Tzet Utbꞌil Chi Yun Kakꞌon Kofrenda
8
Jaꞌ tinaniꞌ,
jex wuẍtaj,
jex wanabꞌ,
chi koche chi kaltoj ey jex,
tzet jix yun xeclo el swatxꞌcꞌulal Dios snan xol ebꞌ creyente bꞌey wan iglesia bꞌey yul yet Macedonia tiꞌ.
2 Caxcꞌal jix akꞌle porobꞌal ebꞌ yu wan syaꞌilal jix jul yibꞌan ebꞌ,
caw chi tzala cꞌal pax ebꞌ.
Caxcꞌal caw mebꞌa ebꞌ sicꞌlebꞌil,
caw chi yakꞌ pax scolwal ebꞌ,
jaxca tol bꞌeom ebꞌ chi kilaꞌ.
3 Chi wakꞌ testigoal jin bꞌa yin ebꞌ,
tzet utbꞌil tol yelcꞌulal jix yakꞌ ebꞌ masanil jantaj bꞌey jix tzaji ebꞌ yakꞌoni.
Tol yel xacꞌal jix ecꞌ yibꞌan yakꞌon ebꞌ.
Yin cꞌal snaꞌbꞌal ebꞌ jix tita,
yu yakꞌon ebꞌ jaxca tuꞌ,
cꞌam mac jix alon tol sowalil chi yun ebꞌ.
4 Chi oc xacꞌal tean ebꞌ kin,
tzet utbꞌil tol chi cu chaꞌ scolwal ebꞌ,
yutol caw chi yoche ebꞌ chi colwatoj tet ebꞌ yet creyenteal.
5 Jaꞌ cu naꞌoni,
jantajne cꞌal mi niꞌoj oj yakꞌ ebꞌ,
tol caw miman pax jix yun yakꞌon ebꞌ.
Yutol bꞌabꞌel jix yakꞌ abꞌenal sbꞌa ebꞌ tet Naj Kaawil.
Jix lawi tuꞌ,
jix yakꞌon pax abꞌenal sbꞌa ebꞌ ey jon jaxca chi yoche Dios.
6 Yu jun tuꞌ,
jix kal tet naj Tito,
tol chex too yilaꞌ.
Catuꞌ chi too ẍaꞌon je yofrenda oj je yakꞌ yu je watxꞌcꞌulalil tuꞌ,
yutol jaꞌ ẍaꞌon el yich yet jix je yakꞌoni.
7 Miman swatxꞌil tzet chi el je yunen tuꞌ.
Caw che yaoc yin je cꞌul.
Caw cuywam jex yin skꞌane Dios.
Jelan jex xa.
Caw watxꞌ che yute je waꞌnen junoj tzetyetal.
Che camcꞌulne jon pax oj.
Yu jun tuꞌ,
chi ojabꞌ je txꞌoxel je watxꞌil yin je yakꞌon je yofrenda.
8 Jaꞌ jun chi waltoj ey jex tiꞌ an,
man chejbꞌanile oj yei.
Tucꞌal chi woche che yabꞌe,
tzet chi yute yakꞌon yofrenda ebꞌ titiꞌ,
yet watxꞌ chi txeclo eloj,
ta yel ey je camcꞌulal tituꞌ.
9 Yutol je yotaj,
jaꞌ Naj Kaawil Jesucristo,
caw miman swatxꞌcꞌulal Naj.
Caw ey sbꞌeomal Naj satcan,
jul yutenaj pax sbꞌa Naj mebꞌail yu scamcꞌulal Naj kin.
Jix yute sbꞌa Naj jaxca tuꞌ,
yet watxꞌ,
jaꞌ smebꞌail Naj tuꞌ chi cu aon can oc bꞌeomal yul sat Dios.
10 Chi waltoj ey jex an,
tzet chin naꞌ yin je yofrenda tuꞌ,
yet watxꞌ oj je yotajne eloj.
Junnabꞌitax jix je chaꞌel yich je yakꞌon je yofrenda,
yutol jix el yin je cꞌul je yakꞌoni.
11 Jaꞌ tinaniꞌ,
chi woche tol che yakꞌ cꞌal,
yet watxꞌ tzꞌajan che yute je yakꞌoni.
Jaxca jix je yute je chaꞌon el yich je yakꞌon yin masanil je cꞌul,
jaxca ojabꞌ tuꞌ che yute je yakꞌon cꞌal tinaniꞌ.
Jatacꞌalaꞌ tzet ey,
ey jex.
12 Ta yel chi el yin cu cꞌul chi kakꞌon kofrenda,
caw chi tzala Dios ketoj.
Jatacꞌalaꞌ tzet ey yul cu kꞌabꞌ.
Cꞌam chi skꞌan Naj,
ta cꞌam tzet ey yul cu kꞌabꞌ.
13 Cꞌam chi woche chi oc mebꞌail je yin,
cꞌal chi lawi el tzet ey,
ey jex,
yu cꞌal je colwa tet wanojxa mactxequel.
14 Tol chi woche tol jun laan ojabꞌ cꞌal ey ket cu masanil.
Jaꞌ tinaniꞌ,
jaꞌ tzet chi yakꞌ sobra ey jex,
chi skeꞌ je yakꞌon stzꞌajoj tzet eyto stzꞌajna yul skꞌabꞌ ebꞌ tuꞌ.
Jaxa pax junelojxa,
jaꞌ ojabꞌ ebꞌ chi akꞌon stzꞌaj yet eyto stzꞌajna ey jex.
Ta queytuꞌ chi kute jaxca tuꞌ,
laan cꞌal yecꞌ cu xol cu masanil.
15 Yutol chi yal yul An Juun Tzꞌibꞌebꞌilcan jaxca tiꞌ:
“Jaꞌ mactxequel miman yet jix syambꞌa aoj,
cꞌam chi yakꞌ sobra tet.
Jal mac txenne yet,
tzꞌajan cꞌal ey pax tet,”
ẍi yul An Juun tuꞌ.a
Naj Tito Cꞌal Ebꞌ Oj Toj Yetoj Naj
16 Chi wal yu diosalil tet Dios,
yutol jaꞌ jix akꞌon jul yin snaꞌbꞌal naj Tito,
catuꞌ chex syaꞌilneni,
jaxca chi wute jin cꞌul je yin,
jain tiꞌ.
17 Jaꞌ yet jix walon tet,
yu jex too yiloni,
eyman jix takꞌwi stoi.
Chi yoche naj chex too yil yin masanil scꞌul.
Yu jun tuꞌ,
yuxan oj toj.
18 Ey junxa kuẍtaj oj cu chejtoj yetoj.
Jaꞌ junxa tiꞌ,
chi al-le watxꞌil yu ebꞌ creyente bꞌey junjun iglesia,
yutol caw watxꞌ smulna yin yalon el skꞌaneal yet colbꞌanile.
19 Yetoj pax oj,
jaꞌton jun kuẍtaj tiꞌ,
sicꞌbꞌil el yu ebꞌ creyente bꞌey junjun iglesia,
yu ecꞌ ẍaꞌon chꞌen ofrenda tuꞌ ketoj.
Lalan kiꞌon a jun ofrenda tiꞌ,
yet watxꞌ chi txeclo el swatxꞌil Naj Kaawil,
catuꞌ chi txeclo pax el je watxꞌcꞌulal.
20 Chi koche tol cꞌam junoj mactxequel chi alon junoj tzetyetal kin,
yu tzet chi kun yetoj jun miman colwal tiꞌ.
21 Yu jun tuꞌ,
watxꞌ cꞌal chi kute cu bꞌa,
yet watxꞌ cꞌam cꞌal caabꞌcꞌulal kin.
Man asanne oj sattaj Naj Kaawil watxꞌ cꞌal chi kute cu bꞌa,
watxꞌ cꞌal chi kute pax cu bꞌa sattaj ebꞌ ket animail.
22 Ey junxa kuẍtaj oj cu chejtoj yetoj ebꞌ tiꞌ.
Jaꞌ jun kuẍtaj tiꞌ,
txꞌial el xa chi kilaꞌ,
tol watxꞌ cꞌal smulna naj yin yet Naj Kaawil.
Jaꞌ tinaniꞌ,
caw yochwan naj chi mulnai,
yutol caw chex yaoc yipoj scꞌul.
23 Ta ey mac oj kꞌanlen el ey jex,
tzet yeoc naj Tito tiꞌ,
je chi tet ebꞌ jaxca tiꞌ:
“Yetbꞌi sbꞌa naj yetoj naj Pablo,
catuꞌ tol eyecꞌ mulna cu xol tiꞌ,”
je chi tet.
Ta ey mac oj kꞌanlen yu ebꞌ oj apnoj yetoj naj Tito tuꞌ,
je chi tet ebꞌ jaxca tiꞌ:
“Jaꞌ ebꞌ tiꞌ,
jaꞌ ebꞌ creyente bꞌey iglesialaj jix chejontej ebꞌ,
jaꞌ swatxꞌil Cristo caw chi txeclo el yin sbꞌeybꞌal ebꞌ,”
je chi tet.
24 Jaꞌ yet oj apnoj ebꞌ ey jex tuꞌ,
caw che txꞌox je camcꞌulal tet ebꞌ.
Ta oj je txꞌox je camcꞌulal jaxca kalon tiꞌ,
jaxca tol lalan je txꞌoxon el tet ebꞌ creyente bꞌey junjun iglesia,
tol yel jix kalaꞌ,
yet jix jex kaloni,
tol watxꞌ jex.