3 Kalwej watxꞌ kꞌane tet cu Mam Dios,

Smam Naj Kaawil Jesucristo.

Jaꞌ Dios jix akꞌon masanil wan swatxꞌilal yet Naj Espíritu ey jon,

wan tzetyetal ey satcan,

yutol junxane keoc yetoj Cristo tinaniꞌ.

4 Sicꞌbꞌil jon xa el yu Dios yin Cristo,

yet tax cꞌamto chi waꞌxi yul yibꞌankꞌinal tiꞌ,

yet watxꞌ asanne Naj ey yalon yet kin.

Cꞌamxa niꞌoj cu penail yul sat Naj.

5 Miman scamcꞌulal Naj kin.

Yuxan,

peyxa tax jix snaꞌ,

tol oj cu oc yuninal oj yu Jesucristo,

yutol jaxca tuꞌ jix el yin scꞌul.

6 Yu jun tuꞌ,

yuxan chi kal watxꞌ kꞌane tet Dios,

yutol caw miman yeloc apnoj swatxꞌcꞌulal naj.

Jix xꞌox swatxꞌcꞌulal Dios ey jon,

yutol junxane keoc yetoj Scꞌaal,

Naj caw camcꞌulnebꞌil yu.

7 Yu smimancꞌulal Dios tuꞌ,

yuxan jix cu col-le el yu ẍiqꞌuil Scꞌaal,

yet jix cam Naj cu yaꞌiloj.

Jix tancan el cu penail yu.

8 Yu swatxꞌcꞌulal Naj tuꞌ,

jix cꞌal yakꞌ sjelanil Naj ey jon.

Jix yakꞌon Naj naꞌcha el ku.

9 Ey jun tzet jix naꞌle yu Dios,

tol tꞌinan yunen bꞌey yul yibꞌankꞌinal tiꞌ jaxca chi yoche.

Cꞌam junoj mac otajnen jun tiꞌ peyxa.

Jal tinaniꞌ,

jaꞌ chi akꞌon kotajne el tzet jix naꞌle yu yet peyxa tuꞌ.

Jaꞌ yin Cristo oj yun jun snaꞌbꞌal tuꞌ.

10 Jaꞌ yet oj jul stiempoal,

catuꞌ oj yunen el jun tzet chi yoche tuꞌ,

yutol jaꞌ yet tuꞌ oj waꞌxoj oc masanil mactxequel yetoj masanil tzettaj yetal.

Tzettaj yetal ey satcan,

cꞌal tzettaj yetal ey yul yibꞌankꞌinal tiꞌ,

junxane oj yute yaon oc Cristo Yaawiloj.

11 Sicꞌbꞌil jon xacꞌaltaꞌ el yu Dios yet tax peyxa,

yu cu chaꞌon cu majul,

jun tzet oj yakꞌ ey jon junjun jon,

yutol junxane keoc yetoj Cristo.

Oj yun cꞌaltaꞌ jun tiꞌ jaxca chi yoche Dios,

yutol jaꞌ chi akꞌon yun masanil tzetyetal jaxca chi yoche.

12 Jix yun jaxca tuꞌ yutol jix el yin scꞌul Dios chi yunne,

yet watxꞌ tol jaon bꞌabꞌel jix kaoc Cristo yipoj cu cꞌul chi kal watxꞌ kꞌane tet yetoj cu bꞌeybꞌal,

tzet utbꞌil tol miman swatxꞌil.

13 Jal pax jex xin,

yet jix je yabꞌen jun kꞌane caw yel,

jun skꞌaneal cu colbꞌanil,

jix je yaon oc je cꞌul yin Cristo ketoj.

Yuxan,

junxane jix je yun can ey yetoj.

Jix jul Naj Santo Espíritu yin je pixan,

jaxca chi yun yoc yechel junoj tzetyetal.

Yu jun tuꞌ,

yuxan miman txequel,

tol yet jex xa Dios.

Yakꞌnaj can stiꞌ Dios,

tol tꞌinan yaontej Yespíritu tuꞌ ey jon.

14 Yu Naj Yespíritu eyxa oc kin tuꞌ,

yuxan kotaj,

tol yel oj cu chaꞌ jun cu sattaj oj yakꞌ Dios ey jon.

Jaꞌ yet tuꞌ,

oj tzꞌajna cu colbꞌanil,

yuxan oj al-le watxꞌ kꞌane tet, tzet utbꞌil tol miman swatxꞌil.

15 Tol jix wabꞌ an,

tzet utbꞌil tol caw che yaoc je cꞌul yin Naj Kaawil Jesús.

Ey pax je camcꞌulal yin jantaj ebꞌ yet xa Dios ketoj.

16 Yuxan,

junjun el chin txali je yu,

chi wal yu diosalil tet Dios je yu.

17 Jaꞌ Naj sDiosal Naj Kaawil Jesucristo,

jaꞌton cu Mam Dios,

tol caw miman yeloc apnoj.

Chin kꞌan tet tzet utbꞌil tol chi yakꞌ sjelanil Yespíritu ey jex,

yet watxꞌ caw chi naꞌcha el je yu,

tzet akꞌbꞌil kotajne eloj.

Catuꞌ oj kotajne el cu Mam Dios.

18 Chin kꞌan tet,

tzet utbꞌil tol chi sjaj je naꞌbꞌal yet watxꞌ caw chi naꞌcha el je yu,

tzet eyoc yipoj cu cꞌul,

jaon awtebꞌil jon yu Dios.

Catuꞌ caw chi naꞌcha el je yu,

tzet utbꞌil tol miman swatxꞌil jun cu sattaj oj yakꞌa,

yutol yet jon xa.

19 Chin kꞌan pax tet,

tzet utbꞌil tol che yotajne eloj,

tol caw miman yipal,

chi skeꞌ yu Dios masanil.

Eyoc jun yipal tuꞌ kin,

yutol chi kaoc cu cꞌul yin.

Xꞌoxnajxa yipal tuꞌ sicꞌlebꞌil,

20 yet jix yakꞌon pitzcꞌu a Cristo xol ebꞌ camnaj,

catuꞌ jix ey chotan Naj bꞌey swatxꞌ kꞌabꞌ Dios bꞌey satcan.

21 Yu jun tuꞌ,

yuxan yel miman yeloc apnoj Cristo yintaj masanil ebꞌ yaaw,

cꞌal yintaj wanxa ebꞌ eyoc yaawil,

yetoj yintaj ebꞌ tol man txequeloj yeoc yipal,

cꞌal yintaj ebꞌ ey yopiso yakꞌon mandar.

Miman yeloc apnoj yintaj masanil ebꞌ chi bꞌina yet jun tiempoal tiꞌ,

cꞌal yet yatoj tuꞌ.

22 Jix cꞌal ale oc Cristo Yaawiloj masanil tzettaj yetal yu Dios.

Jix yakꞌon pax yopiso yoc Yaawiloj yiglesia,

jaxca tol sjolom iglesia tuꞌ yeocoj.

23 Jaꞌ yiglesia tuꞌ,

jaxca tol smimanil yeocoj,

yutol tzꞌajan yeoc yin.

Jacꞌalaꞌ pax Cristo tuꞌ,

jaꞌ Naj chi akꞌon tzꞌajna masanil tzettaj yetal.