Jaꞌ libro Efesios tiꞌ, jix tzꞌibꞌelecan yet abꞌil 60-62 d.C. Jaꞌ naj Pablo jix tzꞌibꞌencan yet eyoc naj preso bꞌey Roma.

Jaꞌ jun carta tiꞌ ey caabꞌ tujan yeocoj. Jaꞌ jun bꞌabꞌel tujan chi el yich bꞌey 1:3, chi apni oc bꞌey 3:21, chi yalaꞌ tol junxane yeoc yiglesia Cristo, jaꞌton ebꞌ Israel yetoj ebꞌ man Israeloj. Yutol jaꞌ xol ebꞌ tuꞌ jatuꞌ sicꞌbꞌil eltej ebꞌ sconobꞌ Dios, ebꞌ tol akꞌbꞌil xa lawoj spenail, ebꞌ tol colbꞌilxa el yul skꞌabꞌ spenail yu Jesucristo. Jaxa Naj Santo Espíritu eyoc kin, jaꞌ chi txꞌoxoni tol chi yakꞌ eloc bꞌey yakꞌnaj can stiꞌ Dios.

Jaxa yet scaabꞌ tujan xin, chi yal naj Pablo tet ebꞌ creyente a Éfeso, tol chi xꞌoxel ebꞌ yin sbꞌeybꞌal, tol junxane yeoc ebꞌ yin Cristo. Jaꞌ iglesia jaxca wal tol junxane mimanile yeocoj, jaxa Cristo jolome yeocoj, jaxca junoj na chi waꞌxi, jaxa Cristo, laan jaxca junoj chꞌen chꞌen chi eycantoj yipoj xeꞌ junoj na, yutol miman yeloc apnoj. Jaꞌ iglesia laan jaxca junoj ix istile, jaxa Cristo laan jaxca junoj naj ichamile. Caw wal ey scamcꞌulal Cristo yin ebꞌ creyente. Yu jun tuꞌ xin, smoo chi yal watxꞌ kꞌane ebꞌ creyente tet Dios, yutol chi akꞌle stecꞌanil snaꞌbꞌal ebꞌ yin screyenteal. Jaxca chi yun stecꞌbꞌan sbꞌa ebꞌ soldado yetoj smitxꞌkꞌabꞌ yet jowal.