Tzalajonwej Yin Naj Kaawil
4
Jex wuẍtaj,
jex wanabꞌ,
caw camcꞌulnebꞌil jex wu an.
Caw chi woche chex too wil an,
yutol jin tzalacꞌulal je yeocoj.
Jin pajtzebꞌal je ye pax oj.
Yuxan,
jex camcꞌulnebꞌil wu an,
caw tecꞌan che yute je bꞌa je yaon oc je cꞌul yin Naj Kaawil.
2 Jaꞌ tinaniꞌ,
chi cam waltoj tet ix Evodia yetoj tet ix Síntique,
yet watxꞌ junxane ojabꞌ chi yute snaꞌbꞌal ebꞌ,
yutol sno sbꞌa ebꞌ yul skꞌabꞌ Naj Kaawil.
3 Jaach wuẍtaj,
ket mulnawomal,
chin kꞌan ey jaach,
tol chach colwa ja waꞌnen el ebꞌ kanabꞌ tituꞌ,
yutol jaꞌ cawan ebꞌ kanabꞌ tuꞌ,
caw jix stecꞌbꞌa sbꞌa ebꞌ smulna wetoj yet jix jin ecꞌ walon el skꞌaneal yet colbꞌanile.
Yetoj pax oj,
jix mulna naj Clemente wetoj,
cꞌal wanxa ebꞌ jix mulna pax wetoj.
Jaꞌ ebꞌ tuꞌ,
tzꞌibꞌebꞌilxatoj sbꞌi ebꞌ yul an libro bꞌey tzꞌibꞌebꞌil xa ey cu bꞌi,
jaon eyxa cu kꞌinal tol ey cꞌal yin tobꞌalkꞌinal tiꞌ.
4 Tzalajonwej yin Naj Kaawil tobꞌalkꞌinal.
Chi wal junelxa an,
tol caw chi cu tzalai.
5 Sowalil caw watxꞌ chi kute cu naꞌbꞌal yil masanil ánima,
yutol janicꞌxane catuꞌ oj jul Naj Kaawil.
6 Manche cu oc il yu junoj tzetyetal.
Kalwej masanil tzet chi cu naꞌ tet Dios yet chi cu txali.
Jaꞌ yet chi cu kꞌanon tzetyetal tet,
sowalil chi kal pax yu diosalil tet.
7 Ta jaxca tuꞌ chi kute cu bꞌa,
ey watxꞌcꞌulal snan cu xol yetoj Dios.
Jaꞌ cu watxꞌcꞌulal eyoc cu xol tuꞌ,
cꞌam chi naꞌcha el ku,
yutol cꞌamxa chi alcha eloj,
jantaj.
Ta ey watxꞌcꞌulal cu xol,
teynebꞌil cu pixan,
cꞌal cu naꞌbꞌal,
yutol yet jon xa Cristo Jesús.
Kawej Oc Cu Naꞌbꞌal Yin Wan Tzetyetal Watxꞌ
8 Jaxa tinaniꞌ,
jex wuẍtaj,
jex wanabꞌ,
kawej oc cu naꞌbꞌal yin masanil tzetyetal yel,
jaꞌ wan smoo tol ey yeloc apnoj yul cu sat,
jaꞌton masanil tzetyetal jichan,
masanil tzetyetal cꞌam spenail,
cꞌal masanil tzetyetal watxꞌ,
yetoj tzetyetal miman yeloc apnoj.
Yetoj pax masanil tzet watxꞌ yul sat Dios,
yetoj wan smoo yal-le watxꞌ kꞌane yin.
Jaꞌ yin wan tuꞌ chi kaoc cu naꞌbꞌal.
9 Bꞌeybꞌalnewej wan cuybꞌanile yetoj wanxa tzet jix wal can ey jex an.
Masanil cꞌal wan tzet jix wal can ey jex an,
cꞌal tzet jix je yil pax oj,
jaꞌ che bꞌeybꞌalne.
Ta jaxca tuꞌ chi el je yuneni,
oj oc Dios je yetoj.
Jaꞌ Dios chi waꞌneni,
yet watxꞌ ey watxꞌcꞌulal cu nan cu xol yetoj.
Wan Saꞌbꞌeal Chabꞌil Yu Naj Pablo
10 Jaꞌ tinaniꞌ,
caw chin tzala yin Naj Kaawil,
yutol jix jin je naꞌtej junelxa,
yet jix je yaontej je colwal ey jin an.
Wotaj tol tucꞌaltaꞌ naꞌan jin je yu,
cꞌam pax bꞌey che yatej je colwal ey jin an,
yutol ma skeꞌ je yaontej.
11 Tucꞌal chi waltoj wan tiꞌ ey jex.
Man yu oj tol cꞌam tzet ey jin,
yuxan chi waltoj ey jex.
Yutol jix jin cuy jin bꞌa wakꞌon tzala jin cꞌul yin tzet ey,
ey jin an.
12 Chi cꞌal el wakꞌlen porobꞌal masanil.
Ey bꞌey cꞌam niꞌoj tzet ey,
ey jin.
Ey bꞌey xin,
caw chi yakꞌ pax sobra.
Yuxan,
caxcꞌal nonaj jin cꞌul,
chi yakꞌ sobra tzet ey,
ey jin,
caxcꞌal chi wakꞌ wail,
cꞌam niꞌoj tzet chin loꞌ,
tol caw qꞌueynaj jin xa chi techa wu,
catuꞌ chin tzala yu bꞌey cꞌal tet chi tit wibꞌan an.
13 Masanil cꞌal tzet chi skeꞌ ku,
yutol chi yakꞌ yipal Cristo ey jon.
14 Jal jex jaex tiꞌ,
watxꞌ tzet jix el je yuneni,
yutol jix je yatej je colwal ey jin an,
yet ey jin oc yin syaꞌilal tiꞌ.
Jaꞌ tinaniꞌ,
jaxca tol jaex jun lalan je yabꞌen syaꞌil wetoj titiꞌ an.
15 Jex a Filipos,
je yotaj xa,
jaꞌ yet jix jin chaꞌon el yich walon el skꞌaneal yet colbꞌanile je xol,
catuꞌ yet jix jin tit Macedonia,
caw jix jex colwa win an.
Asan jex jix je yakꞌ jin gasto tituꞌ.
16 Jacꞌalaꞌ yet jix jin ecꞌ bꞌey Tesalónica,
jix je yatoj junel,
cael je colwal ey jin yu jin gasto tituꞌ an.
17 Manaj je colwal tuꞌ chin seyaꞌ,
manaj chi woche,
yuxan chi waltoj wan tiꞌ ey jex.
Jaꞌ jun tiꞌ chi woche tol caw miman chi yun spajtzen Dios wan che yakꞌ tiꞌ ey jin an.
18 Jain tiꞌ,
miman tzet jix el jin chaꞌoni,
tol tax chi yakꞌ xacꞌal sobra ey jin tinaniꞌ.
Jaꞌ jun je colwal jix jul yakꞌ naj Epafrodito tiꞌ,
kꞌojbꞌil cꞌal chi colwa ey jin an.
Jaxca junoj tzet chi akꞌle tet Dios,
caw sukꞌukꞌi yecꞌ sabꞌ,
ma jaxca junoj xaambꞌal caw watxꞌ,
jaxca tuꞌ jun je colwal tiꞌ,
yutol caw chi tzala Dios yetoj.
19 Yuxan,
oj yakꞌ cu Diosal masanil cꞌal tzet chi oc je yu.
Yutol miman tzet watxꞌ ey yul skꞌabꞌ.
Jaꞌton wan tuꞌ chi yakꞌ ey jon jaon yet jon xa Cristo Jesús tiꞌ.
20 Miman ojabꞌ yeloc apnoj cu Diosal tobꞌalkꞌinal,
jaꞌton Naj cu Mam.
Amén.
Chi Too Scawil Scꞌul Ebꞌ A Filipos
21 Chi watoj scawil je cꞌul je masanil jex yet jex xa Dios a conobꞌ tituꞌ,
jex junxane je yeoc yetoj Jesucristo.
Tol chi ya pax toj scawil je cꞌul ebꞌ kuẍtaj eyecꞌ wetoj titiꞌ an.
22 Yetoj pax ebꞌ yet xa Dios titiꞌ,
cꞌal ebꞌ creyente chi mulna bꞌey naj yaaw Roma tiꞌ,
tol chi ya pax toj scawil je cꞌul ebꞌ.
23 Chi woche ey ojabꞌ ecꞌ swatxꞌcꞌulal Naj Kaawil Jesucristo je yetoj je masanil tituꞌ.