Jaꞌ jun libro tiꞌ jix tzꞌibꞌelecan yet abꞌil 60-61 d.C. Jix stzꞌibꞌetoj naj Pablo tet ebꞌ creyente yet eyoc naj preso. Jaꞌ jun iglesia tuꞌ jix el yich yu ebꞌ ocnaj yin creyenteal yu Pablo yet eyecꞌ naj bꞌey conobꞌ Éfeso. Jix yabꞌ skꞌumal naj Pablo tol abꞌ ey wanxa ebꞌ cuywawom chi aloni tol sowalil chi cu kꞌan scolwal wanxa espíritu ketoj yet watxꞌ chi kotajne el Dios sicꞌlebꞌil. Chi yalon ebꞌ tol sowalil chi cu waꞌxi circuncidar, chi cu naꞌontej scꞌual wan kꞌin cꞌal yu tzet chi cu loꞌ cꞌal tzet chi kuqꞌueꞌ.

Yu jaxca tuꞌ yuxan jix stzꞌibꞌetoj jun carta naj Pablo tet ebꞌ creyente tuꞌ, tol jaꞌ watxꞌ kꞌane yin Cristo, cꞌam chi ẍaꞌle sbꞌa yetoj tzet chi yal ebꞌ ánima tuꞌ, yutol jaꞌ Cristo tzꞌajan chi yun yakꞌon cu colbꞌanil. Jal pax jun cuybꞌanile chi yal ebꞌ ánima tuꞌ xin, naat chi cu yiꞌcan el yintaj Cristo.

Jaꞌ Cristo jix kꞌanbꞌalnele yu Dios yet jix waꞌxi masanil tzetyetal, jacꞌalaꞌ pax tinaniꞌ chi kꞌanbꞌalnele Cristo yet chi oc ebꞌ ánima yul skꞌabꞌ Dios. Yu jun tuꞌ, jaꞌ mac junxane yeoc yetoj Cristo, ey skꞌinal yin junelne, chi txeclo eloj tol chi qꞌuexcha can sbꞌeybꞌal yu Cristo. Jix lawi tuꞌ xin, jix aletoj scawil scꞌul ebꞌ creyente yu naj Pablo. Jaꞌ naj Tíquico jix iꞌontoj jun carta tiꞌ yu naj Pablo, jacꞌalaꞌ naj jix iꞌontoj an carta tuꞌ bꞌey conobꞌ Éfeso, jaꞌjun cꞌal pax naj Onésimo yetoj.