Chi Yakꞌ Tenchebꞌal Naj Pablo
13
Yin xa yoxelal oj jex toj wilon an.
Junjun tzet oj waꞌxoj yei,
sowalil ey cawanoj ma oxwanoj testigo chi iloni cꞌal yabꞌen swaꞌxi yeocoj.
2 Jaꞌ yet jix jex ecꞌ wilon yet scaelal,
ey jun tzet albꞌilcan ey jex wu an.
Tol chi waltoj ey jex junelxa tinaniꞌ.
Caxcꞌal cꞌam jin ey jin ecꞌ je yetoj tituꞌ,
tol chi waltoj ey jex mac jex ocnaj je penail yet yalantoj,
je yet je masanil yeoc jun kꞌane tiꞌ.
Jaꞌ yet oj jin toj ey jex tuꞌ,
yet junelxa tiꞌ xin,
cꞌamxa cꞌal jin mimancꞌulal je yin bꞌian,
ta eyto cꞌal je penail.
Jaꞌton jun tiꞌ ecꞌ walnaj can ey jex an.
3 Lalan je yochen che yilaꞌ,
ta yel jaꞌ Cristo chin kꞌanbꞌalnen yet chin kꞌanabꞌ ey jex jaxca tiꞌ.
Jato yet oj jin apnoj,
catuꞌ oj je yiloni,
catuꞌ oj naꞌcha el je yu.
Yutol jaꞌ Cristo tiꞌ,
man tol oj tol cꞌam tzet chi skeꞌ yu xꞌoxon el ey jex,
tol masanil cꞌal skeꞌ yu Naj xꞌoxon el je nan je xol.
4 Yel toni,
jaꞌ yet jix ale oc Naj yin culus,
jaxca tol cꞌam yip Naj.
Tol yu pax yipal Dios,
yuxan iquis Naj tinaniꞌ.
Ilaꞌ jon pax oj,
jaxca tol cꞌam niꞌoj kip pax yetoj.
Tol yu pax yipal Dios,
yuxan iquis jon yetoj Cristo,
yet watxꞌ jacꞌalaꞌ jex kakꞌon servil.
5 Caw chi cam je naꞌon oc je yin yul je yet junjun jex,
yet watxꞌ chi txeclo eloj,
ta yel eyoc je cꞌul yin Cristo.
Caw che yakꞌ porobꞌal je bꞌa yul je yet junjun jex.
¿Tumi man je yotaj oj tol eyoc Jesucristo je yin junjun jex?
Asan tiꞌ,
bꞌian,
ta man jex jaꞌcaw creyenteoj sicꞌlebꞌil,
man eyoj oc Naj je yin,
chi yal tuꞌ.
6 Yuxan chi woche caw che yotajne eloj,
tol jaon tiꞌ,
jaꞌcaw creyente jon sicꞌlebꞌil.
7 Chi cu txali tet Dios je yu,
yet watxꞌ cꞌam junoj tzet man watxꞌoj chi el je yuneni.
Man tucꞌal oj chi cu txali je yu,
yet watxꞌ chi txeclo eloj tol watxꞌ cu mulnail.
Caxcꞌal chi txeclo eloj tol man watxꞌoj cu mulnail,
tol jacꞌalaꞌ chi yoche cu cꞌul tol watxꞌ che yute je bꞌeybꞌal.
8 Yutol cꞌam chi skeꞌ cu cajatne a cu bꞌa yetoj junoj cuybꞌanile jaꞌcaw yel.
Jaꞌ tiꞌ ket,
tol chi kakꞌ kip cu mulna oc yin.
9 Yu jun tuꞌ,
caxcꞌal cꞌam kip,
chi cu tzala cꞌaltaꞌa,
ta ey je yip.
Yetoj pax oj,
oj cu txaloj je yu,
yet watxꞌ chi cꞌal waꞌxi oc je naꞌbꞌal.
10 Yajbꞌan cꞌamto chin apni ey jex tuꞌ,
tol chi wakꞌ bꞌabꞌoj jun jin carta tiꞌ jin sattaj.
Yutol chi woche tol man sowalil oj jowal chi too wute jin bꞌa ey jex tuꞌ yu wopiso tiꞌ an.
Jaꞌ Naj Kaawil jix akꞌon jun wopiso tiꞌ,
yu waon oc je tecꞌanil.
Man yu oj jex wetnen eloj,
yuxan jix akꞌlei.
Scawilcꞌule
11 Jal tinaniꞌ,
jex wuẍtaj,
jex wanabꞌ,
ey jex ojabꞌ oc yin tzalacꞌulal bꞌey je lugar tuꞌ.
Caw che waꞌne oc je naꞌbꞌal.
Eyxa ojabꞌ je mimancꞌulal.
Junxane ojabꞌ che yute je naꞌbꞌal.
Ey ojabꞌ watxꞌcꞌulal snan je xol tituꞌ.
Jaꞌ Dios chi akꞌon jun je watxꞌcꞌulal tuꞌ,
cꞌal Naj akꞌom camcꞌulal,
jaꞌ oj oc je yetoj.
12 Akꞌlewej scawil je cꞌul yin je txꞌoxoni tol ey je camcꞌulal.a
13 Masanil ebꞌ creyente titiꞌ chi yatoj scawil je cꞌul.
14 Chi woche chi xꞌox swatxꞌcꞌulal Naj Kaawil Jesucristo ey jex,
catuꞌ chi yakꞌ scamcꞌulal Dios ey jex.
Chi woche tol caw ey ojabꞌ oc Santo Espíritu je yetoj.