Yu Scamcꞌulal Dios Yuxan Chi Cu Colchai
2
Jaꞌ tinaniꞌ,
jix yakꞌ Dios je kꞌinal yetoj Cristo ketoj.
Jaꞌ yet yalantoj,
jaxca tol camnaj jex el yul sat Dios yu je penail,
cꞌal yu je cꞌam swatxꞌilal.
2 Yutol asanne sbꞌeybꞌal yul yibꞌankꞌinal tiꞌ jix je bꞌeybꞌalne.
Jix je bꞌeybꞌalne jaxca yochwan jun ey yopiso yakꞌwi mandar xol kaꞌeꞌ tiꞌ.
Jacꞌalaꞌ jun espíritu tuꞌ chi akꞌon scꞌul ebꞌ man jijemoj tet Dios tinaniꞌ.
3 Jaxca ton tiꞌ jix kute cu bꞌa cu masanil yet yalantoj.
Jix kun jaxca chi yoche cu naꞌbꞌal.
Asan yin wan tzet cꞌam swatxꞌil chi yoche oc cu mimanil tiꞌ bꞌey jix kaoc cu naꞌbꞌal.
Yutol comon cꞌal chi cu akꞌle mandar yu cu naꞌbꞌal.
Yu jun tuꞌ,
yuxan smoo chi tit jun miman syaꞌilal kibꞌan,
jaxca oj yun sjul yibꞌan wanxa ánima.
4 Jal pax Dios,
caw miman swatxꞌcꞌulal kin.
Miman scamcꞌulal kin.
5 Yutol,
caxcꞌal jaxca tol camnaj jon yul sat yu cu penail,
tol jix yakꞌ cu kꞌinal yetoj Cristo.
Yuxan yu swatxꞌcꞌulal Dios chex colcha ketoj.
6 Jaꞌ jix cu pitzcꞌunen a yetoj Cristo Jesús.
Chotan jon xa ey satcan yetoj Cristo yul sat tinaniꞌ.
7 Jix yun Dios jaxca tiꞌ,
yet watxꞌ jaꞌ yet oj jul jun tiempoal yet yatoj tuꞌ,
catuꞌ oj xꞌoxon eloj tol miman scamcꞌulal kin.
Catuꞌ oj xꞌoxon pax el scamcꞌulal ey jon,
yutol junxane keoc yetoj Cristo Jesús.
8 Yu swatxꞌcꞌulal Dios jix cu colchai,
yu chi kaoc cu cꞌul yin.
Jaꞌ jun tiꞌ,
manaj jon jix cu waꞌne,
yutol asan Dios chi saꞌon ey jon.
9 Man yu oj junoj tzet watxꞌ chi el kuneni,
yuxan chi cu colchai.
Yu tuꞌ xin,
cꞌam junoj jon chi skeꞌ cu mimanbꞌine cu bꞌa.
10 Jaꞌ Dios jix cu waꞌnen oc yin Cristo Jesús,
yet watxꞌ chi kun wan watxꞌ mulnail.
Peyxa tax naꞌbꞌil yu,
tzet watxꞌ mulnail oj yakꞌ cu bꞌeybꞌalne.
Eyxa Watxꞌcꞌulal Kin Yetoj Dios Tinaniꞌ Yu Cristo
11 Yu wan tuꞌ xin,
naꞌwejtej,
tzet je yei,
jaex man Israeloj jex tiꞌ.
Jaꞌ ebꞌ wet Israelal,
yalnaj ebꞌ je yin tzet utbꞌil tol man yetoj Dios jex,
yutol man to akꞌbꞌil oj jex circuncidar.
* Yutol jaon tiꞌ,
chi kaoc jun yechel chi yij circuncisión yin cu mimanil.
12 Jaꞌ yet yalantoj,
cꞌamto ecꞌ Cristo je yetoj,
cꞌam je yalon je yet yetoj ebꞌ wet Israelal.
Cꞌam pax je yalon je yet yin wan wa kꞌane jix yakꞌ Dios ketoj,
yet jix yakꞌon stiꞌ ey jon jaon Israel jon tiꞌ.
Ey jex ton ecꞌ yul yibꞌankꞌinal tiꞌ,
cꞌam pax junoj tzet watxꞌ je yaon oc yipoj je cꞌul,
yutol man to eyoj ecꞌ Dios je yetoj.
13 Caxcꞌal naatil jix je yintajne el Dios yet yalantoj,
jal tinaniꞌ,
yin Cristo ey jex xa ecꞌ scꞌatan,
yutol jix cam Cristo cu yaꞌiloj,
yet jix el ẍiqꞌuil.
14 Asan yu Cristo,
yuxan ey watxꞌcꞌulal kin tinaniꞌ.
Jaex tiꞌ,
caw acꞌul che yute je bꞌa yetoj ebꞌ wet Israelal yet yalantoj.
Jal pax Cristo xin,
jaꞌ jix akꞌon tan jun cajlebꞌail tuꞌ cu xol.
Yuxan,
jaꞌ yul sat Dios junxane conobꞌal je yeoc ketoj tinaniꞌ.
15 Jaꞌ yet jix cam Cristo,
jix yiꞌel yopiso wan ley,
yetoj wan chejbꞌanil tzꞌibꞌ ye canoj.
Yetoj pax oj,
junxane jix jex yute canoj yetoj ebꞌ wet Israelal.
Yu jun tuꞌ,
yuxan junxane conobꞌal keoc yul sat tinaniꞌ,
yutol junne keoc yetoj.
Yuxan jaxca tiꞌ jix yute yakꞌon swatxꞌcꞌulal snan cu xol.
16 Yutol jaꞌ yet jix cam Cristo yin teꞌ culus,
jix yakꞌon lawoj cajlebꞌail je nan je xol yetoj ebꞌ wet conobꞌ.
Yuxan,
junxane keoc cu masanil tinaniꞌ.
Yetoj pax oj,
yutol jix cami,
yuxan ey watxꞌcꞌulal snan cu xol yetoj Dios tinaniꞌ.
17 Jix jul al-le el watxꞌ kꞌane yu Cristo,
jun tol ey swatxꞌcꞌulal snan cu xol cu masanil.
Jal jon jaon Israel jon tiꞌ,
yet tax cꞌal yalantoj,
jaxca tol scawilalxa Dios ey jon ecꞌoj.
Jal jex pax xin,
jaxca tol naat tocꞌal ey jex eloj.
Jix yakꞌ Cristo kotajne eloj,
catuꞌ jix xꞌoxon pax el ey jex,
tzet utbꞌil chi yun koc can yin watxꞌcꞌulalil yetoj Dios.
18 Yuxan,
caxcꞌal Israel jon,
caxcꞌal cꞌamaj,
asan yu Cristo,
yuxan eyxa kalon ket kapni scꞌatan Dios tinaniꞌ,
yutol junne Naj Espíritu lalan scolwa kin cu masanil.
19 Jaꞌ yet yalantoj,
jaxca wan ebꞌ txꞌoj conobꞌal yeocoj,
jaxca jex tuꞌ yul sat Dios,
yutol man jexto sconobꞌoj.
Jal tinaniꞌ xin,
manxa jaxca oj tuꞌ je yei.
Yutol sconobꞌ jex xa yetoj masanil ebꞌ yet xa tinaniꞌ,
catuꞌ yuninal jex xa pax yetoj ebꞌ.
20 Jaxca junoj na lalan swaꞌxi,
quey jex tuꞌ.
Jaon ẍejabꞌ jon Jesús tiꞌ,
cꞌal yetoj wanxa ebꞌ ẍejabꞌ Dios,
jaꞌton ebꞌ profeta,
jaxca tol jaon anen ey yich.
Jaex xa xin,
jaxca tol jaex latzꞌbꞌil jex xa atoj yibꞌan jun yich tuꞌ.
Jaꞌ Jesucristo jaxca junoj chꞌen chꞌen yet xeꞌal na yei,
jaxca tuꞌ yeoc ey jon jaon tiꞌ.
21 Jaxca junoj na lalanxa slatzꞌle a xaanil yibꞌan yich eyxa eyoj,
tol caw watxꞌ ẍaꞌon sbꞌa slatzꞌlei,
jaxca tuꞌ keoc yin Cristo cu masanil.
Yutol jix cu oc snaoj Naj Kaawil.
Caw yet jon,
yutol junxane keoc yetoj.
22 Jaꞌ,
jaex tiꞌ,
man quey oj jex tuꞌ yet yalantoj.
Jaꞌ tinaniꞌ,
junxane je yeoc yetoj.
Jix jex oc snaoj cu Mam Dios ketoj,
yutol jix oc can kin cu masanil yetoj Naj Yespíritu.