Jaꞌ Tzet Smoo Chi Sbꞌeybꞌalne Masanil Ebꞌ Creyente
5
Manche ja tzuꞌ ebꞌ naj ichamtaj winaj.
Jej oc snaꞌbꞌal ebꞌ yin watxꞌcꞌulalil jaxca cha wute ja walon junoj tzetyetal tet ja mam.
Cꞌal tet ebꞌ naj achꞌetaj winaj,
watxꞌ cꞌal cha wute ja walon yabꞌ ebꞌ naj,
jaxca cha wute ja walon yabꞌ junoj caw ja wuẍtaj.
2 Jacꞌalaꞌ pax tet ebꞌ ix ixnamil ix xa,
jaxca cha wute ja walon yabꞌ ja txutx.
Cꞌal tet ebꞌ ix kꞌopo ix,
watxꞌ cꞌal cha wute ja walon yabꞌ ebꞌ,
jaxca tet junoj caw ja wanabꞌ.
Man ojabꞌ caabꞌ sat oj cha wute kꞌanabꞌ ja bꞌa tet ebꞌ.
3 Chi wal pax toj wan chejbꞌanile tiꞌ ey jaach yu ebꞌ ix ix camnajxa yichamil.
Jaꞌ ebꞌ junelne tol xꞌojli,
sowalil chi cu colwa tet ebꞌ ix.
4 Ta ey ebꞌ ix ey yuneꞌ,
ma yi,
sowalil cha cuy ebꞌ unin tuꞌ ma ebꞌ ix tuꞌ,
tol jaꞌ scuenta ebꞌ yakꞌon colwal tet smam cꞌal tet xutx,
yu yakꞌon spaj ebꞌ tzet jix akꞌle tet ebꞌ.
Ta chi sbꞌeybꞌalne ebꞌ jaxca tiꞌ,
caw watxꞌ yul sat Dios.
Caw chi tzala yetoj ebꞌ.
5 Ey ebꞌ chi cam yichamil caw yel xꞌojli xacꞌal.
Asanxane cꞌal Dios chi yaoc ebꞌ yipoj scꞌul.
Cꞌualil cꞌal akꞌbꞌalil txa cꞌal chi yun ebꞌ tet Dios,
yu skꞌanon tzet chi oc yu ebꞌ.
6 Ey pax ebꞌ camnajxa yichamil chi yakꞌ snaꞌbꞌal ebꞌ yin tzet chi yoche scꞌul.
Caxcꞌal iquis ebꞌ yul sat ánima,
jal pax yul sat Dios camnajxa el ebꞌ.
7 Chi cam ja walon wan cuybꞌanile tiꞌ tet ebꞌ tituꞌ,
yet watxꞌ cꞌam ojabꞌ mac pena tzet chi alon yin ebꞌ.
8 Ta ey ebꞌ creyente cꞌam chi colwa tet smam cꞌal xutx,
ma tet yican,
cꞌal tet ebꞌ eyecꞌ yetoj yul sna,
ta tol cꞌam chi colwa tet ebꞌ,
cꞌam niꞌoj yeloc apnoj scuybꞌanil Cristo yu ebꞌ,
chi yal tuꞌ.
Catuꞌ yel ecꞌbꞌan pena ebꞌ yintaj ebꞌ man creyenteoj.
9 Jaꞌ ebꞌ ix camnajxa yichamil oj waltoj tiꞌ,
chi skeꞌ yoc ebꞌ scargo oj iglesia.
Ebꞌ ix eyxa sesenta abꞌil skꞌinal,
ebꞌ ix asan jun yichamil jix yiꞌ.
10 Ebꞌ ix miman txequel tol watxꞌ sbꞌeybꞌal sattaj yet creyenteal.
Ebꞌ watxꞌ jix yun yilon chꞌibꞌ yuneꞌ,
ebꞌ ix jix bꞌeybꞌalne akꞌo posada.
Ebꞌ jix yakꞌ servil yet creyenteal yin watxꞌcꞌulal,
ebꞌ jix colwa tet ebꞌ eyoc yin syaꞌilal,
ebꞌ watxꞌ cꞌal jix yute sbꞌa tobꞌalkꞌinal.
Asan ebꞌ ix tiꞌ chi skeꞌ yoc scargo oj iglesia.
11 Jal pax ebꞌ kꞌopo ix to xin,
catuꞌ chi cam yichamil,
man ja chaꞌoc ebꞌ scargo oj iglesia.
Yutol ey ebꞌ,
jaꞌ tzet chi yoche scꞌul chi sbꞌeybꞌalne,
catuꞌ chi sbꞌejoncan Cristo ebꞌ.
Asan junojxa yichamil ebꞌ chi snaꞌ.
12 Oj naꞌle oc yin ebꞌ,
yutol cꞌamxa chi yaoc scꞌul ebꞌ yin Naj Kaawil jaxca yet sbꞌabꞌelal.
13 Yetoj pax oj,
chi yilel isail ebꞌ ix.
Asanxane kꞌane chi yil yun ebꞌ ix xol-laj na.
Man asanne oj tol chi yilel isail ebꞌ ix,
tol chi yaltoj yet ebꞌ ix xol junoj tzetyetal bꞌey cꞌam yalon yet.
Catuꞌ chi yalon pax tzet man watxꞌoj ebꞌ ix.
14 Yuxan chi woche tol jaꞌ ebꞌ ix kꞌopo ix to camnajxa yichamil,
watxꞌ chi yiꞌ yichamil ebꞌ ix junelxa.
Uneꞌwoj ojabꞌ ebꞌ ix.
Mulna ojabꞌ ebꞌ ix yul sna.
Ta chi sjije ebꞌ jaxca chi yun walon tiꞌ an,
cꞌam tzet chi skeꞌ yalon ebꞌ acꞌul oc kin yu ebꞌ ix.
15 Chi waltoj wan tiꞌ ey jaach,
yutol ey ebꞌ ix camnajxa yichamil meltzonajxa yintaj.
Jaꞌ naj Satanás chi yakꞌ servil ebꞌ ix tinaniꞌ.
16 Jaꞌ jantaj creyente a conobꞌ tituꞌ,
caxcꞌal winaj,
ma ix,
ta ey junoj ix ix camnajxa yichamil eyecꞌ yintaj ebꞌ,
sowalil chi colwa ebꞌ tet ix.
Yutol man smoo oj ta jaꞌ iglesia chi cargonen ebꞌ.
Asan tet ebꞌ ix caw xꞌojli xacꞌal,
asan tet ebꞌ ix tuꞌ smoo chi colwa iglesia,
yutol manaj iglesia a cuenta yin ebꞌ ix masanil.
17 Jaꞌ ebꞌ anciano watxꞌ yakꞌon cuenta yet creyenteal,
sowalil ey ojabꞌ yeloc apnoj ebꞌ yul sat yet creyenteal masanil.
Jacꞌalaꞌ pax ebꞌ anciano chi yakꞌ yip scuywai,
cꞌal yalon el skꞌane Dios,
yel ojabꞌ miman yeloc apnoj ebꞌ yul sat yet creyenteal.
18 Chi ojabꞌ pax yakꞌ scolwal ebꞌ,
yutol chi yal yul An Juun jaxca tiꞌ:
“Manche je yaoc spail stiꞌ noꞌ noꞌ yet chi tecꞌwi tiriw noꞌ,”
ẍi yul An Juun.a
Catuꞌ chi yalon pax An jaxca tiꞌ:
“Jaꞌ ebꞌ mulnawom,
ey yalon yet ẍaꞌon stool ebꞌ,”
ẍi yul An Juun tuꞌ.b
19 Ta ey mac chi akꞌon queja junoj anciano,
sowalil ey ojabꞌ cawanoj ma oxwanoj testigo.
Ta cꞌam cawan,
oxwan testigo tuꞌ,
man ja chaꞌ ja wabꞌ tzet chi yal yin naj tuꞌ.
20 Ta ey mac cꞌam chi sbꞌejcan yunen spenail,
cha tenchane sattaj ebꞌ creyente masanil,
yet watxꞌ chi xiw ebꞌ masanil yoc spenail.
21 Sattaj Dios,
yetoj sattaj Naj Kaawil Jesucristo,
cꞌal sattaj ebꞌ yángel sicꞌbꞌil can el yu,
chi cam walontoj ey jaach,
tol cha jije wan chejbꞌanil tiꞌ.
Jun laan cha wute ja cꞌul yin mac chi oc acꞌulal ja win yetoj mac watxꞌ ja wakꞌon yetoj.
22 Man comonoj cha waoc yopiso junoj mactxequel yin eymanil,
yet cꞌamto chi cam ja wilon sbꞌeybꞌal,
yutol jaxa tala chi yunne chach loc chatoj xol spenail tuꞌ.
Iꞌel ja bꞌa yin yal cꞌal tzet cꞌam swatxꞌil.
23 Chi waltoj ey jaach yu ja cꞌul,
ilaꞌ,
tol yaꞌ cꞌal.
Man ojabꞌ asanne oj jaꞌ jaꞌ cha wuqꞌue.
Watxꞌ ta cha wucꞌ niꞌoj vino,
yet watxꞌ chi waꞌxi ja cꞌul tuꞌ.
24 Ey mac miman txequelxa spenail yet cꞌamto chi naꞌle oc yin.
Ey mac xin,
masantaꞌcꞌal chi naꞌle oc yin,
catuꞌ chi txeclo a spenail.
25 Quey pax tuꞌ ebꞌ watxꞌ sbꞌeybꞌal,
miman txequelxa ebꞌ tol watxꞌ sbꞌeybꞌal ebꞌ.
Ta ey ebꞌ watxꞌ sbꞌeybꞌal cꞌamto chi txeclo eloj,
sowalil oj txeclo cꞌaltaꞌ el ebꞌ.