Jaꞌ Naj Chi Yij Yuneꞌ Meꞌ, yetoj Jun An Juun
5
Jaꞌ yet jix wilon yin jun Naj chotan ey yul jun despacho tuꞌ,
ey jun juun chulbꞌil eyoj eyoc yul swatxꞌ kꞌabꞌ.
Tzꞌibꞌebꞌil yul jun juun tuꞌ,
cꞌal yin.
Eyoc jujebꞌ spixil yin stiꞌ.
Yu jun tuꞌ,
cꞌam chi skeꞌ xuyletoj.
2 Ey pax jun ángel jix wil yin caw ey yipal.
Caw ip jix yun skꞌanlen jaxca tiꞌ:
—¿Mac junoj smoo snicꞌontoj wan spixil tuꞌ,
catuꞌ chi sjajon a an juun tuꞌ?
ẍi jun ángel tuꞌ.
3 Cꞌam pax mac bꞌey satcan,
cꞌam pax mac bꞌey sat txꞌotxꞌ,
cꞌam pax yalan txꞌotxꞌ,
cꞌam junoj mactxequel smoo xuyon aoj,
catuꞌ chi yiloni tzet chi yalaꞌ.
4 Caw jix jin okꞌ sicꞌlebꞌil,
yutol cꞌam junoj mactxequel tol smoo xuyon a jun juun tuꞌ,
catuꞌ chi yilon tzet chi yalaꞌ.
5 Ey pax jun anciano jix alon ey jin jaxca tiꞌ:
—Manche jaach okꞌi.
Jaꞌ snan xol ebꞌ yicꞌaal Judá ey jun chi yij León,
jaꞌton jun yicꞌaal naj rey David,
jaꞌ jix akꞌon ganar.
Jaꞌ smoo snicꞌontoj jujebꞌ spixil tuꞌ,
catuꞌ oj xuyon a an juun tuꞌ,
ẍi ey jin an.
6 Jaꞌ snan yul jun despacho tuꞌ,
yetoj snan xol canwan ebꞌ tzetyetal iquis tuꞌ yetoj ebꞌ anciano,
jatuꞌ jix wil yin Naj chi yij Yuneꞌ Meꞌ linan ocoj,
txequel tol makꞌbꞌil camoj,
iquis pax oj.
Jujebꞌ yucꞌaꞌ,
jujebꞌ pax sbꞌakꞌ sat.
Jaꞌ jujebꞌ sbꞌakꞌ sat tuꞌ,
jaꞌton Yespíritu Dios sjujwanil chejbꞌiltoj bꞌey masanil yul yibꞌankꞌinal.a
7 Jaꞌ Naj Yuneꞌ Meꞌ tuꞌ,
jix bꞌet chaꞌon ecꞌ jun juun tuꞌ yul swatxꞌ kꞌabꞌ Naj chotan ey yul jun despacho tuꞌ.
8 Jix ẍaꞌon ecꞌ jun juun tuꞌ,
catuꞌ jix ey kaan ebꞌ canwan tzetyetal iquis tuꞌ yetoj ebꞌ 24 anciano tuꞌ sattaj Naj chi yij Yuneꞌ Meꞌ tuꞌ.
Ey yarpa junjun ebꞌ,
cꞌal junjun oro svaso ebꞌ nonaj yu jun tzetyetal sukꞌukꞌi sabꞌ chi tzꞌaꞌi.
Jaꞌ wan tzetyetal sukꞌukꞌi sabꞌ tuꞌ,
jaꞌton xa ebꞌ yet xa Dios.
9 Jix sbꞌitne ebꞌ jun acꞌ bꞌit chi yal skꞌaneal jaxca tiꞌ:
Jaach tiꞌ,
ja moo ton ja chaꞌon ecꞌ jun juun tiꞌ,
yu ja nicꞌon el wan spixil stiꞌ tiꞌ.
Yutol jaach makꞌbꞌil jaach camoj,
catuꞌ jix ja manon oc ebꞌ ánima yuninal oj Dios yetoj ja chiqꞌuil.
Caw ecꞌal ebꞌ ánima jix ja manel yin junjun icꞌaaleal,
yin junjun tiꞌeal,
yin junjun conobꞌal,
yetoj junjun nación.
10 Jaach jix ja waoc ebꞌ yin reyal.
Jaach jix ja wakꞌ yopiso junjun ebꞌ yakꞌon xaambꞌal tet Dios.
Jaach jix ja waoc ebꞌ yaawilal oj yul yibꞌankꞌinal,
ẍi ebꞌ yin sbꞌit tuꞌ.
11 Jix lawi tuꞌ,
catuꞌ jix wiloni,
ecꞌal ebꞌ ángel joyan oc yin jun despacho tuꞌ yetoj ebꞌ tzetyetal iquis,
cꞌal ebꞌ anciano tuꞌ.
Jix wabꞌ yoc yul snukꞌ ebꞌ masanil.
Ecꞌal mil cꞌal smillonal sbꞌisil ebꞌ.
12 Caw ip yalon ebꞌ jaxca tiꞌ:
Jaꞌ Naj Yuneꞌ Meꞌ jix makꞌle camoj,
caw smoo chi kal yin,
tol ey miman yopiso,
ey sbꞌeomal,
ey pax sjelanil,
cꞌal yip.
Mimanbꞌanebꞌil Naj,
caw miman yeloc apnoj.
Caw smoo ton kalon watxꞌ kꞌane tet,
ẍi ebꞌ.
13 Jix wabꞌ pax yoc yul snukꞌ jantaj ebꞌ waꞌnebꞌil yu Dios bꞌey satcan,
cꞌal bꞌey yul yibꞌankꞌinal,
ebꞌ yul txꞌotxꞌ,
cꞌal yul-laj jaꞌ mar.
Masanil waꞌnebꞌil yu Dios bꞌey wan lugar tiꞌ.
Jix a yaw ebꞌ masanil,
catuꞌ jix yalon ebꞌ jaxca tiꞌ:
Al-le ojabꞌ watxꞌ kꞌane tet Naj chotan ey yul sdespacho,
cꞌal tet Naj Yuneꞌ Meꞌ.
Al-le ojabꞌ yin tobꞌalkꞌinal,
tol mimanbꞌanebꞌil ebꞌ,
miman yeloc apnoj,
asan Yaawil yeoc ebꞌ,
ẍi ebꞌ.
14 Catuꞌ jix yalon ebꞌ tzetyetal iquis tuꞌ jaxca tiꞌ:
—Yun ojabꞌi,
ẍi ebꞌ.
Catuꞌ jix ey kaan ebꞌ 24 anciano tuꞌ,
catuꞌ jix oc ebꞌ yin eyilal /tet jun mac ey cꞌal ecꞌ yin tobꞌalkꞌinal tuꞌ./