6
Jaon tiꞌ,
ket mulnawomal cu bꞌa yin smulnail Dios.
Yu jun tuꞌ,
yuxan chi cu oc tean ey jex,
tol jaꞌ swatxꞌcꞌulal Dios yakꞌnaj xa ey jex,
oc ojabꞌ yin yopiso.
2 Yutol jaꞌcaw chi alon yul An Juun Tzꞌibꞌebꞌilcan jaxca tiꞌ:
Jaꞌ yet jun tiempoal watxꞌ jix wabꞌ ja waloni.
Yet stiempoal yakꞌle colbꞌanile,
jix jin oc ja wetoj an,
ẍi Dios.a
Jaꞌ tinaniꞌ,
jix jul jun tiempoal watxꞌ yalnaj can tuꞌ.
Jix jul stiempoal yakꞌle colbꞌanile tuꞌ tinaniꞌ.
3 Chi koche cꞌam mac chi bꞌuchwa yin cu mulnail.
Yu jun tuꞌ,
yuxan cꞌam juneloj pena chi kute cu bꞌa.
4 Tobꞌalkꞌinal watxꞌ bꞌeybꞌale cꞌal chi cu txꞌoxeloj,
yutol yakꞌomal servil Dios kei.
Tecꞌan cꞌal chi kute cu bꞌa kakꞌon techa syaꞌilal.
Ey bꞌey ey tzet chi oc yopiso ku,
chi cu mulna cꞌal pax yin cꞌam tzet.
Ey bꞌey miman syaꞌilal joyanxa oc kin.
5 Ey bꞌey chi cu makꞌlei,
cꞌal chi cu oc preso.
Ey bꞌey chi oc bꞌulna ánima kin.
Ey bꞌey chi pax kip cu mulnai,
cꞌamxa chi cu wey yu.
Ey bꞌey chi jul wail kibꞌan,
yutol yakꞌomal cꞌal servil Dios kei,
yuxan jix kakꞌ techa masanil wan tiꞌ,
yet watxꞌ cꞌam mac chi bꞌuchwa yin cu mulnail.
6 Tol jichan cꞌal chi kute cu naꞌbꞌal.
Kotajxa,
bꞌeytet caw yel.
Miman cꞌal chi kute cu cꞌul.
Watxꞌ cꞌal chi kute cu naꞌbꞌal.
Eyoc Santo Espíritu kin.
Caw yel ey cu camcꞌulal.
Jaꞌ wan tiꞌ chi yil ebꞌ kin.
7 Asan tzetyetal yel chi kalaꞌ.
Caw eyoc Dios ketoj.
Jaxca junoj soldado chi scol sbꞌa yetoj smitxꞌkꞌabꞌ yet jowal,
catuꞌ chi cꞌoli yakꞌon jowal yetoj,
jaxca tuꞌ chi kute cu bꞌa,
yu jichan chi kute cu naꞌbꞌal.
8 Ey bꞌey miman keloc apnoj,
ey bꞌey cꞌam niꞌoj keloc apnoj.
Ey bꞌey chi cu al-le watxꞌil,
ey bꞌey tucꞌal chi cu bꞌuchlei.
Ey bꞌey tucꞌal chi cu naꞌa yal ebꞌ ánima,
asan tzet yel chi kal pax oj.
9 Ey bꞌey chi yal ebꞌ ánima tol man jon yotaj oj ebꞌ,
caw otajbꞌil jon pax yu ebꞌ sicꞌlebꞌil.
Ey bꞌey chi yakꞌle ebꞌ cu yaon oc yul skꞌabꞌ camich,
jacꞌalaꞌ iquis jon cꞌal pax oj.
Caw chi ale oc tzettaj yetal kibꞌan,
cꞌam chi cu cam pax oj.
10 Caxcꞌal chi cu txꞌemle cusoj,
chi cu tzala cꞌal pax tobꞌalkꞌinal.
Caxcꞌal caw mebꞌa jon,
ecꞌal pax mac chi oc bꞌeomal yul sat Dios ku.
Caxcꞌal cꞌam niꞌoj tzet ey,
ey jon,
jal pax yul sat Dios,
tzꞌajan ey,
ey jon.
11 Jex a Corinto,
tol caw chi cu jaj cu cꞌul ey jex.
Chi kaltoj masanil tzet ey yin cu pixan ey jex.
12 Caw cꞌam junojxa tzet chi cu cꞌubꞌa el ey jex.
Jal jex jaex tiꞌ,
ey wan tzet che cꞌubꞌa el ey jon.
13 Chin oc tean je yin jaxca junoj mame chi oc tean yin yuninal.
Caw che yaltej tzet ey yin je cꞌul ey jin an,
jaxca chi wute jantaj tzet eyecꞌ yin jin naꞌbꞌal ey jex.
Catuꞌ che txꞌox je camcꞌulal ey jin an jaxca chi wun jin txꞌoxon jin camcꞌulal ey jex an.
Sna Dios Iquis Jon
14 Cꞌam chi skeꞌ chi cu juncꞌune cu bꞌa yetoj ebꞌ man creyenteoj,
yutol caw man smoo oj jaxca tuꞌ.
Yutol cꞌam chi ẍaꞌle sbꞌa sjichanil yetoj spenail.
Jaꞌ jun sajkꞌinal eyxa oc yin cu pixan,
cꞌam chi skeꞌ tol junne chi eecꞌ yetoj kꞌejkꞌinal.
15 Jaꞌ Cristo,
caw cꞌam chi ẍaꞌle sbꞌa snaꞌbꞌal yetoj Satanás.
Jaon creyente jon tiꞌ,
man laan oj ket yetoj ebꞌ man creyenteoj.
16 Jaꞌ tzet chi al-le oc sdiosal,
caw cꞌam yalon yet yetoj sna Dios.
Yutol jaon tiꞌ,
sna Dios iquis jon,
jaxca yalon canoj,
chi yal jaxca tiꞌ:
Jain tiꞌ,
oj jin ey cꞌal ecꞌ yin ebꞌ,
catuꞌ oj jin ecꞌabꞌ cꞌal yetoj ebꞌ.
Oj jin oc sDiosaloj ebꞌ.
Catuꞌ oj oc ebꞌ jin conobꞌoj,
ẍi.b
17 Yu jun tuꞌ,
yalnaj pax can Naj Kaawil jaxca tiꞌ:
Elanwej xol ebꞌ,
poꞌowej el je bꞌa.
Man je mitxꞌ junoj tzet cꞌam swatxꞌil.
Catuꞌ oj jex jin chaꞌon oc wetoj an.
18 Oj jin oc je Mamoj.
Catuꞌ oj jex oc jin cꞌaaloj,
cꞌal jin cutzꞌin oj,
ẍi Dios Kaawil,
Naj tol chi skeꞌ yu masanil tzetyetal,
ẍi yul An Juun.c