Jaꞌ Yu Naj Santo Espíritu Yuxan Junxane Chi Yun Can Cu Naꞌbꞌal
4
Jain tiꞌ,
preso we an,
yutol chi wakꞌ servil Naj Kaawil.
Chin oc wal tean ey jex,
tol caw watxꞌ ojabꞌ cꞌal che yute je bꞌeybꞌal.
Smoo watxꞌ che yute je bꞌa,
yutol awtebꞌil jex yu Dios yu je yoc yetoj.
2 Yeynajil ojabꞌ che yute je bꞌa,
ey ojabꞌ je camcꞌulal.
Akꞌwej techa ebꞌ pena chi yute sbꞌa ey jex.
Miman che yute je cꞌul junjun jex.
Kunwej masanil wan tuꞌ yin camcꞌulalil.
3 Junxane jix kun can el yu Naj Santo Espíritu.
Yuxan akꞌwej je yip yet watxꞌ ey ojabꞌ watxꞌcꞌulal snan je xol je masanil.
Ta jaxca tuꞌ,
junxane je yeoc tobꞌalkꞌinal.
4 Yutol jaon tiꞌ,
jaxca tol junne animail kei.
Junne Naj Espíritu eyoc kin.
Junne tzet chi kaoc yipoj cu cꞌul,
jaꞌton jun bꞌey awtebꞌil jon ocoj.
5 Junne Naj Kaawil.
Junne mac yin chi kaoc cu cꞌul.
Junne mac yin akꞌbꞌil jon bautizar.
6 Yetoj pax oj,
junne Dios,
Naj cu Mam cu masanil.
Jaꞌ Naj chi cu akꞌon mandar cu masanil.
Jaꞌ Naj chi cu kꞌanbꞌalne junjun jon.
Jaꞌ Naj eyoc kin cu masanil.
7 Txꞌoj txꞌoj cꞌal pax kopiso chi akꞌlei,
jatacꞌalaꞌ tzet chi yakꞌ Cristo ey jon junjun jon.
8 Yuxan,
jaꞌ yalon skꞌaneal Cristo tzꞌibꞌ ye can yul An Juun,
bꞌey chi yal jaxca tiꞌ:
Jix atoj,
yuxan jaꞌ ebꞌ jaxca preso yei,
jix yiꞌatoj ebꞌ yetoj.
Yetoj pax oj,
jix yakꞌ saꞌbꞌeal tet ebꞌ ánima,
ẍi yul An Juun tuꞌ.a
9 Chi waltoj ey jex,
tzet chi yal yeloc apnoj jun chi yal An Juun tuꞌ tol jix atoj.
Chi yal jaxca tuꞌ,
yutol jaꞌ yet cꞌamto chi pax aoj,
jix julecꞌ yul yibꞌankꞌinal tiꞌ.
10 Jaꞌ jun julnaj eytej tiꞌ,
jaꞌton jun tuꞌ jix paxa satcan,
yet watxꞌ tzꞌajan eyecꞌ yin masanil tzettaj yetal.
11 Jaꞌ wan saꞌbꞌeal chi yalaꞌ,
jaꞌton wan opiso chi yakꞌ ey jon junjun jon.
Ey jon ẍejabꞌ kei.
Ey jon chi skeꞌ kalon el skꞌane.
Ey jon chi kalel skꞌaneal yet colbꞌanile.
Ey jon chi kil ebꞌ ket creyenteal,
catuꞌ chi cu cuyon pax ebꞌ.
12 Jaxca tiꞌ jix yute yakꞌon wan opiso tiꞌ yet chi cu cuyle jaon yet jon xa Dios tiꞌ,
yin kakꞌon servil Naj,
cꞌal yin kakꞌlen stecꞌanil cu naꞌbꞌal junjun jon,
yutol jaon tiꞌ,
jaxca tol smimanil Cristo kei.
13 Chi yakꞌ chꞌibꞌ wan opiso tiꞌ ey jon,
yet watxꞌ jun laan ẍꞌibꞌ kaon oc cu cꞌul yin,
catuꞌ oj cꞌal kotajnen el Naj Scꞌaal Dios.
Ta jaxca tuꞌ,
oj cꞌal yiꞌ yip cu naꞌbꞌal.
Laan xa oj yun cu naꞌbꞌal jaxca snaꞌbꞌal Cristo,
yutol cꞌam niꞌoj man tzꞌajanoj.
14 Yutol chi yoche manxa ojabꞌ laan oj jon jaxca ebꞌ unin cꞌuun somcha el snaꞌbꞌal.
Jaꞌ tinaniꞌ,
ey mac laan jaxca junoj teꞌ barco tucꞌal chi tzꞌeytzꞌon ecꞌ yu kaꞌeꞌ,
ma junoj teꞌ teꞌ tucꞌal chi bꞌilwi yu kaꞌeꞌ,
yutol chi somcha el snaꞌbꞌal ebꞌ yu wanojxa txꞌoj cuybꞌanile chi al-le tet ebꞌ.
Chi iꞌle eytej sat ebꞌ yu wan ebꞌ jelan yin lekꞌtiꞌal.
Jaꞌ ebꞌ tuꞌ,
chi yoche ebꞌ chi cu yiꞌtoj yin junojxa comon bꞌeybꞌale.
15 Jal jon jaon tiꞌ,
sowalil asan tzetyetal yel chi kalaꞌ,
tol yin camcꞌulal chi kalaꞌ.
Sowalil chi cꞌal kiꞌ kip,
yet watxꞌ laan chi kun can el jaxca Cristo.
Yutol jaxca cu jolom,
queytuꞌ yeocoj.
16 Jaon xa xin,
jaxca tol smimanil Cristo kei.
Jaxca cu mimanil tiꞌ,
mitxꞌwombꞌa cꞌal yeoc xꞌanil,
caw watxꞌ yeoc junjun tzet eyoc yin cu mimanil.
Jaxca tuꞌ keoc yu Cristo,
yutol jaꞌ chi akꞌon kip cu masanil.
Lalan cu mulna junjun jon,
yet watxꞌ chi cꞌal yiꞌ yip cu naꞌbꞌal,
catuꞌ chi cꞌal jul cu camcꞌulal.
Acꞌ Bꞌeybꞌale Yin Cristo
17 Jaꞌ wan oj waltoj ey jex tiꞌ,
ẍejbꞌanil Naj Kaawil.
Manxa ojabꞌ laan oj che yute je bꞌeybꞌal jaxca ebꞌ man to otajnenoj Dios,
yutol jaꞌ sbꞌeybꞌal ebꞌ tuꞌ,
caw cꞌam niꞌoj yopiso,
naꞌbꞌacꞌal chi yetne sbꞌa ebꞌ.
18 Caw kꞌejkꞌinal ey snaꞌbꞌal ebꞌ.
Man oj akꞌle niꞌoj skꞌinal ebꞌ tol ey cꞌal yin tobꞌalkꞌinal yu Dios,
yutol cꞌam niꞌoj chi naꞌcha el yu ebꞌ yu scawil snaꞌbꞌal ebꞌ.
19 Cꞌam niꞌoj chi qꞌuixwi ebꞌ.
Tol chi cꞌal yatoj sbꞌa ebꞌ xol amulal.
Chi cꞌal seyecꞌ ebꞌ jantaj tzet man watxꞌoj.
20 Jal jex,
jaex tiꞌ,
man jaxca oj tuꞌ jix yun je cuywi yin yet Cristo.
21 Yutol jaꞌ jun kꞌane jix je yabꞌe,
jix je cuy yin Cristo.
Jaꞌ jun kꞌane yel jix al-le ey jex,
yutol asan Jesús caw yel.
22 Sowalil che bꞌejcan je icham bꞌeybꞌal junelne,
jaꞌton wan che kꞌanbꞌalne yet yalantoj.
Yutol jaꞌ je icham bꞌeybꞌal tuꞌ,
tucꞌal chi etex el yu wan tzet che yoche ocoj.
23 Yuxan,
sowalil chi swaꞌne oc Dios je naꞌbꞌal,
cꞌal je pixan.
24 Sowalil che chaꞌ qꞌuexcha je naꞌbꞌal,
che chaꞌon junojxa acꞌ naꞌbꞌale chi swaꞌne Dios jaxca yet.
Ta jaxca tuꞌ,
tutun caw yel,
watxꞌ tzet oj je bꞌeybꞌalne,
catuꞌ watxꞌ cꞌal oj je yute je bꞌa.
25 Yu jun tuꞌ,
yuxan manche xa je yakꞌ lekꞌtiꞌal.
Asanne ojabꞌ tzetyetal yel che yalaꞌ,
yutol jaxca tol junne animail keoc cu masanil.
26 “Ta ey bꞌey chi tit je jowal,
manche je yun junoj tzetyetal cꞌam swatxꞌil yu je jowal tuꞌ.”b
Tol oj wal manxa eyoj oc jowal tuꞌ yin je cꞌul,
catuꞌ chi ey can cꞌu.
27 Manche je yakꞌ yochwan naj diablo tuꞌ,
cꞌam ojabꞌ che yun spenail.
28 Ta ey jex chex elkꞌanwi,
manche xa jex elkꞌanwi tinaniꞌ.
Yel watxꞌ chex mulna yetoj je kꞌabꞌ yin junoj mulnail watxꞌ,
yet watxꞌ jaex xa oj skeꞌ je colwa tet wanojxa mac cꞌam tzet ey.
29 Manche je yal wan comon pena kꞌane.
Asanne ojabꞌ kꞌane watxꞌ che yalaꞌ,
yet watxꞌ chi waꞌxi oc snaꞌbꞌal ebꞌ chi abꞌeni,
catuꞌ chi cꞌal yiꞌ yip ebꞌ je yu.
30 Manche je txꞌem cus Naj Santo Espíritu eyoc je yin junjun jex.
Yutol jaꞌ Naj jix ale oc yin cu pixan junjun jon,
jaxca chi yun yale oc selloal junoj tzetyetal.
Yu Naj,
yuxan kotaj tol yet jon xa Dios,
masantaꞌcꞌal oj jul scꞌual yet oj cu chaꞌon cu colbꞌanil.
31 Bꞌejwej can masanil chichoncꞌulal,
cꞌal penacꞌulal,
cꞌal naꞌo a kꞌane.
Man ojabꞌ comonoj chi tit je jowal.
Yetoj pax oj,
man ojabꞌ comonoj chi a je yaw je tzuwai.
Bꞌejwej can je yunen masanil tzet man watxꞌoj.
32 Watxꞌ che yute je naꞌbꞌal ey jex junjun jex.
Okꞌ ojabꞌ je cꞌul je yin junjun jex.
Yetoj pax oj,
akꞌwej mimancꞌulal je yin junjun jex,
jaxca jix yun cu yakꞌon mimancꞌulal Dios yu Cristo.