Yopiso Naj Pablo Yalon El Skꞌaneal Colbꞌanile Tet Ebꞌ Man Israel Oj
3
Yu wan chi wal tuꞌ,
yuxan chin txali je yu.
Jain Pablo jin tiꞌ,
preso we yu cꞌal tol chi wakꞌ servil Cristo Jesús je nan je xol,
jex man Israeloj jex.
2 Je yotaj xa,
tzet utbꞌil tol asan yu swatxꞌcꞌulal Dios jix yakꞌ skꞌaneal yet colbꞌanile yul jin kꞌabꞌ,
yu walon el je nan je xol.
3 Jaꞌ jun tzet man to otajbꞌiloj yet yalantoj,
jaꞌ jix xꞌoxel Dios ey jin an.
Jix yakꞌ wotajne eloj.
Jaxca taꞌ walontej niꞌoj ey jex yul jun jin carta tiꞌ.
4 Jaꞌ yet oj je yilon a tzet jix jin tzꞌibꞌetoj tiꞌ,
oj naꞌcha el je yu,
tol wotaj scuybꞌanil Cristo,
yutol akꞌbꞌil xa ey jin yu.
5 Jaꞌ yet peyxa,
cꞌam wan tiꞌ jix akꞌle otajne eloj.
Jal tinaniꞌ,
jaꞌ Naj Yespíritu jix akꞌon kotajne el jaon sicꞌbꞌil jon el ẍejabꞌoj tiꞌ,
cꞌal ebꞌ ẍejabꞌ Dios,
jaꞌton ebꞌ profeta pax oj.
6 Jaꞌton wan jix akꞌle kotajne eloj,
tol jaex man Israeloj jex tiꞌ,
jaꞌ yet che yaon oc je cꞌul yin skꞌaneal yet colbꞌanile tiꞌ,
chex oc yuninal oj Dios ketoj,
jaon Israel jon chi kaoc cu cꞌul yin tiꞌ.
Yu Naj,
yuxan oj je chaꞌ je kꞌinal ketoj.
Jaxca tol junxane animail kili yul sat.
Jix yakꞌ stiꞌ Dios yu tzet tꞌinan yakꞌon ey jon yin Cristo Jesús.
Jun laan xa oj yun je chaꞌon jun tuꞌ ketoj.
7 Jain tiꞌ,
caxcꞌal man jin moo oj,
tol yakꞌnaj pax wopiso Dios walon el skꞌaneal yet colbꞌanile tiꞌ je nan je xol yu yipal.
8 Masanil ebꞌ yet xa Dios wetoj,
yel ecꞌbꞌan yeloc apnoj ebꞌ wintaj an.
Caxcꞌal cꞌam junoj ebꞌ miman weloc apnoj yintaj,
asan yu swatxꞌcꞌulal Dios,
yuxan yakꞌnaj wopiso.
Yuxan chin ecꞌ wal can el je nan je xol jaex man Israeloj jex,
tzet utbꞌil tol miman swatxꞌil Cristo.
9 Jaꞌ Dios,
jix waꞌnen masanil tzettaj yetal.
Jaꞌ yet cꞌamto chi waꞌxi,
catuꞌ jix snaꞌon canoj,
tzet oj yute yakꞌon cu colbꞌanil.
Cꞌam jun tiꞌ chi akꞌle otajnele el yet peyxa.
Jal tinaniꞌ,
yakꞌnaj xa wopiso wakꞌon je yotajnen eloj.
10 Yu jun tuꞌ,
yuxan masanil cꞌal ebꞌ yaaw yeoc bꞌey satcan,
cꞌal jantaj ebꞌ chi akꞌon cuenta tituꞌ,
yet jix yilon ebꞌ,
tzet utbꞌil keoc jaon yiglesia jon xa tiꞌ,
oj wakꞌ yotajne el ebꞌ,
tol caw miman sjelanil Dios.
11 Yet tax cꞌamto chi waꞌxi jun yul yibꞌankꞌinal tiꞌ,
catuꞌ jix snaꞌon canoj tzet oj cu yute.
Yin Naj Kaawil Jesucristo jix yun can el jun snaꞌbꞌal tuꞌ.
12 Yu Cristo,
yuxan eyxa kalon ket kapni scꞌatan Dios.
Cꞌamxa chi cu xiw cu txali tet,
yutol eyoc cu cꞌul yin.
13 Yu jun tuꞌ,
yuxan chin oc wal tean ey jex an,
manche je yakꞌ somcha je naꞌbꞌal yu wan syaꞌilal eyoc wibꞌan yu je watxꞌiloj.
Jaꞌ wan syaꞌilal lalan wabꞌen je yu cꞌal tiꞌ,
jaꞌ chi txꞌoxon eloj,
tol miman je yeloc apnoj yul sat Dios.
14 Yuxan,
chin ey kaan sattaj Dios,
/tet Smam Naj Kaawil Jesucristo./
15 Jaꞌ Dios cu Mam.
Jaꞌ chi txꞌoxon sbꞌeybꞌal masanil tujan ebꞌ mame bꞌey yul yibꞌankꞌinal tiꞌ cꞌal bꞌey satcan.
16 Miman swatxꞌil cu Mam Dios,
yuxan,
chin kꞌan tet,
tzet utbꞌil tol chi akꞌle stecꞌanil je naꞌbꞌal yu Naj Yespíritu.
17 Chin kꞌan pax tet,
tzet utbꞌil tol chi ey cꞌal ecꞌ Cristo yin je pixan,
yutol eyoc je cꞌul yin.
Ta jaxca tuꞌ,
oj cꞌal chꞌibꞌ je camcꞌulal.
Jaxca junoj teꞌ teꞌ caw mimej yin xeꞌ,
queytuꞌ oj je yun can eloj.
18 Catuꞌ watxꞌ chi yun snaꞌcha el je yu,
cꞌal yu masanil ebꞌ ket creyenteal,
tzet utbꞌil tol jaꞌ scamcꞌulal Cristo kin,
caw miman,
catuꞌ manxa jantajoj.
19 Caxcꞌal cꞌam bꞌakꞌin oj naꞌcha el ku,
jantaj jun scamcꞌulal tuꞌ,
chi woche tol che yotajne eloj.
Yetoj pax oj,
chi woche tol ey cꞌal oc Dios yin je pixan sicꞌlebꞌil.
20 Jaꞌ tinaniꞌ,
kalwej watxꞌ kꞌane tet Dios,
yutol chi skeꞌ yunen yel xacꞌal ecꞌbꞌan jantaj tzetyetal chi cu kꞌan tet,
ma yintaj tzet chi cu naꞌ,
yutol ey ton yipal skeꞌon yunen masanil tzettaj yetal kin.
21 Miman ojabꞌ yeloc apnoj Dios yul cu sat yin tobꞌalkꞌinal,
jaon yiglesia jon tiꞌ,
cꞌal yu Cristo Jesús pax oj.
Amén.