Jaꞌ Tzet Jix Stzꞌibꞌetoj Naj Juan Tet Ebꞌ Creyente A Sardis
3
Jaxca tiꞌ cha wute ja tzꞌibꞌentoj tet jun jin chejabꞌ eyecꞌ snan xol ebꞌ creyente bꞌey conobꞌ Sardis:
“Jaꞌ Naj eyoc jujwan Yespíritu Dios yin,
Naj iꞌbꞌil a jujebꞌ weycan yu,
jaꞌ Naj chi alon ey jex jaxca tiꞌ:
Wotaj masanil tzet chi el je yuneni.
Wotaj,
tol jaꞌ yul sat ebꞌ je yet animail,
iquis jex.
Jal pax yul jin sat,
camnaj jex eloj.
2 Yu jun tuꞌ,
iꞌwej el je weyan.
Caxcꞌal eyto wal niꞌojxa je watxꞌ bꞌeybꞌal chi wil an,
ian wal tol chi tan xacꞌal eloj.
Yu jun tuꞌ,
akꞌwej je yip je yunen wan tuꞌ,
yet watxꞌ cꞌam chi lawi eloj.
Chi waltoj wan tiꞌ ey jex,
yutol jaꞌ wan tzet lalan je yunen tuꞌ,
man tzꞌajanoj yul sat jin Diosal.
3 Yu jun tuꞌ,
naꞌwejtej wan cuybꞌanile jix je yaoc yin je cꞌul yet yalantoj.
Naꞌwej je bꞌa,
awej oc je naꞌbꞌal yin junelxa.
Ta cꞌam chex majwai,
oj jin apnoj ey jex an.
Jaxca chi yun yapni junoj elkꞌom,
cꞌam mac otajneni janicꞌ chi juli,
jaxca tuꞌ oj yun wapni an.
4 Ey wal jaywan jex bꞌey Sardis tuꞌ ma jex etex eloj.
Jaxca junoj mac cꞌam niꞌoj bꞌey chi oc tzꞌil yin spichil,
quey jex tuꞌ.
Yu jun tuꞌ,
oj oc je pichil caw saj sicꞌlebꞌil.
Catuꞌ oj jex ecꞌ wetoj,
yutol je moo toni.
5 Jaꞌ ebꞌ oj yakꞌ ganar yakꞌon techaoj,
oj ale oc jun spichil ebꞌ caw saj.
Man oj jin joꞌqꞌuey sbꞌi ebꞌ yul an libro yet kꞌinale tol ey cꞌal yin tobꞌalkꞌinal.
Oj wal a sattaj jin Mam cꞌal sattaj ebꞌ yángel tol wet ebꞌ an.
6 Masanil mac chi abꞌeni,
ya ojabꞌ oc xiquin yin tzet chi yal Naj Espíritu tet junjun iglesia.”
Jaꞌ Tzet Jix Stzꞌibꞌetoj Naj Juan Tet Ebꞌ Creyente A Filadelfia
7 Jaxca tiꞌ cha wute ja tzꞌibꞌentoj tet jun jin chejabꞌ eyecꞌ snan xol ebꞌ creyente bꞌey conobꞌ Filadelfia:
“Jaꞌ Naj caw watxꞌ cꞌal,
Naj caw yel,
jaꞌ Naj inen a slawe naj rey David,a
jaꞌ yet chi sjajoni,
cꞌam mac chi skeꞌ smajcheni,
jaꞌ yet chi smajcheni,
cꞌam mac chi skeꞌ sjajoni,
jaꞌ Naj chi alon ey jex jaxca tiꞌ:
8 Wotaj masanil tzet chi el je yuneni.
Ey jun puerta jix jin jaj je sattaj.
Cꞌam mac chi skeꞌ smajcheni.
Wotaj,
caxcꞌal txenne je yipalil,
jijem jex cꞌal pax tet jin kꞌane.
Cꞌam bꞌey jix je yiꞌ jin el je yin.
9 Jaꞌ ebꞌ chi akꞌon servil Satanás,
jaꞌ ebꞌ chi yaloc sbꞌa sconobꞌoj Dios,
jaꞌton ebꞌ lekꞌtiꞌwom oj watoj ebꞌ ey jex tuꞌ,
catuꞌ oj ey kaan ebꞌ je sattaj.
Oj wun tet ebꞌ jaxca tuꞌ an,
yet watxꞌ chi naꞌcha el yu ebꞌ,
tol camcꞌulnebꞌil jex wu an.
10 Yutol jix je jije jin chejbꞌanil,
yet jix walon ey jex an,
tol caw che tecꞌbꞌa je bꞌa.
Yu jun tuꞌ,
oj jex jin colel yul skꞌabꞌ jun miman syaꞌilal oj jul bꞌey masanil yul yibꞌankꞌinal tiꞌ.
Jaꞌ jun syaꞌilal tuꞌ oj akꞌon porobꞌal masanil ánima bꞌey yul yibꞌankꞌinal tiꞌ.
11 Tuxa oj jin apnoj.
Yu jun tuꞌ,
teynewej cꞌal wan xax waꞌxi je yu tuꞌ,
yet watxꞌ cꞌam mac oj skeꞌ yiꞌon ecꞌ je pajtzebꞌal.
12 Jaꞌ ebꞌ oj yakꞌ ganar yakꞌon techaoj,
jaxca wan yoyal yul sna jin Diosal,
jaxca tuꞌ,
oj yun yeloc ebꞌ wu an,
yutol cꞌamxa bꞌakꞌin oj eltej tituꞌ.
Oj jin tzꞌibꞌe oc sbꞌi jin Diosal yin ebꞌ,
cꞌal sbꞌi sconobꞌ,
jun acꞌ Jerusalén oj eyol satcan,
bꞌey eyecꞌ jin Diosal.
Catuꞌ oj jin tzꞌibꞌen pax oc jin acꞌ bꞌi yin ebꞌ.
13 Masanil mac chi abꞌeni,
ya ojabꞌ oc xiquin yin yabꞌen tzet chi yal Naj Espíritu tet junjun iglesia.”
Jaꞌ Tzet Jix Stzꞌibꞌetoj Naj Juan Tet Ebꞌ Creyente A Laodicea
14 Jaxca tiꞌ cha wute ja tzꞌibꞌentoj tet jun jin chejabꞌ eyecꞌ snan xol ebꞌ creyente bꞌey conobꞌ Laodicea:
“Jaꞌ Naj caw yel.
Naj caw watxꞌ chi yute yakꞌon sbꞌa testigoal,
tol asan yel chi yalaꞌ.
Asanne Naj jix waꞌnen masanil tzettaj yetal yetoj Dios.
Jaꞌ Naj chi alon ey jex jaxca tiꞌ:
15 Wotaj masanil tzet chi el je yuneni.
Laan jex jaxca junoj tzet chi loꞌolei,
man kꞌaxan oj,
catuꞌ man pax siicoj.
Tol oj wal kꞌaxan jex,
ta cꞌamaj xin,
tol oj wal siic jex.
16 Jaꞌ tinaniꞌ,
laan jex jaxca junoj tzetyetal tol siic labꞌinaj,
tol cꞌam yopiso.
Yu jun tuꞌ jaxca tol oj jex tzubꞌele eloj.
17 Yutol lalan je yalon jaxca tiꞌ:
Jaon tiꞌ,
caw bꞌeom jon yul sat Dios.
Caw watxꞌ jon.
Cꞌam niꞌoj tzet sowalil ku,
je chi che yaloni.
Cꞌam cꞌal niꞌoj chi naꞌcha el je yu,
tol cꞌam niꞌoj je watxꞌil,
catuꞌ cꞌam niꞌoj je yeloc apnoj.
Yu jun tuꞌ,
yuxan cꞌam niꞌoj tzet ey,
ey jex,
cꞌam chi skeꞌ je yilwi,
catuꞌ tꞌiran jex eloj.
18 Yu jun tuꞌ,
yuxan chi wal ey jex an,
waꞌnewej je bꞌa.
Ta che waꞌne je bꞌa,
jaxca tol oj je man oro txicbꞌil xa el stzꞌilal ey jin an,
yet watxꞌ oj je chaꞌ je bꞌeomal yin yel.
Jaxca tol oj je man pax jun je pichil caw saj ey jin an,
yet watxꞌ cꞌam chex qꞌuixwi.
Ilaꞌ tol jaxca tol tꞌiran jex eloj.
Yetoj pax oj,
jaxca tol oj je man yanil je sat ey jin,
yet watxꞌ chex ilwi.
19 Jaꞌ masanil mac chi cam jin cꞌul yin,
chin tenchane ebꞌ,
catuꞌ chi wakꞌon pax cuenta ebꞌ.
Yu jun tuꞌ,
naꞌwej je bꞌa,
catuꞌ che yaon oc je naꞌbꞌal win an.
20 Abꞌwej,
jaxca tol lalan wawi octoj stiꞌ puerta.
Ta ey mac chi abꞌen wawi octoj,
catuꞌ chi sjajon spuerta tuꞌ ey jin an,
oj jin octoj yetoj.
Oj jin low yetoj,
catuꞌ oj low pax wetoj an.
21 Jaꞌ ebꞌ oj akꞌon ganar oj jin chotbꞌa ey ebꞌ bꞌey jin despacho wetoj an,
jaxca wutenaj pax wakꞌon ganar,
catuꞌ jix jin ey chotan yetoj jin Mam bꞌey sdespacho.
22 Masanil mac chi abꞌeni,
ya ojabꞌ oc xiquin yin tzet chi yal Naj Espíritu tet junjun iglesia.”