Jaꞌ jun libro tiꞌ jix tzꞌibꞌelecan yet abꞌil 52 d.C. Jaꞌ naj Pablo jix tzꞌibꞌencan yet eyecꞌ naj bꞌey conobꞌ Corinto.

Scaabꞌ Tesalonicenses sbꞌi jun carta tiꞌ, jaꞌton an scaabꞌ carta naj Pablo tet ebꞌ creyente bꞌey conobꞌ Tesalónica. Ey ebꞌ tucꞌal jix somcha a snaꞌbꞌal ebꞌ yu tzet chi yal an bꞌabꞌel carta. Jaꞌ jix yute snaꞌon ebꞌ tol tuxa wal chi jul Cristo. Yu jun tuꞌ, jix stzꞌibꞌe pax toj junxa carta tiꞌ tet ebꞌ yet chi yotajne el ebꞌ sicꞌlebꞌil.

Jix yalon yu diosalil naj Pablo tet Dios yu ebꞌ creyente bꞌey Tesalónica tuꞌ, yutol caw eyoc snaꞌbꞌal ebꞌ yin Dios, chi scamcꞌulne pax sbꞌa ebꞌ. Jix yalon naj tol tuxa wal oj yetnetoj snaꞌbꞌal ebꞌ ánima, catuꞌ oj xꞌoxon a sbꞌa jun naj syaawil spenail chi jowi oc yin Cristo, asan tol tꞌinan ye tol oj akꞌle lawoj ey naj yu yipalil Cristo.

Jaxa yin slawubꞌal xin, jix yal naj Pablo tol sowalil chi txali ebꞌ creyente. Jix yalon pax toj naj tol sowalil chi mulna ebꞌ, jaxca yutenaj sbꞌa naj yet ecꞌnaj naj xol ebꞌ yetoj wanxa ebꞌ jaꞌjun yetoj naj.