Tzet Chi Yun Yiꞌon Ey Sbꞌa Ebꞌ Tet Dios Bꞌey Satcan
4
Jix lawi wan tuꞌ,
catuꞌ jix wilon an,
tol ey jun puerta jajan bꞌey satcan.
Jaꞌ jun bꞌabꞌel jix kꞌanabꞌ a ey jin an,
laan yoc yul snukꞌ jaxca yul snukꞌ trompeta,
jix yal eytej ey jin jaxca tiꞌ:
—Aantej titiꞌ.
Oj jin txꞌox wan tzet tol to oj jul ey jaach an,
ẍi ey jin an.
2 Eyman jix oc Yespíritu Dios wetoj an.
Catuꞌ jix wilon jun despacho bꞌey satcan bꞌey chotan ey jun mactxequel.
3 Jaꞌ Naj chotan ey jix wil tuꞌ,
laan yili sat jaxca junoj chꞌen jaspe sbꞌi,
ma junoj chꞌen cornalina sbꞌi,
caw chi tzejeji yili.
Xoyan oc jun kꞌukꞌulcan chi tzejeji yin jun despacho tuꞌ,
jix wil an,
jaxca junoj chꞌen esmeralda sbꞌi.
4 Jaꞌ scawilal tuꞌ,
jatuꞌ joyan oc 24 mimej ẍila,
jatuꞌ chotan ey 24 anciano jix wil an.
Caw saj spichil ebꞌ.
Eya junjun corona oro yin sjolom ebꞌ.
5 Chi el kopcon kꞌakꞌ yin jun despacho tuꞌ,
jaxca chi yun sletzꞌwa cꞌu.
Chi el yaw,
catuꞌ caw chi nilili jaxca yet chi bꞌilwi cꞌu.
Ey jujebꞌ mimej tzejtebꞌal chi chaw skꞌakꞌal sattaj,
jaꞌton jujwan Yespíritu Dios.
6 Ey pax junxa tzet eyecꞌ sattaj,
laan jaxca junoj jaꞌ jaꞌ bꞌey chi kil tzet ey yul,
jaxca nen.
Jaꞌ snan yul jun despacho tuꞌ cꞌal yinlaj,
ey canwan tzetyetal iquis eyecꞌoj,
nonaj el sattaj ebꞌ cꞌal yintaj ebꞌ yu sbꞌakꞌ sat.
7 Jaꞌ jun bꞌabꞌel,
laan yili jaxca junoj noꞌ león.
Jaꞌ jun yet scaabꞌ,
laan yili jaxca junoj achꞌe wacax.
Jaꞌ jun yet yox,
laan yili sat jaxca sat ánima.
Jal jun yet scan xin,
laan yili jaxca noꞌ chii chi ecꞌ jenenoj.
8 Jaꞌ wan canwan tzetyetal iquis tuꞌ,
wajajtaj xicꞌ junjun.
Nonaj el yin cꞌal yul wan xicꞌ ebꞌ tuꞌ yetoj sbꞌakꞌ sate.
Cꞌualil cꞌal akꞌbꞌalil,
chi cꞌal yal ebꞌ jaxca tiꞌ:
Watxꞌ toni,
watxꞌ toni,
watxꞌ ton Naj Kaawil cu Diosal,
chi cꞌal skeꞌ yu masanil tzetyetal.
Ey cꞌaltaꞌ ecꞌ Naj yet yichbꞌanil,
eyecꞌ Naj tinaniꞌ,
jaꞌton Naj oj juloj,
ẍi ebꞌ chi yalon ebꞌ.
9 Junjun cꞌal el chi yal ebꞌ scanwanil,
tol caw miman yeloc apnoj,
catuꞌ mimanbꞌanebꞌil jun Naj chotan ey yul jun despacho tuꞌ.
Catuꞌ chi yalon pax ebꞌ yu diosalil tet Naj tol ey cꞌal ecꞌ yin tobꞌalkꞌinal tuꞌ.
Junjun cꞌal el chi yal ebꞌ jaxca tuꞌ,
10 catuꞌ chi ey noan ebꞌ 24 anciano tuꞌ sattaj.
Chi yiꞌon ey sbꞌa ebꞌ tet Naj ey cꞌal ecꞌ yin tobꞌalkꞌinal.
Chi sbꞌatxbꞌan ey scorona ebꞌ sattaj.
Catuꞌ chi yalon ebꞌ jaxca tiꞌ:
11 Jaach Kaawil,
jaach cu Diosal,
smoo ton yal-le ja win,
yutol caw miman ja weloc apnoj,
tol mimanbꞌanebꞌil jaach,
catuꞌ tol miman ja wipal.
Yutol jaach jix ja waꞌne masanil tzetyetal,
yuxan ey masanil tzetyetal,
yutol jaxca tiꞌ chi el yin ja cꞌul.
Yu jun tuꞌ,
yuxan waꞌnebꞌil,
ẍi ebꞌ chi yalon ebꞌ tet.