Jaꞌ jun libro tiꞌ jix tzꞌibꞌelecan yet abꞌil 51 d.C. Jaꞌ naj Pablo jix tzꞌibꞌencan yet eyecꞌ naj bꞌey conobꞌ Corinto.

Bꞌabꞌel Tesalonicenses sbꞌi jun carta tiꞌ, jaꞌton bꞌabꞌel scarta naj apóstol Pablo tet ebꞌ creyente bꞌey jun miman conobꞌ Tesalónica ey yul yet Macedonia bꞌey yul scuenta Roma. Jix el yich jun iglesia tuꞌ yu naj, jaꞌ yet tuꞌ jix ujtele el naj yu ebꞌ Israel bꞌey conobꞌ Filipos, yutol chi yalel skꞌane Dios naj tet ebꞌ man Israeloj. Jaꞌ yet jix apni oc naj bꞌey conobꞌ Corinto, jix apni skꞌumal xol ebꞌ creyente bꞌey iglesia bꞌey Tesalónica tuꞌ, yu jun tuꞌ yuxan jix stzꞌibꞌetoj jun carta naj Pablo tet ebꞌ yet chi akꞌle stecꞌanil ebꞌ yin screyenteal.

Caw jix tzala naj yu ebꞌ, jix yakꞌon yu diosalil yu ebꞌ, yutol caw eyoc snaꞌbꞌal ebꞌ yin skꞌane Dios, chi scamcꞌulne pax sbꞌa ebꞌ. Jix yakꞌon naj snaꞌtej ebꞌ tzet jix yun yecꞌ xol ebꞌ yet yalantoj. Jix lawi tuꞌ, jix yakꞌon spaj tet ebꞌ tzet wal oj yun sjul Cristo yet scaelal yetoj pax tzet oj yun spitzcꞌu a ebꞌ creyente camnajxa. Jix yalon pax naj tet ebꞌ creyente tuꞌ tol caw chi stecꞌbꞌa sbꞌa ebꞌ yetoj jun cuybꞌanile tiꞌ, yet watxꞌ ey yalon yet ebꞌ yet oj jul Cristo yet scaelal.