Wan Tzetyetal Jix Xꞌox Can El Dios Tet Naj Pablo
12
Naꞌbꞌacꞌal chi wetne jin bꞌa walon jin bꞌa watxꞌil.
Yel watxꞌ jaꞌ wan jaxca weyich wilnaj chi waltoj ey jex an,
cꞌal wanxa txꞌoxbꞌil ey jin yu Naj Kaawil.
2 Ey jun winaj wotaj an,
caw eyoc scꞌul naj yin Cristo.
Eyxa 14 abꞌil tinaniꞌ yiꞌle atoj satcan bꞌey eyecꞌ Dios.a
Man wotaj an,
ta toonaj yetoj smimanil,
ma cꞌamaj.
Asan Dios yotaj.
3 Caxcꞌal toonaj yetoj smimanil,
caxcꞌal man toonaj oj yetoj smimanil,
man wotaj oj an.
Asan Dios yotaj.
Asan jun wotaj an,
4 tol jix iꞌletoj bꞌey jun lugar chi yij Paraiso.
* Jaꞌ tituꞌ jix yabꞌ yoc wan kꞌane tol cꞌam chi skeꞌ yal-lei.
Catuꞌ cꞌam chi chaꞌle al-le eloj.
5 Asan jun winaj tuꞌ oj wiꞌa can an.
Jal jin xin,
ma wiꞌa can jin bꞌa an.
Ey wan tzet eyoc win chi txꞌoxon eloj,
tol cꞌam niꞌoj wip an.
Asan wan tuꞌ,
oj waltoj yet oj jin mimanbꞌane niꞌoj jin bꞌa.
6 Kꞌinaloj yelcꞌulal chi woche chi wiꞌa can jin bꞌa tinaniꞌ.
Ma jin kꞌanabꞌ jaxca junoj mac cꞌam snaꞌbꞌal,
yutol asan tzetyetal yel chi wal an.
Ma cꞌal oj jin mimanbꞌane jin bꞌa jaxca tuꞌ,
yutol chi woche tol cꞌam junoj mactxequel chi naꞌoni,
tol yel miman weloc apnoj yintaj tzet chi yil ebꞌ win cꞌal tzet chi yabꞌ ebꞌ walon an.
7 Jaꞌ wan tzetyetal jix txꞌoxle ey jin satcan tuꞌ,
caw miman ton yeloc apnoj catuꞌ caw sakꞌal pax oj.
Yu jun tuꞌ ey smey wiꞌon a can jin bꞌa yu.
Yu jun tuꞌ ey jun jin yaꞌilal jix yaoc Satanás,
yu jin yetneni.
Jaxca junoj miman qꞌuix jejantoj yul jin chiꞌbꞌeal jun jin yaꞌilal tuꞌ.
Jix oc jun jin yaꞌilal tuꞌ,
yet watxꞌ cꞌam chi wiꞌa can jin bꞌa.
8 Oxel jix jin kꞌan tol chi el jun jin yaꞌilal tuꞌ win tet Naj Kaawil.
9 Jix yalon pax Naj ey jin jaxca tiꞌ:
“Kꞌojbꞌil jin watxꞌcꞌulal ey jaach.
Yutol jaꞌ yin ebꞌ cꞌam niꞌoj yip yul yet,
jatuꞌ chi txeclo el wipalil jain tiꞌ an,”
ẍi Naj Kaawil ey jin an.
Yu jun tuꞌ,
yuxan oj wiꞌa can jin bꞌa yu cꞌam wip an,
yet watxꞌ chi a can yipal Cristo win an.
10 Yu jun tuꞌ,
chin tzala tinaniꞌ an,
yutol cꞌam wip an.
Caxcꞌal chin bꞌuchlei,
caxcꞌal ey tzet caw chi oc wu,
caxcꞌal chi wil syaꞌilal,
caxcꞌal chi wabꞌ syaꞌil yu Cristo,
caw chin tzala cꞌal an.
Yutol jaꞌ yet cꞌam niꞌoj wip an,
jaꞌton yet tuꞌ chi a can yipal Cristo win,
chi wabꞌ an.
Jix Oc Sbꞌiscꞌulal Naj Pablo Yu Ebꞌ Creyente A Corinto
11 Jaxca tol cꞌam ton jin naꞌbꞌal yet jix walon oc jin bꞌa watxꞌil ey jex.
Jal jex xin,
jix jin je yakꞌ pural walon an.
Yutol jaex je moo jin je yalon watxꞌil.
Ey mactxequel chi tzꞌaj yaloc sbꞌa ẍejabꞌoj Cristo,
jaꞌ ebꞌ bꞌey che chaꞌ je yabꞌe.
Caxcꞌal cꞌam niꞌoj weloc apnoj,
cꞌam cꞌal niꞌoj ecꞌbꞌan yeloc apnoj ebꞌ wintaj an.
12 Jaꞌ yet jix jin ecꞌ je xol,
jix jin tecꞌbꞌa jin bꞌa jin mulna an.
Jix jin txꞌoxel wan milagro,
* cꞌal wan tzetyetal chi txꞌoxon el yipal Dios.
Jix qꞌueya je cꞌul yu wan jix el wunen tuꞌ.
Jaꞌ wan tuꞌ chi txeclonen eloj,
tol yel ẍejabꞌ jin Cristo.
13 Jaxca swatxꞌil jix ecꞌ wute jin bꞌa tet ebꞌ creyente bꞌey junjun iglesia,
jaxca tuꞌ jix ecꞌ wute jin bꞌa ey jex an.
Asan tol ma wakꞌ jin bꞌa je cuentane yu jin gasto.
Tol caw che yakꞌ mimancꞌulal win yu jin paltail jix oc ey jex tuꞌ an.
14 Jaꞌ tinaniꞌ,
tuxa chin too yet yoxelal ey jex tuꞌ,
man cꞌal pax oj wakꞌ jin bꞌa je cargone.
Yutol cꞌam chi woche oc tzettaj yetal ey jex.
Asan jex chex woche.
Jaꞌ ebꞌ mame,
smoo chi syambꞌa stumin ebꞌ,
catuꞌ chi yakꞌon ebꞌ tet yuninal.
Manaj ebꞌ uninale chi syambꞌa stumin catuꞌ chi yakꞌon tet smam cꞌal xutx.
15 Jain tiꞌ,
chi bꞌejcha jin cꞌul slawi can el jin tzettaj yetal masanil,
asantane chi waꞌxi can oc je naꞌbꞌal yu.
Caxcꞌal oj lawoj ma oj ichambꞌojtoj jin mimanil tiꞌ,
cꞌal jex wakꞌon servil,
oj jin tzala cꞌaltaꞌa.
Tumi taꞌ,
jaꞌ yet yel chex jin camcꞌulneni,
txenne chin je yute je camcꞌulnen pax oj.
16 Ey wan ebꞌ caxcꞌal tol yotaj,
tol cꞌam bꞌey jix wakꞌ jin bꞌa je cargone,
chi cꞌal yal ebꞌ,
tol yetoj jin jelanil jix wiꞌeytej je sat,
catuꞌ jix jex wakꞌon ganar wetnen an.
17 ¿Mac junoj ebꞌ jix jin chejtoj bꞌet iꞌon eytej je sat?
18 Jix jin kꞌan tet naj Tito yet chex too il-le yu,
catuꞌ jix jin chejontoj junxa kuẍtaj yetoj.
¿Tumi jix yiꞌeytej je sat naj Tito xin?
¿Tumi man laan oj jix ecꞌ kute cu bꞌeybꞌal je nan je xol?
Laan cꞌal jix ecꞌ kute cu naꞌbꞌal jon.
19 Tejan che naꞌ tol tucꞌal chi kiꞌel kin je sattaj.
Caw cꞌamaj pax oj.
Sattaj Dios lalan walontoj wan tiꞌ ey jex jaxca chi yoche Cristo,
yet watxꞌ che yiꞌ je yip,
jex wuẍtaj,
jex wanabꞌ camcꞌulnebꞌil.
20 Chin xiw jex too wilon an,
ta cꞌam che yute je bꞌa jaxca chi woche,
ta cꞌam pax chi wute jin bꞌa jaxca che yoche.
Chin xiw jin too ey jex tuꞌ,
ta eyto cꞌal jowal je xol,
cꞌal chichoncꞌulal eyto cꞌal sjowal je cꞌul,
cꞌal pekꞌal,
cꞌal naꞌo a kꞌane,
cꞌal alo kꞌumale.
Tala ey jex che yiꞌa can je bꞌa,
catuꞌ tala ey jex lalan je somcha eloj.
21 Chin xiw jin too ey jex junelxa,
tala chin yakꞌ qꞌuixwoj a cu Diosal je sattaj.
Tala ta chin okꞌ je yu,
yutol yet tax cꞌal yalantoj,
ecꞌal jex jix je bꞌeybꞌalne tzet man watxꞌoj.
Cꞌam cꞌal che bꞌejcan je bꞌeybꞌalnen spenail tuꞌ yetoj je mimanil,
jaxca amulal,
yetoj cꞌal wan tzetyetal tol caw qꞌuixwiltaj chi el je yuneni.