Gálatas sbꞌi jun libro tiꞌ. Jix tzꞌibꞌelecan yet abꞌil 49 d.C. Jaꞌ naj Pablo jix tzꞌibꞌencan yet eyecꞌ bꞌey conobꞌ Antioquía.

Jix stzꞌibꞌe naj Pablo jun carta tiꞌ tet ebꞌ creyente a Galacia, yet watxꞌ chi iꞌle meltzo snaꞌbꞌal ebꞌ somchanajtoj snaꞌbꞌal yu wan txꞌoj cuybꞌanile. Yutol ey ebꞌ chi aloni tol jaꞌ ebꞌ man Israeloj chi oc yin creyenteal, sowalil chi sjije sley Moisés ebꞌ, yet chi can ebꞌ watxꞌil sattaj Dios. Jal pax naj Pablo xin, caw chi stecꞌbꞌa sbꞌa yaloni tol man jaxca oj tuꞌ.

Caw chi yakꞌ yip naj Pablo smulna yetoj jun yopiso eyoc yibꞌan, yutol ẍejabꞌ Cristo yeoc naj. Yutol ey wan ebꞌ chi yaloc sbꞌa ẍejabꞌoj Cristo, yuxan chi yal naj Pablo yin jun mulnail akꞌbꞌil tet tol jaꞌ Dios akꞌnen tet, man ánima oj sicꞌnen ocoj. Jix akꞌle yopiso yet chi yalon el skꞌane Dios xol ebꞌ man Israeloj. Queyton tuꞌ jix yun xꞌoxon eloj, tol jaꞌ colbꞌanile chi akꞌle tet ebꞌ ánima, yu cꞌal tol chi yaoc scꞌul ebꞌ yin Cristo, man yu oj chi sjije sley Moisés ebꞌ.

Jaxa bꞌey slawubꞌ capítulo, chi yaltej tzet smoo chi el sbꞌeybꞌalne ebꞌ chi yaoc scꞌul yin Cristo. Caxcꞌal mi akꞌbꞌil circuncidar ebꞌ ma cꞌamaj, jaꞌ jun tzet miman yeloc apnoj, tol chi yaoc scꞌul ebꞌ yin Cristo.