꞌal ánima eyecꞌ sattaj jun despacho tuꞌ,
yetoj sattaj Naj Yuneꞌ Meꞌ.
Jaꞌ xol ebꞌ tuꞌ ey ebꞌ a junjun nación,
junjun icꞌaale,
junjun tiꞌeal,
cꞌal junjun conobꞌal.
Cꞌamxa chi alcha el jantaj sbꞌisil ebꞌ.
Saj wejinaj xacꞌal yili an jojan pichile eyoc yin junjun ebꞌ.
Iꞌbꞌil a xaj palma yu junjun ebꞌ.
10 Jix a yaw ebꞌ masanil,
jix yalon ebꞌ jaxca tiꞌ:
Jaꞌ cu Diosal chotan ey yul sdespacho.
Jaꞌton Naj chi akꞌon cu colbꞌanil.
Jaꞌ pax Naj Yuneꞌ Meꞌ tiꞌ,
jix akꞌon cu colbꞌanil,
ẍi ebꞌ.
11 Linan a masanil ebꞌ ángel,
catuꞌ joyan oc ebꞌ yin jun despacho,
yetoj ebꞌ anciano,
cꞌal ebꞌ canwan tzetyetal iquis tuꞌ.
Jix ey noan ebꞌ yin eyilal sat txꞌotxꞌ sattaj jun despacho tuꞌ.
Jix cꞌoli yalon ebꞌ tet Dios.
12 Jix yalon ebꞌ jaxca tiꞌ:
Amén.
Al-le ojabꞌ watxꞌ kꞌane tet Dios yin tobꞌalkꞌinal.
Al-le ojabꞌi,
tol miman yeloc apnoj,
tol jelan Naj.
Al-le ojabꞌ yu diosalil tet Naj.
Mimanbꞌanebꞌil Naj,
miman yopiso Naj,
catuꞌ miman pax yipal Naj.
Amén,
ẍi ebꞌ.
13 Jix lawi tuꞌ,
catuꞌ jix skꞌanlen jun anciano ey jin jaxca tiꞌ:
—¿Mactxequel ebꞌ saj spichil tiꞌ cha naꞌ?
¿Bꞌeytuꞌ titnaj ebꞌ cha naꞌ?
ẍi ey jin an.
14 —Jaach ja wotaj,
jaach wuẍtaj.
Jain tiꞌ man wotaj oj an,
jin chi tet naj.
Yu jun tuꞌ xin,
yuxan jix yal ey jin jaxca tiꞌ:
—Jaꞌ ebꞌ tiꞌ,
jaꞌton ebꞌ jix ecꞌ xol mimej syaꞌilal.
Jix iꞌle el spenail ebꞌ yu ẍiqꞌuil Naj Yuneꞌ Meꞌ.
Jaxca tol jix txꞌale el spichil ebꞌ,
catuꞌ caw saj jix yun can el ebꞌ yu ẍiqꞌuil Naj tuꞌ.
15 Yu jun tuꞌ,
eyecꞌ ebꞌ sattaj sdespacho Dios bꞌey sTemplo.
Quey cꞌal tiꞌ yakꞌon servil ebꞌ tituꞌ,
cꞌualil cꞌal akꞌbꞌalil.
Jaꞌ Naj chotan ey yul sdespacho tuꞌ chi teynen ebꞌ,
yutol ey cꞌal ecꞌ yetoj ebꞌ.
16 Ma xa yabꞌ wail ebꞌ,
cꞌal tajin tiꞌal.
Ma xa tzꞌaꞌ ebꞌ yu yajan cꞌu.
Cꞌamxa kꞌakꞌ oj yabꞌ ebꞌ,
17 yutol jaꞌ Naj Yuneꞌ Meꞌ tuꞌ,
jaꞌ eyecꞌ yul snan despacho,
yuxan jaꞌ chi ilon ebꞌ jaxca junoj ilom meꞌ.
Jaꞌ chi iꞌontoj ebꞌ bꞌey jaꞌ jaꞌ yet kꞌinale tol ey cꞌal yin tobꞌalkꞌinal.
Catuꞌ oj joꞌole el yal sat ebꞌ yu Dios,
ẍi Naj ey jin an.