Jaꞌ Tzet Smoo Chi Cu Bꞌeybꞌalne Jaon Yuninal Jon Xa Dios
5
Jaon yuninal jon xa Dios tiꞌ,
camcꞌulnebꞌil jon xa yu.
Yuxan,
sowalil chi cu bꞌeybꞌalne jaxca sbꞌeybꞌal.
2 Cu txꞌoxwej el cu camcꞌulal junjun cꞌu,
jaxca jix cu yute scamcꞌulnen Cristo yet jix yakꞌon cam sbꞌa cu yaꞌiloj.
Jaxca noꞌ meꞌ chi akꞌle cam yin xaambꞌalil sukꞌukꞌi yecꞌ sabꞌ chi yabꞌ Dios,
chi ẍaꞌ scꞌul,
jaxca tuꞌ jix yun Cristo yet jix cam Naj ku yaꞌiloj.
3 Jaꞌ tinaniꞌ,
yet jon xa Dios.
Yuxan caxcꞌal tucꞌal chi koche chi cu kꞌanabꞌ yin mule,
ma yin junojxa tzet man watxꞌoj chi el yunen ebꞌ ánima yetoj smimanil,
ma pekꞌal yin tzet man watxꞌoj,
tutun cꞌam chi skeꞌ cu kꞌanabꞌ yin wan tiꞌ.
4 Yetoj pax oj,
cꞌam chi skeꞌ kalontej tzet qꞌuixwiltaj yal-lei,
cꞌal comon kꞌane.
Cꞌam chi skeꞌ kalon pena kꞌane.
Yutol jaꞌ wan tuꞌ,
manxa cu moo oj kaloni.
Jaꞌ tiꞌ ket,
yel watxꞌ tol chi kal cu watxꞌ kꞌane tet Dios.
5 Kotajxa,
tol jaꞌ ebꞌ amul cꞌal ebꞌ yal cꞌal tzet man watxꞌoj chi el yunen yetoj smimanil,
cꞌal ebꞌ chi ochen oc bꞌeomal,
cꞌam yalon yet ebꞌ yoc Cristo cꞌal Dios Yaawiloj ebꞌ.
Ta chi koche oc bꞌeomal,
jaꞌ yul sat Dios,
jaxca tol lalan kalon oc bꞌeomal tuꞌ cu diosaloj.
6 Manche je yakꞌ je bꞌa etnele yu ebꞌ chi aloni,
tol cꞌam sowalil kunen wan chi wal tiꞌ.
Caw man yeloj chi yal ebꞌ,
yutol jaꞌ yibꞌan ebꞌ chi unen wan tiꞌ,
oj jul jun miman syaꞌilal yu sjowal scꞌul Dios,
yutol cꞌam chi sjije ebꞌ tzet chi yalaꞌ.
7 Yuxan,
man comonoj che yaoc je bꞌa yetoj ebꞌ.
8 Jaꞌ yet yalantoj,
kꞌejkꞌinal to ye cu pixan yu cu bꞌeybꞌal.
Jal tinaniꞌ xin,
sajkꞌinal xa ey cu pixan,
yutol junxane keoc yetoj Naj Kaawil.
Yet jon xa sajkꞌinal tinaniꞌ.
Yuxan,
sowalil watxꞌ chi kute cu bꞌeybꞌal.
9 Ta yel sajkꞌinal xa ey cu pixan,
watxꞌ ojabꞌ chi kute cu bꞌa,
tool ojabꞌ cꞌal chi kute cu naꞌbꞌal.
Asan ojabꞌ tzetyetal yel chi kalaꞌ.
10 Cuywej je bꞌa yin wan tzetyetal caw watxꞌ yul sat Dios.
11 Manche je yatoj je bꞌa xol wan tzet chi el yunen ebꞌ kꞌejkꞌinal to ey spixan,
yutol jaꞌ tzet chi el yunen ebꞌ,
cꞌam niꞌoj yopiso.
Yel watxꞌ che yalaꞌ,
catuꞌ che txꞌoxon eloj,
tol cꞌam niꞌoj yopiso wan tuꞌ.
12 Yutol jaꞌ tzet chi el yunen ebꞌ yin ewantajil,
qꞌuixwiltaj xacꞌal kalontej.
13 Jal pax tzet chi yun masanil ánima,
oj akꞌle porobꞌal masanil yu jun sajkꞌinalil Dios,
catuꞌ oj txeclo eloj.
Yutol jaꞌ jun sajkꞌinal tuꞌ,
jaꞌ chi akꞌon txeclo el masanil tzettaj yetal.
14 Yu jun tuꞌ,
yuxan chi al-le jaxca tiꞌ:
Jaex,
lalan je weyi,
iꞌel ja weyan.
Aanwej waan xol ebꞌ camnaj to el yul sat Dios.
Jaꞌ Cristo oj akꞌon sajkꞌinal ey jaach,
ẍi.
15 Yuxan,
chi cam je yilon tzet chi el je bꞌeybꞌalneni,
man ojabꞌ jaxca oj ebꞌ cꞌam snaꞌbꞌal yul sat Dios.
Tol ey ojabꞌ je naꞌbꞌal.
16 Akꞌwej je yip yin yet Dios,
yajbꞌan eyto niꞌojxa tiempo,
yutol jaꞌ jun tiempo tiꞌ,
pena xacꞌal junjun cꞌu.
17 Manche je yute je bꞌa jaxca junoj cꞌam snaꞌbꞌal.
Cuywej je bꞌa tzet che yute je yotajnen eloj,
tzet chi yoche Naj Kaawil chi cu bꞌeybꞌalne.
18 Manche je camtze el je bꞌa yu an,
yutol jaꞌ jun an tuꞌ chi yakꞌ yaawil je yin.
Jaꞌ jun an tuꞌ chi yiꞌtej spenail je yibꞌan.
Yel cꞌal watxꞌ ta jaꞌ Yespíritu Dios chi yakꞌ yaawil je yin,
manaj teꞌ an tuꞌ.
19 Jaꞌ yet che yambꞌa je bꞌa,
bꞌitnewej salmo,
yetoj himno,
cꞌal wanojxa bꞌit yet Dios.
Jaꞌ yet chex bꞌitni,
lalan je yalon watxꞌ kꞌane tet Naj Kaawil yin masanil je cꞌul.
20 Alwej yu diosalil tet cu Mam Dios tobꞌalkꞌinal yu masanil tzet ey,
ey jex yin sbꞌi Naj Kaawil Jesucristo.
Cuybꞌanile Ey Jon Junjun Jon
21 Jijem che yute je bꞌa ey jex junjun jex yu je xiwcꞌulal tet Dios.
22 Jex istile,
jijem che yute je bꞌa tet je yichamil junjun jex,
jaxca che yute je bꞌa tet Naj Kaawil.
23 Yutol jaꞌ je yichamil,
jaxca tol je jolom yeocoj.
Jaxca pax Cristo jolome yeoc tet yiglesia,
cu Colomal pax oj.
Jaxca tol smimanil kei.
24 Mac jon ey jon oc yiglesia oj tiꞌ,
jijem chi kute cu bꞌa tet Cristo.
Yuxan,
jex istile,
sowalil queytuꞌ che yute je bꞌa tet je yichamil.
Jijem che yute je bꞌa,
catuꞌ che jijen masanil tzet chi yal je yichamil ey jex.
25 Jaꞌ jaex jex ichamile,
caw che camcꞌulne je yistil,
jaxca chi yute scamcꞌulnen yiglesia Cristo.
Ilaꞌ,
tol jix yakꞌ cam sbꞌa yu yiglesia,
26 yu cu yiꞌon oc yetoj.
Jaꞌ jix cu sajbꞌanen el yetoj jaꞌ,
cꞌal yetoj skꞌane.
27 Jaxca tiꞌ jix cu yute jaon yiglesia jon tiꞌ,
tzet utbꞌil watxꞌ jon yul sat,
yet oj cu apnoj sattaj.
Yuxan,
jaꞌ tituꞌ,
cꞌamxa cu penail,
cꞌal cu cꞌam swatxꞌilal.
Cꞌamxa junoj tzet eyoc yin cu pixan.
Jaxca junoj kꞌap man wuchꞌbꞌilojtoj,
cꞌam cꞌal niꞌoj tzꞌil eyoc yin.
Asanxane yin Dios oj kaoc cu naꞌbꞌal.
Cꞌamxa niꞌoj cu penail tituꞌ.
28 Jacꞌalaꞌ jex jaex ichamile jex,
quey ojabꞌ tuꞌ che yute je camcꞌulnen je yistil,
jaxca che yute je camcꞌulnen je bꞌa.
Ta che camcꞌulne je yistil,
jaxca tol jaex cꞌal oc che camcꞌulne je bꞌa.
29 Cꞌam junoj mactxequel pena chi yute scꞌul yin smimanil.
Chi cu yaꞌilne cu mimanil cu masanil,
catuꞌ chi kakꞌon pax servil.
Queytuꞌ chi cu yute pax Cristo jaon yiglesia jon tiꞌ,
30 yutol jaxca tol smimanil kei.
31 “Yu jun tuꞌ,
jaꞌ ebꞌ winaj,
oj sbꞌejcan smam cꞌal xutx ebꞌ,
yet watxꞌ junxane chi yun can el ebꞌ yetoj yistil.
Catuꞌ jaxca tol junxane animail chi yun can ey ebꞌ scawanil,”
ẍi yul An Juun.a
32 Jaꞌ wan kꞌane tiꞌ,
caw miman yeloc apnoj.
Yutol jaꞌ chi wute jin naꞌoni,
jaꞌ jaon yiglesia jon Cristo tiꞌ,
jaxca kiꞌon bꞌey cu bꞌa yetoj ketbꞌi,
jaxca ojabꞌ pax jon tuꞌ yetoj Cristo.
33 Yetoj pax oj,
je yu junjun jex jaex ichamile tiꞌ,
yuxan chi al-le wan tiꞌ ey jex,
tzet utbꞌil che camcꞌulne je yistil,
jaxca che yute je camcꞌulnen je bꞌa junjun jex.
Chi yal pax je yu,
jaex istile jex tiꞌ,
tzet utbꞌil tol ey ojabꞌ yeloc apnoj je yichamil yul je sat junjun jex.