Jaꞌ yu je yofrenda oj je yakꞌ tet ebꞌ ket creyenteal,

man sowalil chin tzꞌibꞌetoj ey jex yu.

2 Yutol wotajxa an,

tol caw che yoche chex colwa tet ebꞌ.

Lalan jex walon watxꞌil tet ebꞌ a Macedonia tiꞌ.

Jaꞌ chi wute kꞌanabꞌ jin bꞌa je yin tet ebꞌ jaxca tiꞌ:

“Jaꞌ ebꞌ creyente yul yet Acaya,

junnabꞌitax cꞌoli yiꞌon el yofrenda ebꞌ,”

jin chi tet ebꞌ tiꞌ.

Jaꞌ yet jix yabꞌen ebꞌ a Macedonia tiꞌ,

tol yelcꞌulal tol lalan je yakꞌoni,

ecꞌal ebꞌ jix a bꞌulna yakꞌon yet.

3 Yuxan oj jin chejtoj ebꞌ kuẍtaj tiꞌ ey jex,

yet watxꞌ man ojabꞌ naꞌbꞌa oj tzet watxꞌ jix el walon je yin tuꞌ.

Oj jin chejtoj ebꞌ,

yet watxꞌ listo xa ojabꞌ ye je yofrenda tuꞌ,

jaxca jix wute walon je yin tuꞌ.

4 Ta ey ebꞌ a Macedonia tiꞌ chi too wetoj an,

catuꞌ chi yilon ebꞌ tol cꞌamto je yofrenda tuꞌ,

caw qꞌuixwiltaj oj jin can yul sat ebꞌ,

yutol jix jex kaoc yipoj cu cꞌul jon.

Man lalan oj walon an,

ta je qꞌuixwiloj el jaex tiꞌ.

5 Yu jun tuꞌ,

jix jin naꞌ,

tol sowalil chi cu kꞌan tet ebꞌ kuẍtaj tiꞌ,

yet watxꞌ jaꞌ ey jex tuꞌ chi bꞌabꞌi too ebꞌ.

Oj toj colwa ebꞌ je yin ẍaꞌon je yofrenda tuꞌ,

jaxca jix je yute je yakꞌon je tiꞌ.

Ta queytuꞌ,

watxꞌ xa ojabꞌ ye je yofrenda tuꞌ,

catuꞌ oj je yakꞌon yu je camcꞌulal cꞌal yu je watxꞌcꞌulal,

man yu oj tol chex akꞌle pural.

6 Naꞌwejtej junxa oj wal tiꞌ an.

Jaꞌ ebꞌ txenne yawal chi yaocoj,

txenne tzet chi sjatxꞌa ebꞌ.

Jal mac mimantaj yawal chi yaocoj tuꞌ xin,

miman tzet chi sjatxꞌa.

7 Junjun ojabꞌ jon chi cu naꞌ yin cu pixan jantaj chi el yin cu cꞌul chi kakꞌa.

Man ojabꞌ yin oj cuscꞌulalil chi kakꞌa.

Man ojabꞌ tol oj chi cu akꞌle pural,

ma yu chi kꞌanle ey jon.

Yutol jaꞌ Dios chi cam scꞌul yin ebꞌ chi tzala yakꞌoni.

8 Jaꞌ Dios chi skeꞌ yu yakꞌon masanil tzetyetal ey jex yu swatxꞌcꞌulal.

Chi yakꞌ masanil tzet caw chi oc yopiso je yu yin tobꞌalkꞌinal.

Masantaꞌcꞌal chi yakꞌ xacꞌal sobra ey jex.

Yu jun tuꞌ,

ecꞌal bꞌey chi skeꞌ je colwai.

9 Oj eloc jaxca tuꞌ,

yutol chi yal yul An Juun jaxca tiꞌ:

Miman tzet jix yakꞌ tet ebꞌ mebꞌa.

Jaꞌ jun snaꞌbꞌal watxꞌ tuꞌ,

oj snaꞌtej Dios tobꞌalkꞌinal,

ẍi yul An Juun.^a

10 Jaꞌ Dios chi akꞌon masanil jinat chi awlei.

Catuꞌ chi yakꞌon pax masanil tzet chi cu loꞌ.

Jaꞌ oj akꞌon masanil tzettaj yetal ey jex oj je yakꞌ yin je yofrendaoj.

Jaxca tol oj je yaw canoj.

Jaꞌ sqꞌuexeloj je chaꞌ yu je watxꞌcꞌulal tuꞌ,

oj chꞌibꞌ yu,

catuꞌ oj je jatxꞌoni.

11 Yu jun tuꞌ,

miman swatxꞌil oj je chaꞌ,

yet watxꞌ oj skeꞌ je yakꞌon janicꞌoj xa.

Ecꞌal ebꞌ ket creyenteal oj alon yu diosalil tet Dios yet oj ẍaꞌon ebꞌ jun je colwal oj kiꞌtoj tet ebꞌ tuꞌ.

12 Yutol jaꞌ jun colwal oj akꞌle tet ebꞌ tuꞌ,

jaꞌ yopiso man asanne oj yu scol-le eltej ebꞌ yalan cawxinajil yu,

tol caw oj yal pax yu diosalil ebꞌ tet Dios je yu.

13 Oj yal watxꞌ kꞌane ebꞌ tet Dios,

yutol jaꞌ jun je yofrenda tuꞌ oj txꞌoxon eloj,

tol lalan je jijen watxꞌ skꞌane Cristo.

Yetoj pax oj,

oj yal watxꞌ kꞌane ebꞌ tet Dios yu jun je miman colwal che yakꞌ tet ebꞌ tuꞌ yetoj oj colwa oc tet masanil ebꞌ ket creyenteal.

14 Jaꞌ ebꞌ oj chaꞌon tuꞌ,

oj txaloj ebꞌ je yu.

Caw oj jex scamcꞌulne ebꞌ,

yutol jaex chex yakꞌbꞌalne Dios yin je txꞌoxon el miman swatxꞌcꞌulal tet ebꞌ.

15 Kalwej yu diosalil tet Dios,

yutol jaꞌ jun colwal jix yakꞌ ebꞌ ey jon tiꞌ,

cꞌamxa chi alcha el jantaj swatxꞌil.