Naj Pablo Yetoj Ebꞌ Chi Stzꞌaj Yaloc Sbꞌa Ẍejabꞌoj Cristo
11
Toloj wal che yakꞌ techa wan oj waltoj ey jex tiꞌ an.
Jaxca tol cꞌam jin naꞌbꞌal,
yuxan chi waltoj jaxca tiꞌ,
akꞌwej cꞌal techaoj.
2 Caw chex jin yaꞌilne jaxca chex yute syaꞌilnen Dios.
Yutol tuxa jix wakꞌ jin wa kꞌane yetoj Cristo,
tzet utbꞌil tol oj jex wakꞌ yul skꞌabꞌ.
Jaxca junoj ix kꞌopo ix cꞌamto tzet chi el yuneni,
catuꞌ chi akꞌle tet yichamil,
toloj wal quey jex tuꞌ,
catuꞌ oj jex waon oc yul skꞌabꞌ Cristo.
3 Caw chin xiw an,
tala cꞌuxan che yakꞌ je bꞌa yiꞌle eytej je sat jaxca jix yute yakꞌon sbꞌa ix Eva yiꞌle eytej sat yu sjelanil jun mactxequel yutenaj sbꞌa labꞌail,
tala cꞌuxan queytuꞌ che yute je yakꞌon je bꞌa etnele pax oj.
Catuꞌ yu cꞌal tuꞌ eyman che yiꞌel je cꞌul yin Cristo.
Catuꞌ manxa tooloj che yute je bꞌa jaxca chi yoche scꞌul Naj.
4 Yutol ey ebꞌ chi ecꞌ alon wanojxa txꞌoj cuybꞌanile ey jex.
Jaxca tol txꞌoj junojxa Jesús chi ecꞌ yalel skꞌaneal ebꞌ,
catuꞌ manaj jun chi cu ecꞌ kaleloj,
lalan cꞌal je tzꞌaj je chaꞌon je yabꞌ tet ebꞌ.
Lalan je chaꞌon junojxa espíritu tet ebꞌ,
man pax jaxca oj Naj chabꞌilxa je yu.
Lalan je yaon oc je cꞌul yin jun skꞌaneal colbꞌanile,
manaj pax jun je yabꞌnaj can ey jon.
5 Jaꞌ ebꞌ tuꞌ,
caw ẍejabꞌ Cristo ebꞌ chi tzꞌaj yalon ebꞌ.
Chin naꞌ pax oj,
cꞌam niꞌoj ecꞌbꞌan yeloc apnoj ebꞌ wintaj an.
6 Caxcꞌal man jelan oj jin kꞌanabꞌi,
jaꞌ tzet wotaj an,
caw miman yeloc apnoj.
Masanil cꞌal tzet ecꞌ wunnaj je xol,
jaꞌ chi txꞌoxon eloj,
tol ey tzet wotaj an.
7 Jaꞌ yet jix ecꞌ walon el swatxꞌ kꞌane Dios je nan je xol tuꞌ,
cꞌam niꞌoj tzet jix el jin kꞌanon ey jex.
Jix wiꞌeytej jin bꞌa,
yet watxꞌ yel miman ojabꞌ je yeloc apnoj,
catuꞌ cꞌam bꞌey che ten je bꞌa yin je yaon oc je cꞌul yin Dios.
¿Tumi taꞌ cꞌam swatxꞌil wutenaj jin bꞌa jaxca tuꞌ?
8 Jaxca wal tol ocnaj jin elkꞌan tet wanojxa iglesia je yu,
yutol jatuꞌ jix jin chaꞌ jin gasto yet jix jin ecꞌ je xol jex wakꞌon servil.
9 Jaꞌ yet jix jin ecꞌ je xol,
ey tiempo ey junoj tzetyetal caw chi oc yopiso wu,
cꞌam cꞌal pax junoj jex bꞌey jix jin kꞌan niꞌoj tzetyetal.
Jaꞌ ebꞌ kuẍtaj a Macedonia tiꞌ jix bꞌet akꞌon niꞌoj tzet chi oc yopiso wu tituꞌ.
Cꞌam junoj jex jix wakꞌ jin bꞌa je cargone yu niꞌoj jin gasto an.
Jacꞌalaꞌ queytuꞌ oj wute jin bꞌa tinaniꞌ an.
10 Caxcꞌal chi wiꞌa can jin bꞌa walon wan tiꞌ,
cꞌam cꞌal junoj jex a Acaya jex chi skeꞌ jin je tenon oc tucanoj.
Caw yel chi wal an,
yutol eyoc Cristo wetoj an.
11 ¿Tzet yuxan cꞌam chin kꞌan jin gasto ey jex che naꞌ?
¿Tumi taꞌ tol cꞌam jin camcꞌulal je yin che naꞌ?
Jaꞌ Dios yotaj jantaj jin camcꞌulal je yin.
12 Jacꞌalaꞌ cꞌal oj wute jin bꞌa jaxca cꞌaltaꞌ wutenaj jin bꞌa je xol.
Oj wute jin bꞌa jaxca tuꞌ,
yet watxꞌ jaꞌ ebꞌ chi sey tzet utbꞌil chi yun yiꞌon a can sbꞌa,
oj can ebꞌ yalan wu an.
Yutol chi tzꞌaj yal ebꞌ,
tol laan yopiso ebꞌ wetoj an.
13 Jaꞌ ebꞌ tuꞌ,
tucꞌal chi tzꞌaj yaloc sbꞌa ebꞌ ẍejabꞌoj Cristo.
Caw etnem ánima ebꞌ yetoj skꞌane tuꞌ.
Yul cꞌal yet ebꞌ chi yalon oc sbꞌa ebꞌ ẍejabꞌoj Cristo.
14 Jal pax tzet chi yun ebꞌ tuꞌ,
cꞌam chi qꞌueya cu cꞌul yu,
yutol quey pax tuꞌ Satanás,
chi tzꞌaj yaloc sbꞌa naj swatxꞌiloj yángel Dios.
15 Yu jun tuꞌ,
cꞌam chi qꞌueya cu cꞌul ta chi yal ebꞌ tol chi akꞌle servil Naj yu ebꞌ,
tol caw jichan sbꞌeybꞌal ebꞌ.
Jaꞌ ebꞌ tuꞌ,
oj ẍaꞌ spaj ebꞌ jatacꞌalaꞌ tzet jix el yunen junjun ebꞌ.
Wan Syaꞌilal Jix Yil Naj Pablo, yutol Ẍejabꞌ Cristo Yei
16 Tol chi waltoj ey jex junelxa,
cꞌam ojabꞌ jex che naꞌ tol cꞌam jin naꞌbꞌal.
Ta che naꞌ jaxca tuꞌ xin,
chaꞌwej jin kꞌanabꞌ jaxca junoj mac cꞌam snaꞌbꞌal tuꞌ,
yet watxꞌ chi skeꞌ wiꞌon a can jin bꞌa niꞌoj,
jaxca wan ebꞌ chi yiꞌa can sbꞌa.
17 Jaꞌ wan oj waltoj ey jex tiꞌ,
manaj Naj Kaawil chi akꞌon waltoj.
Jaxca oj xacꞌal tol cꞌam jin naꞌbꞌal yet chi walontoj tiꞌ,
yutol tucꞌal chi wiꞌa can jin bꞌa walon an.
18 Caw ey ebꞌ chi yiꞌa can sbꞌa yu tzet ey yul skꞌabꞌ bꞌey yul yibꞌankꞌinal tiꞌ.
Yu jun tuꞌ,
oj wiꞌa can jin bꞌa niꞌoj yetoj ebꞌ.
19 Yutol jaex tiꞌ,
caw jelan jex,
yuxan chi techa je yijlen ebꞌ cꞌam snaꞌbꞌal chi yute sbꞌa ey jex,
masantaꞌ chex tzala yetoj ebꞌ.
20 Ey ebꞌ chex akꞌon pural yu je yakꞌon servil ebꞌ.
Catuꞌ chi stokꞌon ecꞌ masanil je tzettaj yetal ebꞌ.
Yaaw xacꞌal chi yute sbꞌa ebꞌ je yibꞌan,
catuꞌ chi yiꞌon a can sbꞌa ebꞌ.
Masantaꞌ chi smakꞌtoj je sat ebꞌ.
Jal jex jaex tiꞌ che yakꞌ techa tet ebꞌ.
21 Chin qꞌuixwi walontoj ey jex,
tol ma skeꞌ cu tecꞌbꞌan cu bꞌa kunen jaxca chi yute sbꞌa ebꞌ tuꞌ ey jex.
Jaxca cꞌal pax ebꞌ tuꞌ,
chi stecꞌbꞌa sbꞌa ebꞌ yaloni,
jaxca tuꞌ chi wute jin tecꞌbꞌan jin bꞌa walon an.
Yuxan lalan walon an,
tol jaxca junoj mac cꞌam snaꞌbꞌal.
22 Hebreo ton ebꞌ,
Hebreo jin pax oj.
Israel ton ebꞌ,
Israel jin pax oj.
Yicꞌaal naj Abraham ebꞌ,
yicꞌaal naj Abraham jin pax yetoj ebꞌ.
23 Ta yakꞌomal servil Cristo ebꞌ,
jain tiꞌ yel chi wakꞌ servil Cristo tuꞌ yintaj ebꞌ.
/Jaꞌ yet chi walontoj wan tiꞌ ey jex,
jaxca skꞌanabꞌtoj junoj mac cꞌam snaꞌbꞌal,
queytuꞌ chi wute kꞌanabꞌtoj jin bꞌa.
/ Yel ecꞌbꞌan jin mulnail yintaj ebꞌ tuꞌ.
Yel ecꞌal el jix jin makꞌle yintaj ebꞌ.
Ecꞌal el jix jin oc preso.
Masantaꞌ ecꞌal el ian wal jix jin cam an.
24 Joel jix jin makꞌle yu ebꞌ wet Israelal,
39 el jix makꞌle oc tzꞌuum win yu ebꞌ junjun el.
25 Oxel makꞌbꞌil jin yetoj kꞌaaxteꞌ.
Junel jix jin kꞌojchꞌennelei.
Oxel paxnaj ey teꞌ barco walan yet ey jin oc yibꞌan jaꞌ mar,
jix jin cancan snan jaꞌ.
Jaꞌ junel,
jun cꞌu yetoj jun akꞌbꞌal ey jin oc yibꞌan jaꞌ.
26 Ecꞌal bꞌey ecꞌnaj jin.
Ey bꞌey caw ey smey yu jaꞌ mimej jaꞌ,
cꞌal yu ebꞌ elkꞌom.
Ey bꞌey ey smey yu ebꞌ wet conobꞌ an,
cꞌal yu ebꞌ man wet conobꞌ oj an.
Ey bꞌey caw ey smey bꞌey yul-laj conobꞌ,
yetoj bꞌey naatlaj eloj,
cꞌal yibꞌan jaꞌ mar.
Ey bꞌey ey smey xol ebꞌ chi yaloc sbꞌa kuẍtaj oj.
27 Ey bꞌey caw chin cꞌuumbꞌi yu mulnail.
Caw wilnaj syaꞌilal.
Txꞌial el cꞌam weyan wu an.
Ey bꞌey cꞌam jin loꞌbꞌe cꞌal tzet chi wucꞌ an.
Ey bꞌey cꞌam chin low yu jin mulnail.
Ey bꞌey jix wetne jin cꞌul yu siic.
Ey bꞌey cꞌam chi yabꞌ jin pichil.
28 Man asanne oj wan syaꞌilal tiꞌ jix wil an.
Yutol junjun cꞌal cꞌu,
quey cꞌal tiꞌ wabꞌen syaꞌil yu jin naꞌon ebꞌ creyente bꞌey junjun iglesia.
29 Ta ey mac cꞌamto chi yiꞌ yip yin screyenteal,
caw chin oc il yu ebꞌ,
jaxca tol cꞌamto chi wiꞌ pax wip yetoj ebꞌ.
Ta ey ebꞌ chi akꞌle eyqꞌueyoj,
caw chi oc pitzꞌan syaꞌil yin jin cꞌul sicꞌlebꞌil.
30 Ta sowalil chi wiꞌa can jin bꞌa,
oj wiꞌa can jin bꞌa yin wan lalan walontoj ey jex tiꞌ an.
Yutol jaꞌ wan tiꞌ chi txꞌoxon eloj,
tol cꞌam niꞌoj wip an.
31 Jaꞌ tet Dios,
Smam Naj Kaawil Jesucristo,
smoo yal-le watxꞌ kꞌane tet yin tobꞌalkꞌinal.
Jaꞌ otajneni,
tol caw yel chi wal an.
32 Jaꞌ yet jix jin ecꞌ bꞌey conobꞌ Damasco,
jaꞌ naj gobernador chi mulna yetoj naj Rey Aretas,
jaꞌ naj jix aloni,
tol chi oc smajomal junjun spuertail jun conobꞌ tuꞌ,
yet watxꞌ chin mitxꞌle,
yaloni.
33 Jaxa pax yul jun xuc jix jin eytoj,
catuꞌ jix jin eltoj yul swentanail smuroal conobꞌ tuꞌ,
catuꞌ jix jin ey apnoj tꞌununoj sat txꞌotxꞌ.
Queytuꞌ jix yun jin colcha yul skꞌabꞌ naj tuꞌ yu Dios.