Jex jin camcꞌulnebꞌil,

jaꞌton wan tiꞌ yalnaj can Dios,

yet jix yakꞌon can stiꞌ ey jon.

Yu jun tuꞌ,

bꞌejwej can tzet chi iꞌontoj cu mimanil yetoj cu pixan yin tzet man watxꞌoj.

Sowalil chi cu jichlone oc cu naꞌbꞌal sicꞌlebꞌil yu chi cu xiw tet Dios.

2 Awej oc yin je cꞌul tzet chi kalaꞌ.

Ilaꞌ cꞌam junoj jex bꞌey ocnaj cu penail.

Cꞌam junoj jex jix etex el je naꞌbꞌal ku.

Cꞌam pax junoj jex jix jex ketne.

3 Man yu oj waon oc junoj tzetyetal je yibꞌan,

yuxan chi waltoj wan tiꞌ ey jex.

Yutol tuxa jix waltoj ey jex,

tol caw ey jex oc yin cu cꞌul.

Yu jun tuꞌ,

tacꞌal iquis jon to,

ma chi cu cami,

jacꞌalaꞌ cꞌal chi kute cu camcꞌulnen cu bꞌa.

4 Caw yip jin cꞌul je yei,

catuꞌ chex walon watxꞌil.

Caxcꞌal miman tzet chi ale oc kibꞌan,

caw chin mimancꞌulnele cꞌal pax chi wabꞌe.

Caw chin tzala sicꞌlebꞌil.

5 Jaꞌ yet jix cu jul bꞌey Macedonia tiꞌ,

cꞌam chi xew cu mimanil tiꞌ,

yutol mimanxa syaꞌilal chi jul kibꞌan.

Jowal cꞌal jix ale oc kibꞌan.

Ey bꞌey chi jul xiwcꞌulal kin.

6 Jal pax Dios xin,

caw chi smimancꞌulne Naj masanil mac eyoc yin cuscꞌulal.

Yuxan jaꞌ Naj jix akꞌon smimanil cu cꞌul,

yu sjulbꞌal naj Tito titiꞌ.

7 Man asanne oj yu jix jul naj Tito,

yuxan jix kiꞌ smimanil cu cꞌul,

tol caw chi cu tzala pax oj yutol jix je mimancꞌulne Tito tiꞌ yet jix ecꞌ ey jex tuꞌ.

Jaꞌ jix alon ey jin,

tzet utbꞌil tol caw che yoche che yiloc win an.

Jix yalon pax oj,

tol caw chi cus je cꞌul yu jun tzet jix apni je xol tuꞌ.

Jix yaloni,

tol caw eyman chex oc wetoj an.

Yu jun tuꞌ,

caw jix a can jin tzalacꞌulal je yu an.

8 Caxcꞌal jix cus je cꞌul yu tzet jix yal an carta wanajtoj ey jex,

cꞌamxa chin cus pax yu tinaniꞌ.

Jix jin cus ton yu yet sbꞌabꞌelal,

yet jix wabꞌen an,

tol jix jex akꞌle cus yu janicꞌ tiempoal.

9 Jal tinaniꞌ xin,

caxcꞌal jix jex cus yu,

jal jin xin,

chin tzalai,

yutol jaꞌ je cuscꞌulal tuꞌ,

jaꞌ jix akꞌon je naꞌ je bꞌa.

Jix jex cus jaxca chi yoche Dios.

Yu jun tuꞌ,

cꞌam niꞌoj jix kakꞌ etex el je naꞌbꞌal.

10 Ta chi cu cus yu cu penail jaxca chi yoche Dios,

jaꞌ jun cu cuscꞌulal tuꞌ,

chi akꞌon snaꞌ sbꞌa cu cꞌul,

catuꞌ chi cu colcha canoj.

Ta jaxca tuꞌ,

cꞌamxa sowalil chi cus cu cꞌul yu.

Ey pax junxa tujan cuscꞌulal,

jaꞌ junxa tuꞌ,

scuscꞌulal yul yibꞌankꞌinal tiꞌ.

Jaꞌ ebꞌ chi cusa yu jun yet yul yibꞌankꞌinal tiꞌ,

tucꞌal chi too can ebꞌ bꞌey camich tol ey cꞌal yin tobꞌalkꞌinal yu.

11 Jal jex jaex tiꞌ,

jix jex cus jaxca chi yoche Dios.

Yu jun tuꞌ,

naꞌwejtej tzet jix yun je yeloc yu.

Caw yelcꞌulal tol jix jex oc il,

catuꞌ jix je yalontej tzet jix el je yunen yu je colon je bꞌa.

Jix tit je jowal yu jun tzet jix jul je xol tuꞌ,

jix jex xiw pax a yu.

Caw jix je yoche jix jex kꞌanabꞌ wetoj an.

Jix el yin je cꞌul je yakꞌon cuenta naj jix oc spenail yu je txꞌoxon eloj tol cꞌam je yalon je yet yin jun spenail naj tuꞌ.

12 Yu jun tuꞌ xin,

jaꞌ yet jix jin tzꞌibꞌentoj jun jin carta tuꞌ,

man yu oj naj jix oc spenail tuꞌ,

yuxan jix jin tzꞌibꞌetoj.

Man pax yu jun mac bꞌey jix oc spenail naj tuꞌ,

tol yu cꞌal snaꞌcha el je yu,

tol jaꞌ yul sat Dios,

caw ey ton je camcꞌulal kin.

13 Yu jun tuꞌ,

caw jix kiꞌcan smimanil cu cꞌul.

Man asanne oj tol jix kiꞌ smimanil cu cꞌul,

caw jix a pax can cu tzalacꞌulal yet jix yalon naj Tito,

tol caw jix yakꞌ tzalabꞌoj scꞌul je yetoj.

Yutol cꞌamxa chi yakꞌ bꞌiscꞌulal je yu,

yutol watxꞌ che yute je bꞌeybꞌal.

14 Jaꞌ yet junel,

walnaj tet naj Tito tiꞌ,

tol watxꞌ jex.

Jaꞌ tinaniꞌ xin,

man penaoj chin can chi wabꞌe,

yutol walnaj jaxca tuꞌ.

Masanil tzet kalnaj ey jex,

yel cꞌal eloj.

Jacꞌalaꞌ pax yet jix walon tet naj Tito tol watxꞌ jex,

tutun yel,

yuxan jix wal an.

15 Jaꞌ naj Tito tiꞌ,

caw ey scamcꞌulal je yin tinaniꞌ,

yutol chi snaꞌtej tzet utbꞌil tol che jije tzet yalnaj can ey jex.

Catuꞌ chi snaꞌon pax tej tol yin eyilal jix je yute je chaꞌon apnoj naj ey jex tuꞌ,

cꞌal yin xiwcꞌulalil.

16 Caw chin tzala tinaniꞌ,

yutol chi skeꞌ jex waon oc yipoj jin cꞌul an.