Yopiso Naj Pablo
10
Jaꞌ Cristo,
yeynajil jul yutenaj ecꞌ sbꞌa,
queytuꞌ chi wute pax jin bꞌa yet chin oc tean walontoj ey jex,
jain Pablo jin tiꞌ.
Chi al-lei,
tol abꞌ eyilal abꞌ chi wute jin bꞌa yet ey jin ecꞌ je yetoj,
jal pax yet ey jin ecꞌ naat xin,
tol abꞌ caw jow jin an.
2 Yuxan chin oc tean ey jex an,
yet watxꞌ jaꞌ yet oj jin apnoj ey jex tuꞌ,
man ojabꞌ jowoj oj wute jin bꞌa.
Yutol ey ebꞌ je xol lalan yalon kin,
tol laan chi kute cu bꞌa jaxca junoj comon ánima.
Jal jin jain tiꞌ,
man oj jin xiw jin teelen jin bꞌa yetoj ebꞌ chi alon jaxca tuꞌ.
3 Yel toni,
naꞌbꞌa ánima jon cꞌal.
Man pax laan oj chi kute kakꞌon kip jaxca chi yute yakꞌon yip ebꞌ comon ánima yul yet.
4 Manaj tzetyetal yul yibꞌankꞌinal tiꞌ chi cu mitxꞌkꞌabꞌne catuꞌ chi kakꞌon kip.
Tol asan tzet bꞌey eyoc yipal Dios chi cu kꞌanbꞌalne,
yet watxꞌ,
jaꞌ wan tzet chi al-le tol ey yip tuꞌ,
chi can ebꞌ yalan ku.
5 Jaꞌ comon jelanil chi can yalan ku.
Ey pax meynebꞌail.
Yu meynebꞌail tuꞌ,
yuxan ey mac cꞌam chi otajnen el Dios.
Yuxan yal cꞌal tzet meynebꞌailal,
chi cꞌal can yalan ku.
Jaꞌ masanil comon naꞌbꞌale,
chi ka can oc masanil yul skꞌabꞌ Cristo,
yet watxꞌ jijem ojabꞌ xacꞌal chi yute sbꞌa tet.
6 Jaꞌ yet chi xa skeꞌ je jijen masanil jaex tiꞌ,
jaon tiꞌ,
watxꞌ xa taꞌcꞌal kei kakꞌon cuenta ebꞌ cꞌam chi jijen je xol tuꞌ.
7 Jaex tiꞌ,
asan tzet che yil yetoj je sat chi skeꞌ snaꞌcha el je yu.
Ta jaex che naꞌ,
tol yet jex Cristo,
otajnewej eloj,
tol yet jon pax Cristo jaon tiꞌ.
8 Caxcꞌal miman chin ecꞌ yibꞌan walon wopiso ey jex,
ma cꞌal oj jin qꞌuixwoj a yu.
Yutol jaꞌ Naj Kaawil jix akꞌon kopiso jon,
yu jex kiptzeni.
Man yu oj jex kakꞌon etex eloj,
yuxan jix akꞌle kopiso tiꞌ jon.
9 Queytuꞌ chi wute walontoj ey jex,
yet watxꞌ cꞌam che naꞌ,
tol tucꞌal chex jin xibꞌte a yu wan jin carta chi watoj ey jex an.
10 Yutol ey abꞌ jex che yal win jaxca tiꞌ:
“Jaꞌ wan scarta tuꞌ,
caw jow yaloni,
caw ey yip.
Cꞌam cꞌal niꞌoj yopiso naj chi kilaꞌ.
Jaꞌ skꞌanabꞌi,
cꞌamxa cꞌal yeloc apnoj niꞌoj chi kabꞌe,”
je chi abꞌi.
11 Jal pax mac jex che yal jaxca tuꞌ,
naꞌcha ojabꞌ el jun tiꞌ je yu.
Jaxca chi wute walontoj ey jex tiꞌ yet naat ey jin ecꞌoj,
queytuꞌ oj wute jin bꞌa yet oj jin apnoj je xol tuꞌ.
12 Jaon tiꞌ,
ma cu tecꞌbꞌa cu bꞌa cu naꞌon tol laan jon jaxca wanxa ebꞌ chi yal sbꞌa watxꞌil yul yet.
Cꞌam chi cu laanbꞌane cu bꞌa yetoj ebꞌ.
Jaꞌ ebꞌ tuꞌ,
cꞌam niꞌoj snaꞌbꞌal ebꞌ.
Yutol junjun ebꞌ,
asan cꞌal snaꞌbꞌal ebꞌ chi skꞌanbꞌalne.
Yetoj pax oj chi tzꞌaj slaanbꞌane snaꞌbꞌal ebꞌ yetoj wanxa ebꞌ tuꞌ.
13 Jaon tiꞌ,
ma kiꞌa can cu bꞌa yu wan tzet cꞌam kalon ket yin.
Txꞌoxbꞌil ey jon yu Dios,
bꞌeytaj cꞌal lugaril chi cu ecꞌ mulnail.
Jaꞌ Corinto eyoc yul jun lugar txꞌoxbꞌil ey jon tuꞌ.
14 Yu jun tuꞌ,
cꞌamxa chi cu ecꞌtoj bꞌey junojxa lugar,
Kꞌinaloj ta ma cu bꞌetecꞌ junel ey jex,
cꞌam mi kalon ket cu mulna je nan je xol tinaniꞌ.
Jal jon xin,
jaon bꞌabꞌel apninaj jon yetoj skꞌaneal Cristo ey jex tuꞌ.
15 Cꞌam bꞌey chi kiꞌa can cu bꞌa yin smulnail junojxa mactxequel.
Cꞌam bꞌey chi kaloc ketoj.
Jaꞌ jun tiꞌ chi kaoc yipoj cu cꞌul.
Jaꞌ yet oj je yaoc je cꞌul yin Dios,
oj skeꞌ ya can cu mulna je xol.
Ma cꞌaltaꞌ cu kꞌaxbꞌo ecꞌ bꞌey junojxa lugar.
16 Oj lawoj tuꞌ,
catuꞌ oj cu toj kalon el skꞌaneal yet colbꞌanile yinlaj el je conobꞌ tuꞌ.
Man pax cꞌal oj kiꞌa can cu bꞌa yin smulnail wanojxa mac ecꞌnajxa tituꞌ.
17 Ta ey mac chi yoche chi yiꞌa can sbꞌa,
man watxꞌoj.
Asan Naj Kaawil smoo kiꞌon a can.
18 Ey ebꞌ asan cꞌal chi yal sbꞌa watxꞌil yul yet,
man pax yeloj,
asan yu tucꞌal chi yal sbꞌa watxꞌil.
Asan mac chi al-le watxꞌil yu Naj Kaawil,
asan ebꞌ tuꞌ watxꞌ.